កាលពីម្សិលមិញ អ្នកភូមិប្រហែល៤០នាក់បានដុតកង់ឡានដើម្បីតវ៉ានឹងការសម្រេចរបស់ពាណិជ្ជករមានទ្រព្យស្តុកស្តម្ភម្នាក់ក្នុងការសាងសង់របងបេតុងដល់កណ្តាលផ្លូវធំដ៏មមាញឹកក្នុងខណ្ឌមានជ័យ រាជធានីភ្នំពេញ។
ក្រុមអ្នកភូមិបានលើកឡើងថា ការសាងសង់របងលយចូលផ្លូវប្រវែង១,៥ម៉ែត្ររបស់លោកឧកញ៉ា ឃុន សៀ នេះគឺគ្រោះថ្នាក់ខ្លាំងណាស់ ព្រោះវាសល់តែ៣,៥ម៉ែត្រប៉ុណ្ណោះសម្រាប់រថយន្តបើកឆ្លងកាត់តាមមហាវិថីសម្តេចតេជោ ហ៊ុន សែន ដែលទើបស្ថាបនាថ្មីនេះ។
ជា ស៊ីថា តំណាងអ្នកភូមិបានសួរថា “អាជ្ញាធរសង្កាត់បានយល់ស្របឲ្យទុកផ្លូវនេះទទឹង៥ម៉ែត្រ ដូច្នេះហេតុអ្វីបានជាពួកគេអនុញ្ញាតឲ្យក្រុមហ៊ុននេះសាងសង់របងបេតុងលើផ្លូវរបស់អ្នកភូមិទៅវិញ?”។
អ្នកតវ៉ាឈ្មោះ តិច មុយ បានបន្ថែមថា “ផ្លូវនេះតូចណាស់ រថយន្តពន្លត់អគ្គិភ័យ និងរថយន្តសង្គ្រោះបន្ទាន់មិនអាចចូលតាមផ្លូវនេះបានទេ”។
អ្នកតវ៉ាទាំង៤០នាក់និយាយថា ពួកគេនឹងដាក់ពាក្យបណ្តឹងទៅខុទ្ទកាល័យរបស់លោកនាយករដ្ឋមន្ត្រី ហ៊ុន សែន និងធ្វើការតវ៉ាម្តងទៀតនៅមុខភូមិគ្រឹះរបស់លោកនាយករដ្ឋមន្ត្រីអំពីរបងដែលលយចេញនេះ។
លោក យឹម លាង ដែលជាដៃគូជំនួញរបស់លោក ឃុន សៀ បានមានប្រសាសន៍ថា ដីដែលមានវិវាទនេះត្រួតស៊ីគ្នានឹងមហាវិថីសម្តេចតេជោ ហ៊ុន សែន ប៉ុន្តែជាកម្មសិទ្ធិរបស់លោក ឃុន សៀ យូរមកហើយមុនពេលផ្លូវនេះត្រូវបានពង្រីក។ លោកបានសួរអ្នកយកព័ត៌មានថា “ខ្ញុំចង់សួរលោកថា ប្រសិនបើនរណាម្នាក់សុំឲ្យអ្នកកាសែតកាត់ដីរបស់លោក តើលោកយល់ព្រមទេ?”។
លោក យឹម លាង ដែលក៏ជាមេបញ្ជាការកងអង្គរក្សលោក ជា ស៊ីម ប្រធានព្រឹទ្ធសភា និងជាកូនប្រុសរបស់លោកឧបនាយករដ្ឋមន្ត្រី យឹម ឆៃលី បានបង្វែរសំណួរបន្ថែមអំពីបញ្ហានេះទៅចៅសង្កាត់ចាក់អង្រែលើដែលលោកបានមានប្រសាសន៍ថា ជា “តំណាងរបស់ក្រុមហ៊ុន”។
លោក កែវ សាវឿន ចៅសង្កាត់នេះបានបញ្ជាក់ថា តួនាទីរបស់លោក គ្រាន់តែ“ សម្របសម្រួលរវាងភាគីទាំងពីរ” ដែលមានវិវាទប៉ុណ្ណោះ។ ប៉ុន្តែ លោកបានមានប្រសាសន៍ថា លោក ឃុន សៀ មានសិទ្ធិ ពីព្រោះលោកមានប័ណ្ណកម្មសិទ្ធិសម្រាប់តំបន់ដែលលោកបានសាងសង់របងនេះ។
លោកមានប្រសាសន៍សំដៅដល់លោក ឃុន សៀ ដែលទទួលបានងារជាឧកញ៉ាថា “ខ្ញុំបានសហការជាមួយតំណាងរបស់លោកឧកញ៉ា ឃុន សៀ ច្រើនលើកមកហើយដើម្បីពិភាក្សាអំពីផ្លូវនេះ ប៉ុន្តែលោកឧកញ៉ាឲ្យទុកផ្លូវនេះតែ៣,៥ម៉ែត្រប៉ុណ្ណោះ”។
លោក សាវឿន បន្ថែមថា មានតែគ្រួសារមួយចំនួនតូចប៉ុណ្ណោះដែលមិនសប្បាយចិត្តនឹងទទឹងផ្លូវនេះ។ លោកបានមានប្រសាសន៍ថា “ក្រុមអ្នកភូមិមិនដែលតវ៉ាទេពីមុនមក ប៉ុន្តែពួកគាត់បានចាប់ផ្តើមតវ៉ា នៅពេលលោកឧកញ៉ា បានសម្រេចសាងសង់របងបេតុងលើផ្លូវេនះតែប៉ុណ្ណោះ”៕សារុន