ក្រុមមន្ត្រីបាននិយាយថា លោក ទៀ បាញ់ រដ្ឋមន្ត្រីក្រសួងការពារជាតិនឹងជួបប្រជុំថ្ងៃនេះនៅរដ្ឋហាវ៉ៃជាមួយលោក ជុក ហាហ្គេល (Chuck Hagel) រដ្ឋមន្ត្រីការពារជាតិអាមេរិក ព្រមទាំងរដ្ឋមន្ត្រីការពារជាតិអាស៊ានប្រាំបួនរូបផ្សេងទៀតនៅកិច្ចប្រជុំលើកទី១ដែលរៀបចំដោយអាមេរិកជាមួយមេបញ្ជាការការពារជាតិក្នុងតំបន់នេះ។
ថ្លែងនៅសន្និសីទសារព័ត៌មាននៅអាកាសយានដ្ឋានអន្តរជាតិភ្នំពេញមុនពេលចេញដំណើរ លោកឧត្តមសេនីយ៍ ទៀ បាញ់ បានប្រាប់ក្រុមអ្នកយកព័ត៌មានថា លោកមានគម្រោងជម្រាបជូនរដ្ឋមន្ត្រីទាំងនោះ និងលោក ហាហ្គេល អំពី “ស្ថានការណ៍ពិត” ក្នុងប្រទេសកម្ពុជា។
ដោយមិនលើកឡើងពីគណបក្សសង្គ្រោះ ជាតិចំឈ្មោះ លោកបានមានប្រសាសន៍ថា “យើងមិនអាចអនុញ្ញាតឲ្យមនុស្សមួយចំនួននិយាយតែឯងទេ។ប្រទេសនានាមិនត្រូវស្តាប់ ភាគីតែម្ខាងឡើង។ប្រសិនបើពួកគេចង់ដឹងពីស្ថានការណ៍ពិត ពួកគេត្រូវស្តាប់ភាគីទាំងសងខាង”។
ចាប់តាំងពីការបោះឆ្នោតជាតិដ៏ចម្រូងចម្រាសកាលពីខែកក្កដា មក លោកឧត្តមសេនីយ៍ ទៀ បាញ់ បានសន្យាដដែលៗថា នឹងការពាររដ្ឋាភិបាលរបស់លោកនាយករដ្ឋមន្ត្រី ហ៊ុន សែន ដែលបានជាប់ឆ្នោតតាមរដ្ឋធម្មនុញ្ញ។
ទន្ទឹមនឹងនោះដែរគណបក្សសង្គ្រោះជាតិបានបញ្ចុះបញ្ចូលសហគមន៍អន្តរជាតិឲ្យផ្អាកជំនួយដល់ប្រទេសកម្ពុជារហូតដល់ជម្លោះពាក់ព័ន្ធការបោះឆ្នោតកាលពីខែកក្កដាត្រូវបានដោះស្រាយរួចរាល់សិន។
លោកឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋានកិច្ចការបរទេស និងសហប្រតិបត្តិការនៃក្រសួងការពារជាតិបានមានប្រសាសន៍ថា របៀបវារៈរបស់លោកឧត្តមសេនីយ៍ ទៀបាញ់ រួមមានប្រធានបទសំខាន់ៗចំនួនបី គឺអាទិភាពនយោបាយរបស់អាមេរិកក្នុងតំបន់អាស៊ាន រួមទាំងកិច្ចសហប្រតិបត្តិការយោធា ជម្លោះនិងកង្វល់ដែនសមុទ្រ និងស្ថិរភាពក្នុងតំបន់។
លោកឧត្តមសេនីយ៍ ណឹម សុវត្ថិ ក៏បានថ្លែងទៅកាន់ក្រុមអ្នកយកព័ត៌មានមុនពេលការចេញដំណើររបស់ឧត្តមសេនីយ៍ ទៀ បាញ់ ដែរថា “ក្នុងចំណោមការពិភាក្សានោះនឹងផ្តោតលើកិច្ចសហប្រតិបត្តិការកងទ័ពអាស៊ាន និងកងទ័ពអាមេរិកក្នុងកិច្ចប្រឹងប្រែងដើម្បីទទួលបានបទពិសោធបន្ថែមទៀតពាក់ព័ន្ធនឹងគ្រោះថ្នាក់ផ្សេងៗដូចជាគ្រោះមហន្តរាយជាដើម”។
លោកបានមានប្រសាសន៍បន្ថែមទៀតថា “ ក៏នឹងមានការពិភាក្សាតុមូលផងដែររវាងក្រុមរដ្ឋមន្ត្រីការពារជាតិ និងរដ្ឋមន្ត្រីការពារជាតិអាមេរិក។ រដ្ឋមន្ត្រីទាំងនោះក៏នឹងជួបប្រជុំជាមួយនឹងតំណាងអង្គការសង្គមសីុវិលផងដែរ”។
ប្រព័ន្ធផ្សព្វផ្សាយព័ត៌មានក្នុងស្រុកបានរាយការណ៍ថា លោក ទៀ បាញ់ នឹងជួបប្រជុំទ្វេភាគីជាមួយលោក ហាហ្គេល នៅក្រៅកិច្ចប្រជុំរដ្ឋមន្ត្រីការពារជាតិអាស៊ាន។
ទោះយ៉ាងណា លោក ស៊ាន ម៉ាកគីនតុស អ្នកនាំពាក្យស្ថានទូតអាមេរិកប្រចាំរាជធានីភ្នំពេញបានមានប្រសាសន៍កាលពីម្សិលមិញថា លោកមិនដឹងថា តើជំនួបនោះនឹងធ្វើឡើងនៅពេលណាទេ។ លោកបានមានប្រសាសន៍ថា “ខ្ញុំមិនមានព័ត៌មានជាក់លាក់អំពីជំនួបមួយទល់នឹងមួយរវាងលោកឧបនាយករដ្ឋមន្ត្រី ទៀ បាញ់ និងលោក ហាហ្គេល ឡើយ”។
លោក ខាលីល ថេយ័រ អ្នកជំនាញតំបន់អាស៊ីអាគ្នេយ៍នៅបណ្ឌិត្យសភាកងទ័ពការពារជាតិអូស្ត្រាលីក្នុងទីក្រុងកង់បេរ៉ាបានមានប្រសាសន៍ថា ជំនួបក្នុងរដ្ឋហាវ៉ៃ ទំនងជានឹងបញ្ចៀសការពិភាក្សាណាមួយដែលអាចធ្វើឲ្យប្រទេសចិនអាក់អន់ស្រពន់ចិត្ត។
លោកបានមានប្រសាសន៍ថា “ខ្ញុំសង្ស័យថា ជំនួបនេះនឹងពិភាក្សាអំពីបញ្ហាទូទៅពីព្រោះអាស៊ានមិនចង់ឲ្យមានការចាត់ទុកថា ធ្វើការជាមួយអាមេរិកដើម្បីប្រឆាំងចិនឡើយ បន្ទាប់ពីកិច្ចប្រជុំនេះ”។ យោងតាមក្រសួងការពារជាតិអាមេរិកឲ្យដឹងថា បន្ទាប់ពីកិច្ចប្រជុំ លោក ហាហ្គេល នឹងទៅបំពេញទស្សនកិច្ចនៅប្រទេសចិនជាលើកដំបូងក្នុងឋានៈជារដ្ឋមន្ត្រីការពារជាតិ។ កិច្ចប្រជុំនេះធ្វើឡើងចំពេលមានការផ្លាស់ប្តូរយុទ្ធសាស្ត្ររបស់អាមេរិកនៅតំបន់អាស៊ី ហើយនៅពេលដែលមានទំនាក់ទំនងតានតឹងរវាងកម្ពុជា និងអាមេរិក។
កាលពីខែមករា លោក បារ៉ាក់ អូបាម៉ា ប្រធានាធិបតីអាមេរិកបានចុះហត្ថលេខាលើច្បាប់ថវិកាដែលផ្អាកការផ្តល់មូលនិធិមួយចំនួនដល់ប្រទេសកម្ពុជារហូតដល់មានការសើុបអង្កេតឯករាជ្យលើការបោះឆ្នោតជាតិដែលរងការចោទប្រកាន់ថា មានការលួចបន្លំ ឬរហូតដល់គណបក្សសង្គ្រោះជាតិបញ្ចប់ការធ្វើពហិការរដ្ឋសភារបស់ខ្លួនរួចរាល់សិន។
កាលពីឆ្នាំមុន បន្ទាប់ពីមានការរិះគន់ពីសមាជិកសភាអាមេរិកទៅលើការបោះឆ្នោតជាតិនេះ ប្រទេសកម្ពុជាបានផ្អាកកម្មវិធីផ្តល់ជំនួយយោធាដែលគាំទ្រដោយសហរដ្ឋអាមេរិកជាឯកតោភាគី ។
លោកឧត្តមសេនីយ៍ ទៀ បាញ់ បានធ្វើដំណើរទៅអាមេរិកលើកចុងក្រោយក្នុងឆ្នាំ២០០៩ដើម្បីជួបប្រជុំជាមួយលោក រ៉ូបឺត ហ្គេត ដែលពេលនោះជារដ្ឋមន្ត្រីការពារជាតិ អាមេរិកអំពីការរក្សាសន្តិភាព សន្តិសុខដែនសមុទ្រនិងការប្រឆាំងភេរវកម្ម៕សារុន