គណបក្សសង្គ្រោះជាតិចង់ប្តូរទីតាំងធ្វើពិធីរំឭកវិញ្ញាណក្ខន្ធប្រចាំឆ្នាំដល់ពលរដ្ឋខ្មែរប្រមាណ១,៧លាននាក់ ដែលបានបាត់បង់ជីវិតនៅក្នុងសម័យខ្មែរក្រហម ទៅសារមន្ទីរប្រល័យពូជសាសន៍ទួលស្លែងនៅកណ្តាលរាជធានីភ្នំពេញវិញ។
ជាទម្លាប់ គណបក្សប្រឆាំងបានធ្វើពិធីរំឭកវិញ្ញាណក្ខន្ធនៅថ្ងៃទី១៧ ខែមេសានៅឯ“វាលពិឃាត” ជើងឯកដែលស្ថិតនៅជាយរាជធានីជារៀងរាល់ឆ្នាំ ដើម្បីរំឭកដល់ថ្ងៃនៅក្នុងឆ្នាំ១៩៧៥នៅពេលខ្មែរក្រហមបានចូលទីក្រុងភ្នំពេញ ហើយបានក្តោបក្តាប់អំណាចអស់រយៈពេលជិតបួនឆ្នាំនោះ។
ប៉ុន្តែកាលពីថ្ងៃព្រហស្បតិ៍ គណបក្សប្រឆាំងបានផ្ញើលិខិតមួយច្បាប់ទៅក្រសួងវប្បធម៌ដែលគ្រប់គ្រងសារមន្ទីរប្រល័យពូជសាសន៍ទួលស្លែង ដើម្បីស្នើសុំប្រើប្រាស់សារមន្ទីរនេះជាកន្លែងថ្មីសម្រាប់រៀបចំប្រព្រឹត្តិការណ៍របស់ខ្លួន។
លោក ហូរ វ៉ាន់ សមាជិកសភាមកពីគណបក្សសង្គ្រោះជាតិ ដែលទទួលបន្ទុកនៅក្នុងការរៀបចំព្រឹត្តិការណ៍នេះ បានមានប្រសាសន៍ថា “ យើងនឹងធ្វើពិធីនៅឯសារមន្ទីរជើងឯកនៅក្នុងករណីណាដែលគេមិនអនុញ្ញាតឲ្យយើងធ្វើពិធីនៅសារមន្ទីរទួលស្លែង ប៉ុន្តែយើងចង់ធ្វើនៅទួលស្លែងជាង ព្រោះវាជិត”។
លោក ម៉ៅ មុនីវណ្ណ សមាជិកសភាជាប់ឆ្នោតមកពីគណបក្សប្រឆាំង បានលើកឡើងថា គណបក្សសង្គ្រោះជាតិ បាននិមន្តព្រះសង្ឃចំនួន៥៧អង្គ មកចូលរួមពិធីរំឭកវិញ្ញាណក្ខន្ធនេះ។ មនុស្សប្រហែល១.០០០នាក់ត្រូវបានរំពឹងថា នឹងមកចូលរួមនៅក្នុងពិធីនេះ។
លោក អូន តឺម នាយខុទ្ទកាល័យនៅក្រសួងវប្បធម៌បានឲ្យដឹងថា លោកនៅមិនទាន់ ឃើញការស្នើសុំនៅឡើយទេ ហើយលោកមិនអាចធ្វើអត្ថាធិប្បាយបានឡើយ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានលើកឡើងថា រដ្ឋាភិបាលអាចនឹងធ្វើតាមសំណើរបស់គណបក្សប្រឆាំង ប្រសិនបើព្រឹត្តិការណ៍នេះមិនជាប់ពាក់ព័ន្ធនឹងរឿងនយោបាយនោះ។ លោកបានមានប្រសាសន៍ថា “វាគ្មានហេតុផលណាដែលត្រូវរារាំងព្រឹត្តិការណ៍សាសនានោះទេ ប៉ុន្តែគេមិនគួរប្រើប្រាស់ពិធីសាសនាជាឱកាសដើម្បីវាយប្រហារ [រដ្ឋាភិបាល] ហើយព្យាយាមកេងចំណេញនយោបាយឡើយ”។
អំឡុងពិធីរំឭកវិញ្ញាណក្ខន្ធនៅឯវាលពិឃាតជើងឯក កាលពីឆ្នាំមុន លោក សម រង្ស៊ី ប្រធានគណសង្គ្រោះជាតិ បានថ្លែងទៅកាន់មនុស្សដែលមកជួបជុំគ្នាតាមរយៈទូរស័ព្ទពីប្រទេសបារាំង ខណៈលោកកំពុងនិរទេសខ្លួនឯងនៅទីនោះ។ លោកបានចោទប្រកាន់មន្ត្រីរដ្ឋាភិបាលដែលមិនបញ្ចេញឈ្មោះពីបទរារាំងដល់ដំណើរការកាត់ក្តីរបស់សាលាក្តីខ្មែរក្រហម និងពីបទធ្វើឲ្យអាក់ខានក្នុងការផ្តល់យុត្តិធម៌ដល់ជនរងគ្រោះនៅសម័យខ្មែរក្រហម។
នៅមុនការបោះឆ្នោតជាតិកាលពីឆ្នាំមុន លោក កឹម សុខា អនុប្រធាន គណបក្សសង្គ្រោះជាតិក៏ត្រូវបានចោទប្រកាន់ថា បានធ្វើយុទ្ធនាការមួយដោយអះអាងថា វៀតណាមបានប្រឌិតការធ្វើទារុណកម្ម ដែលខ្មែរក្រហមបានប្រព្រឹត្តនៅគុកទួលស្លែង តាមរយៈការចងក្រងឯកសារបានយ៉ាងល្អ។
តែទោះជាយ៉ាងណា លោក កឹម សុខា បានបដិសេធយ៉ាងដាច់អហង្ការដោយលើកឡើងនិងចោទប្រកាន់រដ្ឋាភិបាលថា កាត់តខ្សែអាត់សំឡេង ហើយដោយសារតែហេតុផលទាំងនេះ គណបក្សប្រជាជនកម្ពុជាកំពុងកាន់អំណាចបានអនុម័តច្បាប់មួយដើម្បីចាត់ទុកការបដិសេធមិនទទួលស្គាល់ការប្រព្រឹត្តបទឧក្រិដ្ឋរបស់ខ្មែរក្រហមជារឿងខុសច្បាប់៕ស៊ុយឈាង