កាលពីម្សិលមិញ ធនាគារអភិវឌ្ឍន៍អាស៊ី (ADB) បានសន្យាផ្តល់កម្ចីចំនួន៧៥លានដុល្លារ ដើម្បីជួយនៅក្នុងការស្តារឡើងវិញនូវហេដ្ឋារចនាសម្ព័នដែលបានខូចខាតនៅភាគពាយព្យនៃប្រទេសកម្ពុជា អំឡុងទឹកជំនន់ កាលពីឆ្នាំ២០១៣។ រដ្ឋាភិបាលអូស្ត្រាលីបានផ្តល់ជំនួយឥតសំណងបន្ថែមចំនួន៦,៧លានដុល្លារ សម្រាប់កិច្ចខិតខំប្រឹងប្រែងផ្តល់ជំនួយសង្គ្រោះ។
ទឹកជំនន់កាលពីខែកញ្ញា និងខែតុលា បានធ្វើឲ្យមនុស្សចំនួន១៦៨នាក់បាត់បង់ជីវិត និងធ្វើឲ្យលិចលង់ស្រែស្រូវ ផ្លូវ និងស្ពាន ជាពិសេសនៅភាគពាយព្យនៃប្រទេសកម្ពុជា ដោយបង្កឲ្យមានការខូចខាតគិតជាទឹកប្រាក់ប្រហែល៣៥៦លានដុល្លារ។
លោក ឡុង ពិសិដ្ឋ មន្ត្រីគម្រោងជាន់ខ្ពស់របស់ធនាគារអភិវឌ្ឍន៍អាស៊ី បានមានប្រសាសន៍ថា “ជំនួយនេះនឹងត្រូវប្រើ ដើម្បីស្តារឡើងវិញនូវហេដ្ឋារចនាសម្ព័ន្ធដែលរងការខូចខាតដោយសារទឹកជំនន់ មានដូចជា ផ្លូវជាតិ ផ្លូវនៅតាមតំបន់ជនបទក្នុងបណ្តាខេត្តរងគ្រោះដោយសារទឹកជំនន់ និងគម្រោងប្រព័ន្ធធារាសាស្ត្រនៅក្នុងខេត្តចំនួនប្រាំមួយ”។ ខេត្តទាំងប្រាំមួយនោះ មានដូចជា ខេត្តបន្ទាយមានជ័យ បាត់ដំបង កំពង់ចាម កំពង់ធំ ឧត្តរមានជ័យ និងខេត្តសៀមរាប។
ពេលថ្លែងទៅកាន់ម្ចាស់ជំនួយ នៅក្នុងពិធីមួយ កាលពីដើមខែនេះ លោក ញឹម វណ្ណដា អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា រដ្ឋាភិបាលត្រូវការជំនួយហិរញ្ញវត្ថុជាចាំបាច់ ដើម្បីបង្គ្រប់កង្វះថវិកាដែលមានទឹកប្រាក់ចំនួន២១៧លានដុល្លារ នៅក្នុងការជួយស្តារឡើងវិញបន្ទាប់ពីគ្រោះទឹកជំនន់។
យោងតាមលោក ឡុង ពិសិដ្ឋ បានឲ្យដឹងថា គណៈកម្មាធិការជាតិគ្រប់គ្រងគ្រោះមហន្តរាយដែលរងការរិះគន់ដោយសារការគ្រប់គ្រងមិនបានល្អនៅក្នុងកិច្ចខិតខំប្រឹងប្រែងផ្តល់ជំនួយ នឹងដើរតួនាទីជាអ្នកសម្របសម្រួលនៅក្នុងការចាត់ចែង និងការប្រើប្រាស់ មូលនិធិរបស់ធនាគារអភិវឌ្ឍន៍អាស៊ី។
ក្រសួងសេដ្ឋកិច្ច និងហិរញ្ញវត្ថុ (១,៦លានដុល្លារ) ក្រសួងសាធារណការ និងដឹកជញ្ជូន (២៩,១លានដុល្លារ) ក្រសួងអភិវឌ្ឍន៍ជនបទ (២៥,៥លានដុល្លារ) និងក្រសួងធនធានទឹក និងឧតុនិយម (២៣,៨លានដុល្លារ) នឹងត្រូវមានភារកិច្ចចាត់ចែងចំណែកភាគច្រើននៃកម្ចីនេះ។ ចំណែកឯកម្ចីដែលនៅសេសសល់ នឹងត្រូវបញ្ចូលទៅក្នុងមូលនិធិបម្រុង។
ការជួសជុល និងការស្តារឡើងវិញនូវផ្លូវស្ពាន និងប្រព័ន្ធធារាសាស្ត្រដែលរងការខូចខាតដោយសារទឹកជន់ គឺជាអាទិភាពដំបូងនៃកម្ចីរបស់ធនាគារអភិវឌ្ឍន៍អាស៊ី។ លោក ញឹម វណ្ណដា បានមានប្រសាសន៍ កាលពីម្សិលមិញថា “កសិករនឹងមិនទទួលបានប្រាក់ទាំងនេះនោះទេ។ ប្រាក់ទាំងនេះ នឹងត្រូវប្រើប្រាស់ ដើម្បី ស្តារហេដ្ឋារចនាសម្ព័ន្ធ ដែលស្ថិតនៅជុំវិញពួកគាត់ឡើងវិញ”។
កាលពីម្សិលមិញដដែលនោះ ក្រសួងធនធានទឹក និងឧតុនិយម បានចេញផ្សាយការព្យាកររបស់ខ្លួនសម្រាប់រដូវវស្សាឆ្នាំ២០១៤។ ការព្យាករនេះបានឲ្យដឹងថា ភ្លៀងនឹងមានការធ្លាក់ចុះ ប៉ុន្តែរន្ទះបាញ់ ព្យុះភ្លៀង និងខ្យល់កន្ត្រាក់នឹងមានការកើនឡើង។ ការព្យាករនេះក៏បានឲ្យដឹងដែរថា រដូវវស្សាឆ្នាំនេះ នឹងចាប់ផ្តើមនៅសប្តាហ៍ទី២ ក្នុងខែឧសភា៕ ស៊ុយឈាង