ក្រសួងសេដ្ឋកិច្ច និងហិរញ្ញវត្ថុបានណែនាំថា ថ្លៃចំណាយលើគយសម្រាប់សកម្មភាពនាំចេញអង្ករត្រូវបានដកចេញ ដើម្បីបង្កើនសមត្ថភាពវិស័យនាំចេញអង្ករ និងជំរុញឲ្យតួលេខនាំចេញដែលកំពុងធ្លាក់ចុះរើបឡើងវិញក្នុងល្បឿនមួយលឿន។
លិខិតមួយច្បាប់ដែលត្រូវបានផ្ញើជូនអគ្គនាយកដ្ឋានគយ និងរដ្ឋាករដោយមានហត្ថលេខារបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២ ខែមេសា បានបង្ហាញថា ថ្លៃចំណាយលើគយនឹងត្រូវបានលុបចោលចាប់ពីថ្ងៃទី១ ខែឧសភាតទៅ នេះបើយោងតាមលោក ប៊ូ ប៊ុនណារ៉ា ប្រធានផ្នែកទំនាក់ទំនងសាធារណៈនៅអគ្គនាយកដ្ឋានគយ និងរដ្ឋាករ។ លោកថ្លែងថា “យើងចង់បង្កើនបរិមាណនាំចេញអង្ករ ហើយគោលនយោបាយលើកលែងពន្ធគយនេះនឹងជួយជំរុញវិស័យឯកជន”។
លោក ហ៊ាន វណ្ណហន អគ្គនាយកដ្ឋានកសិកម្ម សង្ឃឹមថា សារាចរណែនាំរបស់រដ្ឋាភិបាលនឹងអាចជួយឲ្យសកម្មភាពនាំចេញអង្កររើបឡើងយ៉ាងឆាប់រហ័ស និងមានភាពរីកចម្រើនកាន់តែខ្លាំង បន្ទាប់ពីបរិមាណនាំចេញអង្ករបានធ្លាក់ចុះ១១ភាគរយ អំឡុងត្រីមាសដំបូងនៃឆ្នាំនេះ។
លោកបានមានប្រសាសន៍ថា “វាជាវិធីមួយសម្រាប់រដ្ឋាភិបាលក្នុងការផ្ដល់ការលើកទឹកចិត្តដើម្បីបង្កើនសមត្ថភាពប្រកួតប្រជែងរបស់ប្រទេសកម្ពុជា ពីព្រោះប្រទេសកម្ពុជានៅតែមិនមានបទពិសោធន៍ក្នុងផ្នែកនាំចេញអង្ករ”។ យោងតាមសហព័ន្ធអ្នកនាំចេញអង្ករកម្ពុជាបានឲ្យដឹងថា បរិមាណនាំចេញក្នុងត្រីមាសដំបូងបានធ្លាក់ចុះពី៩៥.២២៨តោនក្នុងឆ្នាំ២០១៣មក៨៤.៣៣០តោនក្នុងឆ្នាំនេះ។
ករណីធ្លាក់ចុះនេះកើតឡើងដោយសារតែតម្រូវការពីប្រទេសថៃបានធ្លាក់ចុះពី១៣.០០០តោនក្នុងឆ្នាំ២០១៣មក៣០០តោនក្នុងឆ្នាំនេះ ក្នុងពេលប្រទេសនេះមានបំណងលក់អង្ករបម្រុងដ៏ច្រើនរបស់ខ្លួនក្នុងតម្លៃទាបជាងតម្លៃទីផ្សារ បន្ទាប់ពីផែនការទិញអង្កររដ្ឋរបស់ខ្លួនទទួលបរាជ័យ។
លោក លឹម ប៊ុនហេង ប្រធានក្រុមហ៊ុនឡូរ៉ង់ គ្រុប ភីអិលស៊ី និងជាប្រធានសមាគមអ្នកនាំអង្ករចេញកម្ពុជា បានលើកឡើងថា សារាចរណែនាំនេះនឹងអនុញ្ញាតឲ្យក្រុមហ៊ុនរបស់លោកអាចសន្សំប្រាក់បានយ៉ាងតិច១៥ដុល្លារក្នុងមួយកុងតឺន័រ។
លោក ប៊ុនហេង លើកឡើងបន្ថែមទៀតថា ការផ្លាស់ប្ដូរគោលនយោបាយពន្ធនេះនឹងជួយឲ្យបរិមាណនាំចេញអង្កររបស់លោកកើនឡើង បន្ទាប់ពីសម្រេចបាន២៣.០០០តោនកាលពីឆ្នាំមុន។ លោកបានមានប្រសាសន៍បន្ថែមទៀតថា “ខ្ញុំមានផែនការបង្កើនបរិមាណនាំចេញអង្កររបស់ខ្ញុំ៥០ភាគរយធៀបនឹងឆ្នាំមុន”។
លោក ស្រី ចាន់ធី សេដ្ឋវិទូឯករាជ្យ បានលើកឡើងថា ទោះបីជាគោលនយោបាយដកពន្ធចេញនេះអាចផ្ដល់ភាពអំណោយផលដល់វិស័យនេះក៏ដោយ នៅតែមានភាពចាំបាច់ត្រូវផ្ដោតសំខាន់កាន់តែខ្លាំងទៅលើសមត្ថភាពកិនស្រូវ និងគុណភាព ដើម្បីធានាថា អង្ករកម្ពុជាអាចឆ្លើយតបទៅនឹងស្តង់ដារអន្តរជាតិបាន។
លោកមានប្រសាសន៍ថា “គោលនយោបាយលើកលែងពន្ធនេះនឹងជួយបង្កើនល្បឿនដំណើរការនាំចេញអង្ករ ហើយអ្នកនាំអង្ករចេញនឹងមានលទ្ធភាពលក់អង្កបានកាន់តែច្រើន ហើយធ្វើឲ្យតម្លៃមានកម្លាំងប្រកួតប្រជែងកាន់តែខ្លាំងនៅលើទីផ្សារអន្តរជាតិ”។ លោកបានមានប្រសាសន៍បន្ថែមថា “ក៏ប៉ុន្តែអ្នកនាំអង្ករចេញក៏ត្រូវពង្រឹងសមត្ថភាពរបស់ខ្លួនក្នុងការកែច្នៃស្រូវ និងការរក្សារទុកសម្រាប់នាំចេញផងដែរ៕សុធា