កម្មកររោងចក្រកាត់ដេរចំនួនយ៉ាងតិច១០.០០០នាក់នៅក្នុងខេត្តស្វាយរៀងបានបន្តកូដកម្មរបស់ខ្លួនដើម្បីទាមទារប្រាក់ឧបត្ថម្ភបន្ថែមកាលពីម្សិលមិញ បន្ទាប់ពីថ្ងៃឈប់សម្រាកចុងសប្តាហ៍ ប៉ុន្តែមានសញ្ញាតិចតួចណាស់ដែលបញ្ជាក់ថា រោងចក្រណានឹងធ្វើតាមការទាមទាររបស់ពួកគេ។
កូដកម្មនេះបានចាប់ផ្តើមនៅរោងចក្រមួយចំនួនតូចនៅក្រុងបាវិត បន្ទាប់ពីពិធីបុណ្យចូលឆ្នាំខ្មែរ ដែលពេលនោះកម្មកររោងចក្រកាត់ដេរខ្លះមានការច្រណែននឹងកម្មករនៅរោងចក្រផ្សេងទៀត ដែលត្រូវបានបើកប្រាក់ឧបត្ថម្ភមួយពេលចំនួន៥០ដុល្លារជាថ្នូរនឹងការយល់ព្រមមិនធ្វើក្ូដកម្ម អំឡុងពេលបីខែកន្លង។ បើទោះជារោងចក្រផ្សេងទៀតមិនបានព្រមព្រៀងដូចគ្នានេះមែន ប៉ុន្តែមានកម្មករកាន់តែច្រើនបានបន្តចូលរួមការតវ៉ាទាមទារប្រាក់ឧបត្ថម្ភចំនួន៥០ដុល្លារដែរ។
រោងចក្រមួយឈ្មោះថា Smart Tech បានឈប់ជំទាស់ជាមួយកម្មកររបស់ខ្លួនកាលពីថ្ងៃសៅរ៍។ លោក សុខ ខេមរា កម្មកររោងចក្រ Best Way ដែលបានចូលរួមការតវ៉ានេះកាល ពីម្សិលមិញបានឲ្យដឹងថា “យើងតវ៉ាដើម្បីទាមទារប្រាក់៥០ដុល្លារ ពីព្រោះកម្មករនៅរោងចក្រពីរទៀត យល់ព្រមមិនធ្វើកូដកម្ម ដោយសារតែទទួលបានប្រាក់នោះ”។
លោក លី ហុងស៊ីន ប្រធានតំបន់សេដ្ឋកិច្ចពិសេស តាយ សេង ស្ថិតក្នុងចំណោមតំបន់សេដ្ឋកិច្ចពិសេសពីរនៅបាវិតដែលបានជាប់ផុងក្នុងបញ្ហាកូដកម្មនេះ បានលើកឡើងថា កម្មករប្រហែល១០.០០០នាក់កំពុងតែធ្វើកូដកម្មនៅក្រៅរោងចក្រចំនួន២០ ក្នុងចំណោមរោងចក្រក្នុងតំបន់សេដ្ឋកិច្ចរបស់លោកកាលពីម្សិលមិញ។ ប៉ុន្តែលោកបានទទូចថា រោងចក្រនានាគ្មានបំណងផ្តល់ប្រាក់នេះទេ ពីព្រោះវាគ្រាន់តែលើកទឹកចិត្តកម្មករឲ្យស្នើសុំថែមទៀតប៉ុណ្ណោះ។
លោក ហុងស៊ីន បានមានប្រសាសន៍ថា “ការទាមទារប្រាក់ឧបត្ថម្ភចំនួន៥០ដុល្លាររបស់កម្មករគឺជារឿងមិនត្រឹមត្រូវទេ ព្រោះវាមិនមាននៅក្នុងច្បាប់ការងារទេ។ យើងនឹងមិនផ្តល់ប្រាក់ឧបត្ថម៥០ដុល្លារតាមការទាមទាររបស់កម្មករទេ ព្រោះពួកគេនឹងនៅ តែបន្តទាមទារដដែល ប្រសិនបើយើងយល់ព្រមផ្តល់ឲ្យ”។
លោក មុី ឡី ប្រធានរដ្ឋបាលរោងចក្រស៊ីកូ (Sheico) នៅតំបន់សេដ្ឋកិច្ចពិសេស ម៉ានហាតតាន់ ដែលជាកន្លែងកម្មករធ្វើកូដកម្មតាំងពីថ្ងៃសុក្រសប្តាហ៍មុន ក៏បានលើកឡើងផងដែរថា កម្មករនឹងមិនទទួលបានចម្លើយតបវិជ្ជមានទេ ហើយតំបន់សេដ្ឋកិច្ចពិសេសបានចេញនូវសេចក្តីប្រកាសកាលពីថ្ងៃសៅរ៍ ដើម្បីឲ្យកម្មករដឹងពីជំហររបស់ម្ចាស់រោងចក្រនេះ។ លោកបានមានប្រសាសន៍ថា “យើងមិនអាចផ្តល់ប្រាក់នេះដល់កម្មករបានទេ ពីព្រោះការទាមទាររបស់ពួកគេមិនស្របតាមច្បាប់ការងារទេ”។
កាលពីថ្ងៃសុក្រសប្តាហ៍មុន សមាគមរោងចក្រកាត់ដេរនៅកម្ពុជា បានចេញសេចក្តីប្រកាសមួយ ដែលមិនមែនត្រឹមតែរិះគន់កម្មករធ្វើកូដកម្មដែលបានសម្លុតយកប្រាក់ពីរោងចក្រប៉ុណ្ណោះទេ ក៏ប៉ុន្តែថែមទាំងរិះគន់រដ្ឋាភិបាលដែលមិនបានធ្វើសកម្មភាពគ្រប់គ្រាន់ដើម្បីបញ្ចប់វិវាទនេះទៀតផង។
ស្ថាប័ននេះបានព្រមានថា កូដកម្មអាចនឹងនាំឲ្យមានអំពើហិង្សាកាន់តែច្រើន និងរីករាលដាលបន្ថែមទៀត ប្រសិនបើអាជ្ញាធរមិនបញ្ឈប់វានៅក្រុងបាវិតនោះ ដូចអ្វីដែលបានកើតឡើងកាលពីឆ្នាំមុន មុនពេលកូដកម្មកើតឡើងទូទាំងប្រទេស។
មន្ត្រីមន្ទីរការងារខេត្តមិនអាចទំនាក់ទំនងធ្វើអត្ថាធិប្បាយបានទេ។ ក៏ប៉ុន្តែ លោក កែវ គួង ស្នងការនគរបាលក្រុងបាវិត បានឲ្យដឹងថា ការបញ្ឈប់កូដកម្មអាស្រ័យទៅលើរោងចក្រ។ លោកបានមានប្រសាសន៍ថា “អាជ្ញាធរមិនមានផែនការបញ្ឈប់សកម្មភាពតវ៉ាទេ ពីព្រោះនេះគឺជាការសម្រេចចិត្តរបស់ក្រុមហ៊ុន។ ការទទួលខុសត្រូវរបស់ខ្ញុំគឺគ្រាន់តែផ្តល់សន្តិសុខប៉ុណ្ណោះ”។
កាលពីខែកុម្ភៈឆ្នាំ២០១២ លោក ឈូកបណ្ឌិត អតីតអភិបាលក្រុងបាវិត បានបាញ់ឲ្យកម្មការិនីរោងចក្របីនាក់ដែលបានចូលរួមតវ៉ានៅតំបន់សេដ្ឋកិច្ចពិសេសម៉ាន់ហាតតាន់រងរបួស។ លោកត្រូវបានរកឃើញថា មានទោសដោយប្រព្រឹត្តបទល្មើសកាលពីខែឧសភា ឆ្នាំ២០១៣ ប៉ុន្តែមិនដែលត្រូវបានចាប់ខ្លួនឡើយ។
កាលពីម្សិលមិញ លោក គួង បានកោះហៅតំណាងមូលដ្ឋានចំនួនពីរនាក់មកពីសហជីពរួបរួមចលនាកម្មករ ឲ្យទៅការិយាល័យរបស់លោកអ្នកកាលពីម្សិលមិញ ដើម្បីធ្វើការសាកសួរ។
ក៏ប៉ុន្តែ ស្នងការនគរបាលរូបនេះបានឲ្យដឹងថា លោកបានលើកពេលនៃការសាកសួរនេះទៅថ្ងៃស្អែកវិញ បន្ទាប់ពីតំណាងទាំងពីរនោះទៅដល់ទីនោះ ពីព្រោះលោកមានការរវល់។ លោកបានឲ្យដឹងថា លោក ពុធ វិចិត្រ និងលោក ជា ឧត្តម ត្រូវបានចោទប្រកាន់ពីបទបរិហារកេរ្តិ៍ ក៏ប៉ុន្តែបានបដិសេធមិនអត្ថាធិប្បាយលម្អិត។
លោក វិចិត្រ បានលើកឡើងដែរថា បទចោទប្រកាន់នេះកើតឡើងដោយសារតែលោកហៅមន្ត្រីរដ្ឋបាលនៅរោងចក្រមួយថា “ឆ្កែញី” នៅពេលមន្ត្រីរដ្ឋបាលរូបនោះប្រកែកគ្នាជាមួយកម្មករកាលពីថ្ងៃសៅរ៍។ លោកក៏បានទស្សន៍ទាយផងដែរថា ស្នងការនគរបាលបានកំណត់ពេលវេលាសម្រាប់ការសាកសួរឡើងវិញ ដោយសារតែកម្មកររោងចក្រដែលបានបញ្ឈប់សកម្មភាពតវ៉ាកាលពីព្រឹកម្សិលមិញ ទៅតវ៉ានៅមុខប៉ុស្តិ៍នគរបាលវិញ។
លោក ឆេង ឆ័ន អគ្គលេខាធិការសហជីពរួបរួមចលនាកម្មករ បានលើកឡើងទាក់ទងនឹងកូដករប្រហែល២.០០០នាក់បានដើរក្បួនចម្ងាយ១០គីឡូម៉ែត្រ ទៅកាន់ប៉ុស្តិ៍នគរបាល ដើម្បីតវ៉ាគាំទ្រលោក វិចិត្រ។ លោកបានប៉ាន់ស្មានថា កម្មករប្រហែល២.០០០នាក់បានចូលរួមធ្វើកូដកម្មកាលពីម្សិលមិញ ហើយពួកគេប្រហែលជាធ្វើបែបនេះទៀតនៅថ្ងៃនេះ៕ ប៊ុននី