លោក អាត់ ធន់ ប្រធានសហជីពដែលដឹកនាំការធ្វើកូដកម្មនៅរោងចក្រកាត់ដេរ SL កាលពីឆ្នាំមុន បានបង្ហាញខ្លួនចំពោះមុខសាលាដំបូងរាជធានីភ្នំពេញកាលពីម្សិលមិញសម្រាប់ការសាកសួរចំពោះការចោទប្រកាន់ពីបទញុះញង់។
សម្ព័ន្ធសហជីពប្រជាធិបតេយ្យ កម្មករកាត់ដេរកម្ពុជាហៅកាត់ថា ស៊ីខៅឌូ ដែលដឹកនាំដោយលោក អាត់ ធន់ បានដឹកនាំការតវ៉ាអស់រយៈពេលជាច្រើនខែកាលពីឆ្នាំមុនដើម្បីប្រឆាំងនឹងការគ្រប់គ្រងនៅក្នុងរោងចក្រកាត់ដេរ SL ដែលស្ថិតនៅក្នុងខណ្ឌមានជ័យរាជធានីភ្នំពេញ។
ការធ្វើកូដកម្មនេះបានប្រែក្លាយទៅជាការប្រើអំពើហិង្សានៅថ្ងៃទី១២ ខែវិច្ឆិកានៅពេលនគរបាលប្រដាប់ដោយកាំភ្លើងខ្លីនិងកម្មករកាត់ដេរប្រដាប់ដោយដុំថ្ម បានប៉ះទង្គិចគ្នាអំឡុងការតវា៉នៅតាមផ្លូវមួយដោយបណ្តាលឲ្យស្ត្រីម្នាក់បានស្លាប់។
លោក អាត់ ធន់ បានលើកឡើងបន្ទាប់ការសាកសួរកាលពីម្សិលមិញថា ព្រះរាជអាជ្ញាបានលើកឡើងថា លោកត្រូវបានចោទប្រកាន់ពីបទញុះញង់ឲ្យកើតមានកូដកម្មបន្ទាប់ពីទទួលបានពាក្យបណ្តឹងជាច្រើនរួច។
លោក អាត់ ធន់ បានមានប្រសាសន៍ថា “ចៅក្រមស៊ើបសួរបានសាកសួរខ្ញុំបន្ទាប់ពីព្រះរាជអាជ្ញាបានស្នើឲ្យមានការចោទប្រកាន់ពីបទញុះញង់ឲ្យកើតមានការប្រព្រឹត្តបទល្មើស។ រោងចក្រនិងកម្មករម្នាក់ក្នុងចំណោមកម្មករមួយចំនួនបានលើកឡើងថា មានការគប់ដុំថ្មធ្វើឲ្យភ្នែកម្ខាងរបស់គេពិការ”។
លោក អាត់ ធន់ បានមានប្រសាសន៍បន្តថា ជនរងគ្រោះបាននិយាយថា “ខ្ញុំបានទៅដល់រោងចក្រហើយបានគប់ដុំថ្ម។ តុលាការបានប្រាប់ខ្ញុំថា ខ្លួនគឺគ្រាន់តែអនុវត្តតាមនីតិវិធីតុលាការ ហើយ [ចៅក្រម] នៅមិនទាន់ដឹងថា តើត្រូវចោទប្រកាន់ ឬក៏លើកលែងការចោទប្រកាន់នៅឡើយទេ”។ ប៉ុន្តែមេដឹកនាំសហជីពរូបនេះក៏បានបដិសេធមិនទទួលខុសត្រូវចំពោះហេតុការណ៍ដែលបានកើតឡើងណាមួយឡើយ។
លោក អាត់ ធន់ បានមានប្រសាសន៍បន្តទៀតថា “នៅថ្ងៃកើតហេតុ យើងនៅឯទីស្នាក់ការកណ្តាលរបស់យើង ហើយធ្វើការជាធម្មតា។ យើងមិនពាក់ព័ន្ធនៅក្នុងរឿងនេះទេ ហើយយើងបានប្រាប់ព្រះរាជអាជ្ញាថា វាខុសដែលចោទប្រកាន់យើងថា ជាប់ពាក់ព័ន្ធនៅក្នុងហេតុការណ៍នេះ”។
លោក គឹម សុជាតិ មេធាវីរបស់លោក អាត់ ធន់ បានលើកឡើងថា តុលាការក៏បានលើកឡើងពីលក្ខខណ្ឌសុំឲ្យមានការដោះលែងឲ្យនៅក្រៅឃុំដែលលោក អាត់ ធន់ នឹងត្រូវប្រឈមផងដែរ ប្រសិនបើលោកត្រូវបានចោទប្រកាន់ពីបទញុះញង់មែននោះ។ មេធាវីរូបនេះ បានលើកឡើងថា ការចោទប្រកាន់បែបនេះអាចនឹងកើតមាននៅខែនេះ។
មេធាវីរូបនេះបានពន្យល់ថា “[គាត់នឹងត្រូវ] បង្ហាញខ្លួននៅប៉ុស្តិ៍នគរបាលនៅចុងសប្តាហ៍។ នៅពេលតុលាការកោះហៅគាត់ គាត់ត្រូវតែបង្ហាញខ្លួននៅតុលាការ ហើយគាត់ត្រូវតែតម្កល់ប្រាក់ចំនួន២៥.០០០ ដុល្លារ សម្រាប់ការដោះលែងឲ្យនៅក្រៅឃុំ”។
លោក ឯក ឆេងហួត ព្រះរាជអាជ្ញារងអមសាលាដំបូងរាជធានីភ្នំពេញបានបដិសេធមិនធ្វើអត្ថាធិប្បាយលើសំណុំរឿងនេះឡើយ កាលពីម្សិលមិញ ដោយបង្វែរសំណួរទៅចៅក្រម ជា សុខហៀង ដែលមិនអាចទាក់ទងសុំការធ្វើអត្ថាធិប្បាយបាន។
លោក កោះ ចុងហូ អ្នកគ្រប់គ្រងទូទៅនៅរោងចក្រកាត់ដេរ SL បានបដិសេធថា រោងចក្ររបស់លោកមិនបានដាក់ពាក្យបណ្តឹងប្តឹងលោក អាត់ ធន់ នោះទេ។
លោក ចុងហូ បាននិយាយថា “ ខ្ញុំគិតថា សំណុំរឿងនេះ គឺមកពីបុគ្គលផ្សេងម្នាក់ទៀត។វាមិនមែនមកពីរោងចក្រ SL នោះទេ។ យើងបានធ្វើអ្វីៗគ្រប់យ៉ាងតាមការព្រមព្រៀងនៅថ្ងៃទី៣ ខែធ្នូ រួចហើយ”។
លោក សុជាតិ បានបន្តថា ពាក្យបណ្តឹងនេះត្រូវបានដាក់ប្តឹងជាផ្លូវការដោយសន្តិសុខម្នាក់ដែលរោងចក្រកាត់ដេរ SL បានជួល។
សមាជិក ស៊ីខៅឌូ ទីបញ្ចប់បានប្រកាសបញ្ចប់ការធ្វើកូដកម្មនៅដើមខែធ្នូ បន្ទាប់ពីអ្នកគ្រប់គ្រងរោងចក្រ SL បានយល់ព្រមតាមការទាមទារដែលរួមមានការបើកប្រាក់ខែពាក់កណ្តាលខែឲ្យកម្មកររោងចក្រកាត់ដេរអំឡុងការធ្វើកូដកម្ម និងការដកលោក មាស សុធា ជាអ្នកមានភាគហ៊ុនមួយរូបដែលត្រូវបានរិះគន់ថា បានគាបសង្កត់សកម្មភាពប្រចាំថ្ងៃរបស់សហជីពនៅក្នុងរោងចក្រកាត់ដេរពីតំណែងជាដើម។
នៅក្នុងសេចក្តីថ្លែងការណ៍មួយកាលពីថ្ងៃច័ន្ទ កម្មករដែលជាសមាជិកសហជីពនៅរោងចក្រកាត់ដេរ SL បានលើកឡើងថា ខ្លួននៅមិនទាន់ទទួលបានប្រាក់ឈ្នួលដែលអ្នកគ្រប់គ្រងរោងចក្របានសន្យាផ្តល់ឲ្យតាមការព្រមព្រៀងបញ្ចប់ការធ្វើកូដកម្មនៅឡើយទេ។ ពួកគេក៏បានលើកឡើងដែរថា លោក មាស សុធា នៅតែប្រើវិធីសាស្ត្រគាបសង្កត់នៅក្នុងការគ្រប់គ្រងកម្មករក្នុងរោងចក្រ៕ស៊ុយឈាង