នគរបាលរាជធានីភ្នំពេញកំពុងស្វែងរកចាប់ខ្លួនបុរសអាយុ២០ឆ្នាំម្នាក់ដែលជាប់ចោទពីបទចាប់រំលោភក្មេងស្រីអាយុ១១ឆ្នាំម្នាក់នៅពេលនាងនៅតែម្នាក់ឯងនៅក្នុងបន្ទប់ជួលកាលពីថ្ងៃសៅរ៍។
យោងតាមលោក ហ៊ុយ ហ៊ាន នាយប៉ុស្តិ៍សង្កាត់ទួលសង្កែបានមានប្រសាសន៍ថា ករណីចាប់រំលោភនេះបានកើតឡើងនៅក្នុងសង្កាត់ទួលសង្កែ ខណ្ឌឫស្សីកែវ។ លោកបានមានប្រសាសន៍ថា “ជនសង្ស័យបានរត់គេចខ្លួនបន្ទាប់ពីចាប់រំលោភក្មេងស្រីអនីតិជនរូបនេះ។ យើងកំពុងស្វែងរកចាប់ខ្លួនជននេះ”។ លោកបានមានប្រសាសន៍ថា នគរបាលមិនបញ្ចេញឈ្មោះជនសង្ស័យទេរហូតដល់ចាប់ខ្លួនជននេះបានសិន។
ម្តាយក្មេងស្រីរងគ្រោះបានដាក់ពាក្យបណ្តឹងទៅនគរបាលកាលពីថ្ងៃអាទិត្យ ដោយអះអាងថា កូនស្រីរបស់គាត់បានប្រាប់គាត់ថា បុរសរូបនេះជាអ្នកជិតខាងដែលបានជួលបន្ទប់ស្នាក់នៅក្នុងផ្ទះនោះដែរ បានចាប់រំលោភនាង។ ក្មេងស្រីរូបនេះត្រូវបានបញ្ជូនទៅមន្ទីរពេទ្យបង្អែករាជធានីដើម្បីព្យាបាលមុខរបួសអំឡុងការចាប់រំលោភ។
លោកស្រី អ៊ុក គឹមចាន់តារា មន្ត្រីកម្មវិធីនៅអង្គការសិទ្ធិមនុស្សអាដហុកបានមានប្រសាសន៍ថា លោកស្រីបានទទួលករណីរំលោភកុមារចំនួន១៩ករណីនៅក្នុងរយៈពេលពីរខែដំបូងនៃឆ្នាំនេះ រួមទាំងករណី រំលោភហើយសម្លាប់កុមារមួយករណីផងដែរ៕សារុន