កាលពីម្សិលមិញ លោកស្រី មូរ សុខហួរ សមាជិកសភាជាប់ឆ្នោតមកពីគណបក្សសង្គ្រោះជាតិបានប្រកាសថា លោកស្រីនឹងចាប់ផ្តើមយុទ្ធនាការចូលទៅកាន់ទីលានប្រជាធិបតេយ្យក្នុងរាជធានីភ្នំពេញឡើងវិញនៅព្រឹកថ្ងៃអាទិត្យ។
កាលពីខែមុនលោកស្រី មូរ សុខហួរ បានបង្ហាញខ្លួននៅទីលានប្រជាធិបតេយ្យតែម្នាក់ឯងក្នុងរយៈពេលបួនថ្ងៃជាប់ៗគ្នាដើម្បី ប្រឆាំងនឹងបម្រាមរបស់រដ្ឋាភិបាលដែលហាមមិនឲ្យជួបជុំគ្នាជាសាធារណៈ។លោកស្រីត្រូវបានអាជ្ញាធររារាំងជាប់រហូតក្នុងរយៈពេលបួនថ្ងៃនោះ។
លោកស្រីបានលើកឡើងថា លោកស្រីនឹងព្យាយាមចូលទៅកាន់ទីលានប្រជាធិបតេយ្យនៅម៉ោង៨ព្រឹកក្នុងថ្ងៃអាទិត្យ និងថ្ងៃច័ន្ទដោយមានពាក់អាវយឺតដែលមានស្លាកសញ្ញាទាក់ទិននឹងនយោបាយដើម្បីគាំទ្រការធ្វើកូដកម្មស្នាក់នៅតែផ្ទះដែលចាប់ផ្តើមឡើងដោយសហជីពចំនួនប្រាំបីក្នុងចំណោមសហជីពរោងចក្រកាត់ដេរទាំងអស់នៅទូទាំងប្រទេសកាលពីម្សិលមិញ។
លោកស្រី មូរ សុខហួរ បានមានប្រសាសន៍ ថា “នៅថ្ងៃអាទិត្យ ខ្ញុំនឹងពាក់អាវយឺតដែលមានស្លាកសញ្ញា ‘ប្រាក់ខែគោល១៦០ដុល្លារ’ ហើយនៅថ្ងៃច័ន្ទ ខ្ញុំនឹងពាក់អាវយឺតដែលមានស្លាកសញ្ញា ‘ការធ្វើឃាតលើកម្មកររោងចក្រកាត់ដេរ”។ កាលពីថ្ងៃទី៣ ខែមករា កងរាជអាវុធហត្ថបានបាញ់សម្លាប់អ្នកតវ៉ាចំនួនប្រាំនាក់ និងធ្វើឲ្យរងរបួសជាង៤០នាក់ផ្សេងទៀត ដែលចូលរួមនៅក្នុងការធ្វើកូដកម្មទូទាំងប្រទេសរបស់កម្មកររោងចក្រកាត់ដេរដើម្បីទាមទារដំឡើងប្រាក់ខែគោលដល់១៦០ដុល្លារ។
លោកស្រី មូរ សុខហួរ បានមានប្រសាសន៍ បន្ថែមថា “យើងមិនអាចបណ្តោយឲ្យការទាមទារទាំងនេះបាត់បង់ទៅវិញដោយសារការបង្ក្រាបនោះទេ។ យើងចាំបាច់ត្រូវតែពាំនាំការទាមទារទាំងនេះត្រឡប់ទៅកាន់ក្រុមហ៊ុនវិញ”៕ ស៊ុយឈាង