ក្រុមហ៊ុន ហ្គ្រេន ធ្វីន អុីនធើណេសិនណល (ខេមបូឌា) ខូ អិលធីឌី [Grant Twins Inter- national (Cambodia) Co.,Ltd.] ដែលមានមូលដ្ឋាននៅក្នុងរាជធានីភ្នំពេញ និងជារោង ចក្រកាត់ដេរ សម្លៀក បំពាក់សម្រាប់ផ្គត់ផ្គង់ឲ្យក្រុមហ៊ុនឈុតសម្លៀកបំពាក់កីឡានៅឯសហរដ្ឋអាមេរិក បានប្រកាសកាលពីម្សិលមិញថា ខ្លួននឹងពន្យារសម្រាប់ចុះបញ្ជីនៅលើផ្សារមូលបត្រកម្ពុជារយៈពេលបីសប្តាហ៍។
យោងតាមសេចក្តីប្រកាសមួយនៅលើគេហទំព័ររបស់ផ្សារមូលបត្រកម្ពុជា បានឲ្យដឹងថា ក្រុមហ៊ុនតៃវ៉ាន់មួយនេះមានគម្រោង ចុះបញ្ជីនៅផ្សារមូលបត្រនេះនៅថ្ងៃទី២៩ខែឧសភា ក៏ប៉ុន្តែ សេចក្តីប្រកាសនេះមិនបានបញ្ជាក់ពីមូលហេតុដែលបណ្ដាលឲ្យមានការពន្យារពេលនេះទេ។ គួររំឭកថា ក្រុមហ៊ុនហ្គ្រេនធ្វីន ដើមឡើយមានគម្រោងចុះបញ្ជីនៅថ្ងៃទី៨ ខែឧសភា។
នៅពេលក្រុមហ៊ុននេះ បោះផ្សាយប័ណ្ណភាគហ៊ុនសម្រាប់លក់ឲ្យសាធារណជននៅផ្សារមូលបត្រកម្ពុជា ក្រុមហ៊ុននេះនឹងក្លាយជាក្រុមហ៊ុនឯកជនដំបូងគេបង្អស់ដែលជួញដូរភាគហ៊ុននៅលើផ្សារមូលបត្រ ហើយក៏ជាក្រុមហ៊ុនទី២ ដែលចុះបញ្ជីនៅលើផ្សារមូលបត្រនេះផងដែរ។ ក្រុមហ៊ុនដំបូងដែលចុះបញ្ជីនៅផ្សារមូលបត្រកម្ពុជាកាលពីខែមេសា ឆ្នាំ២០១២ គឺរដ្ឋាករទឹកស្វយ័តក្រុងភ្នំពេញ ដែលជាក្រុមហ៊ុនរដ្ឋ។
ខណៈដែលសេចក្ដីប្រកាសកាលពីម្សិលមិញ គ្រាន់តែបញ្ជាក់កាលបរិច្ឆេទចុះបញ្ជីថ្មី សេចក្ដីប្រកាសនេះក៏បានផ្ដល់ព័ត៌មានបន្ថែមទាក់ទងនឹងការបិទដំណើរការប៊ុកបៀលឌីង របស់ក្រុមហ៊ុនហ្គ្រេនធ្វីន ផងដែរ។ គួរបញ្ជាក់ថា ក្នុងដំណើរការនេះ ក្រុមហ៊ុនចុះបញ្ជីត្រូវកត់ត្រាបរិមាណតម្រូវការប័ណ្ណភាគហ៊ុនពីសំណាក់វិនិយោគិន ដើម្បីកំណត់តម្លៃភាគហ៊ុនសម្រាប់ប្រកាសលក់ជាសាធារណៈលើកដំបូង (IPO) ។
សេចក្ដីប្រកាសនេះមានខ្លឹមសារថា “ក្រុមហ៊ុនមូលបត្រភ្នំពេញ ដែលធានាដំណើរការទិញមូលបត្រក្នុងក្រុមហ៊ុនហ្គ្រេនធ្វីន នឹងរៀបចំដំណើរការ IPO មានកិត្តិយសសូមជម្រាបជូនដល់វិនិយោគិនសាធារណៈឲ្យបានជ្រាបថា ក្រុមហ៊ុនហ្គ្រេនធ្វីន បានអនុវត្តដំណើរការប៊ុកបៀលឌីង ដោយជោគជ័យកាលពីថ្ងៃទី១១ ខែមេសា ឆ្នាំ២០១៤”។
សេចក្ដីប្រកាសដដែលមានខ្លឹមសារបន្តទៀតថា “ក៏ប៉ុន្តែលទ្ធផលមិនអាចត្រូវបានប្រកាសតាមពេលវេលារំពឹងទុកទេ ពីព្រោះចាំបាច់ត្រូវមានលិខិតអនុញ្ញាតចេញពីគណៈកម្មាធិការមូលបត្រកម្ពុជា”។
សេចក្ដីប្រកាសនេះបញ្ជាក់ទៀតថា ក្រុមហ៊ុនហ្គ្រេនធ្វីន នឹងប្រកាសវិនិយោគិនរបស់ខ្លួននៅថ្ងៃទី២៤មេសា និងអ្នកដាក់ពាក្យទិញភាគហ៊ុនរបស់ខ្លួននៅថ្ងៃទី២៣ ខែឧសភា។
លោក លាវ ជុងតេ ប្រធាននាយកប្រតិបត្តិ ក្រុមហ៊ុនហ្គ្រេនធ្វីន បានប្រាប់ក្រុមអ្នកសារព័ត៌មានអំឡុងសន្និសីទកាសែតកាលពីខែមុនថា ក្រុមហ៊ុននេះមានគម្រោងបោះផ្សាយភាគហ៊ុន៨.០០០.០០០ហ៊ុន សម្រាប់ប្រកាស លក់ជាសាធារណៈលើកដំបូងក្នុងតម្លៃចន្លោះ ពី៧.៤០០រៀល (ប្រហែល១,៨៥ដុល្លារ) ទៅ ១៤.០០០រៀល (ប្រហែល៣,៥ដុល្លារ)។
របាយការណ៍មួយដែលត្រូវបានបង្ហាញ អំឡុងសន្និសីទកាសែតនោះបង្ហាញថា ក្រុមហ៊ុននេះរំពឹងថា ប្រាក់ចំណូលរបស់ខ្លួននឹងកើនឡើងដល់៤០លានដុល្លារក្នុងឆ្នាំ២០១៥ ពោលគឺកើនឡើងពីចំនួនប្រាក់ចំណូលប៉ាន់ស្មាន៣០លានដុល្លារក្នុងឆ្នាំនេះ។
ក្រុមហ៊ុនហ្គ្រេនធ្វីន គឺជារោងចក្រកាត់ដេរសម្លៀកបំពាក់សម្រាប់ផ្គត់ផ្គង់ឲ្យក្រុមហ៊ុនសម្លៀកបំពាក់កីឡាម៉ាក Adidas និងម៉ាក Rebook ។ លោក លាវ ជុងតេ មិនអាចទំនាក់ទំនងសុំធ្វើអត្ថាធិប្បាយបានទេកាលពីម្សិលមិញ៕ សុធា