មេដឹកនាំសហជីពលើកឡើងថា ខ្លួនរំពឹងថា មនុស្សរហូតដល់ទៅ១.០០០នាក់នឹងនាំគ្នាមកសាលារាជធានីភ្នំពេញនៅថ្ងៃេនះ ដើម្បីបង្ហាញការគាំទ្រចំពោះ សមាជិកសហជីព កម្មករ និងអ្នកឈរមើលចំនួន២៣នាក់ ដែលត្រូវតុលាការបើកសវនាការជំនុំជម្រះក្តីទាក់ទិននឹងការពាក់ព័ន្ធរបស់ពួកគេនៅក្នុងការតវ៉ាដ៏ហិង្សានៅក្នុងខណ្ឌពោធិ៍សែនជ័យ កាលពីខែមករា។
អំឡុងអំពើហិង្សាដ៏ខ្លាំងចំនួនពីរថ្ងៃនៅដើមខែមករា មនុស្សចំនួន២៣នាក់ត្រូវបានវាយដំ និងចាប់ខ្លួនមុនពេលបញ្ជូនទៅកាន់មណ្ឌលអប់រំកែប្រែទី៣ នៅក្នុងខេត្តកំពង់ចាម ជាទីដែលសុខភាពរបស់ពួកគេបានចុះខ្សោយហើយគ្មានការព្យាបាលឲ្យបានត្រឹមត្រូវ និងអាចទាក់ទងមកខាងក្រៅបានតិចតួច។ មនុស្សទាំង២៣នាក់នេះត្រូវបានចោទប្រកាន់ពីបទបង្កអំពើហិង្សា និងបំផ្លិចបំផ្លាយទ្រព្យសម្បត្តិ ជាការចោទប្រកាន់មួយដែលអង្គការសិទ្ធិមនុស្សបានជំទាស់យ៉ាងខ្លាំង។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ (CUMW) បានមានប្រសាសន៍ថា “ នឹងមានមនុស្សប្រហែល១.០០០នាក់ មកពីសហជីពចំនួន៨ និងសមាគមផ្សេងទៀត ដើម្បីបង្ហាញការគាំទ្ររបស់ខ្លួន និងដើម្បីចាំមើលសាលក្រមរបស់តុលាការ។ នេះជាលើកដំបូងហើយដែលយើងអាចបង្ហាញស្មារតីគាំទ្ររបស់យើង ចាប់តាំងពីពួកគាត់ត្រូវបានចាប់ខ្លួនមក”។
យោងតាមលោក សុខ ឈុនអឿន ដែលឈរជាប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធជំនួសឲ្យប្រធានរបស់ខ្លួន គឺលោក វន់ ពៅ ដែលកំពុងជាប់ឃុំនៅមណ្ឌលអប់រំកែប្រែទី៣ក្បែរព្រំដែនវៀតណាម បានឲ្យដឹងថា អ្នកគាំទ្រដែលនឹងមានចំនួនយ៉ាងច្រើននេះ អាចជាអ្នករត់ម៉ូតូឌុប និងអ្នករត់រឺុម៉កម៉ូតូកង់បី។
លោក ឈុនអឿន បានថ្លែងថា “យើងមានអ្នករត់ម៉ូតូឌុប និងអ្នករត់រុឺម៉កម៉ូតូកង់បីប្រហែល៥០០នាក់ ដែលនឹងមកបង្ហាញការគាំទ្រនៅតុលាការ”។ ប៉ុន្តែលោកបានបន្ថែមថា លោក មានសង្ឃឹមតិចណាស់ ដែលថា អ្នកទាំង២៣នាក់នោះនឹងត្រូវដោះលែង។
លោក ឈុនអឿន បានមានប្រសាសន៍បន្តថា “ មនុស្សទាំង២៣នាក់នោះត្រូវបានយកធ្វើជាចំណាប់ខ្មាំង ជាថ្នូរដោះដូរនឹងការជាប់គាំងផ្នែកនយោបាយ ហេតុដូច្នេះតុលាការនឹងមិនដោះលែងពួកគាត់ឡើយ”។
ខណៈដែលមនុស្សរាប់រយនាក់បានសន្យាមកជួបជុំគ្នានៅព្រឹកនេះ កម្មកររោងចក្រកាត់ដេរជាច្រើននៅក្នុងខណ្ឌមានជ័យ ជាទីដែលមនុស្សទាំង២៣នាក់ត្រូវបានចាប់ខ្លួន បាននិយាយកាលពីម្សិលមិញថា ពួកគាត់នឹងចូលធ្វើការជាធម្មតា ហើយមូលហេតុដែលជំរុញឲ្យពួកគាត់ធ្វើដូច្នេះ ប្រហែលជាមកពីការភ័យខ្លាច ការអស់សង្ឃឹមទាក់ទិននឹងសាលក្រម ឬក៏ប្រហែលមកពីកង្វះថវិកា ។
អ្នកស្រី ឌីណា អាយុ ៤៩ឆ្នាំបាននិយាយ ខណៈកំពុងទទួលទានស៊ុបក្រោមឆត្រនៅមុខរោងចក្រ យ៉ាកជីន ជារោងចក្រដែលអ្នកស្រីធ្វើការថា “យើងគិតថា តុលាការនឹងមិនដោះលែងពួកគាត់ឡើយ”។ មនុស្សចំនួន១០នាក់ក្នុងចំណោមមនុស្សទាំង២៣នាក់ ដែលរួមមានទាំងលោក វន់ ពៅ ផង ត្រូវបានចាប់ខ្លួននៅខាងក្រៅរោងចក្រដែលគ្រប់គ្រងដោយជនជាតិកូរ៉េ កាលពីថ្ងៃទី២ ខែមករា បន្ទាប់ពីកងរាជអាវុធហត្ថបានបង្ក្រាបការតវ៉ារួច។
អ្នកស្រី ឌីណា បាននិយាយបន្តថា “ខ្ញុំស្តាប់វិទ្យុអាស៊ីសេរីរាល់ថ្ងៃ។ ពួកគេបានរាយការណ៍ថា អង្គការក្រៅរដ្ឋាភិបាលទាំងក្នុងស្រុកនិងក្រៅស្រុក កំពុងអំពាវនាវឲ្យមានការដោះលែង [មនុស្សទាំង២៣នាក់] ប៉ុន្តែរដ្ឋាភិបាលកម្ពុជាមិនដែរខ្វល់ឡើយ”។
តេង ចាន់ធី បងស្រីរបស់ តេង ចាន់នី អាយុ២១ឆ្នាំ ដែលនឹងមកបង្ហាញការគាំទ្រនៅតុលាការក្នុងថ្ងៃនេះ បាននិយាយថា គាត់នឹងមកតុលាការ ដើម្បីមានឱកាសមើលឃើញមុខប្អូនប្រុសរបស់គាត់ជាលើកដំបូងចាប់តាំងពីខែមករាមក។
តេង ចាន់ធី បាននិយាយថា “ទាហានបានវាយដំកម្មករ ទាំងក្មេងទាំងចាស់ ដោយមិនខ្វល់ពីអ្វីឡើយ។ វាជាទង្វើសត្វតិរិច្ឆាន។ កម្មករមួយចំនួន មកពីរោងចក្ររបស់ខ្ញុំ [យ៉ាកជីន] នឹងទៅតុលាការ ហើយប្រសិនបើតុលាការមិនដោះលែងពួកគាត់ទេ យើងនឹងតវ៉ារហូតទាល់តែមានការដោះលែង”។
ដូចគ្នានេះដែរ ឌី វុឌ្ឍី អាយុ២៨ឆ្នាំ ជាកម្មករនៅរោងចក្រក្នុងសួនឧស្សាហកម្មកាណាឌីយ៉ា បាននិយាយថា គាត់ នឹងសុំច្បាប់ឈប់សម្រាកមួយថ្ងៃ ដើម្បីចូលរួមការតវ៉ានៅតាមផ្លូវ ខណៈមនុស្សទាំង២៣នាក់ កំពុងត្រូវបានតុលាការបើកសវនាការជំនុំជម្រះក្តី។ អ្នកផ្សេងៗទៀតដែលនៅក្នុងចំណោម មនុស្សទាំង២៣នេះ ត្រូវបានចាប់ខ្លួន នៅក្នុង ឬក្បែរសួនកាណាឌីយ៉ា កាលពីថ្ងៃទី៣ខែមករា នៅពេលមនុស្សយ៉ាងតិចចំនួនប្រាំនាក់បានបាត់បង់ជីវិត និងជាង៤០នាក់ផ្សេងទៀត រងរបួស ក្រោមកណ្តាប់ដៃរបស់កងរាជអាវុធហត្ថបន្ទាប់ពីភាពចលាចលបានផ្ទុះឡើង។
វុឌ្ឍី បានសួរថា “ការខូចខាតគឺចេញមកពីអាជ្ញាធរ។ ពួកគេបានបំផ្លាញបន្ទប់ជួលរបស់កម្មករ ហើយបានដេញកម្មករឲ្យចូលក្នុងបន្ទប់របស់ខ្លួន រួចវាយដំពួកគេ។ ហេតុអ្វីបានជាកម្មករត្រូវបានចោទប្រកាន់ពីបទបំផ្លាញទ្រព្យសម្បត្តិទៅវិញ?”។
គាត់បាននិយាយបន្ថែមថា “ ពួកគេបានសម្លាប់យើងដូចឆ្កែនៅតាមផ្លូវ ហើយពួក គេបានបោះសពចូលក្នុងរថយន្តដូចឆ្កែដែរ”។ គាត់បានបន្ថែមថា នឹងមានការតវ៉ា ដើម្បីទាមទារឲ្យមានការដោះលែងមនុស្សទាំង២៣នាក់ ប្រសិនបើតុលាការសម្រេចមិនដោះលែងពួកគាត់នៅថ្ងៃនេះ។
កាលពីថ្ងៃទី១៤ខែមករា លោក សម រង្ស៊ី និងលោក កឹម សុខា មេដឹកនាំគណបក្សប្រឆាំងត្រូវបានតុលាការសាកសួរ ទាក់ទិននឹងការជាប់ពាក់ព័ន្ធរបស់ពួកគាត់ នៅក្នុងការតវ៉ា ដែលបណ្តាលឲ្យមនុស្សស្លាប់។ មានមនុស្សប្រហែល២.០០០នាក់បាននាំគ្នាមកតុលាការ ដើម្បីបង្ហាញការគាំទ្រចំពោះមេដឹកនាំទាំងពីរ។
ក្រុមរៀបចំសណ្តាប់ធ្នាប់ដែលមានពាក់មួកការពារសុវត្ថិភាពមួយក្រុមក៏បានបង្ហាញខ្លួនដែរនៅថ្ងៃនោះ ដោយមានការគាំទ្រពីរថយន្តទាហានចំនួន១៣គ្រឿង និងកងរាជអាវុធហត្ថរាប់រយនាក់ដែលឈរជើងនៅក្បែរពហុកីឡាដ្ឋានអូឡាំពិក។
ទោះបីជាកាលពីលើកមុនមានមនុស្សជាច្រើនហើយនៅក្នុងថ្ងៃនេះគេរំពឹងថា នឹងមានមនុស្សជាច្រើនទៀតនាំគ្នាទៅតុលាការក៏ដោយ ក៏លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានលើកឡើងកាលពីម្សិលមិញថា បើតាមគាត់ដឹង គឺគ្មានផែនការបង្កើនវត្តមានកងសន្តិសុខនៅក្បែរតុលាការឡើយ៕ ស៊ុយឈាង