សមាជិកគណបក្សប្រឆាំងពីររូបនៅក្នុងខេត្តបាត់ដំបង បានដាក់ពាក្យបណ្ដឹងទៅនគរបាល និងការិយាល័យសិទ្ធិមនុស្សរបស់អង្គការសហប្រជាជាតិ បន្ទាប់ពីទទួលការគំរាមធ្វើឃាត ដោយសារការខំប្រឹងប្រែងរបស់ពួកគេកាលពីថ្ងៃសៅរ៍ ដើម្បីបញ្ឈប់បុរសជនជាតិវៀតណាមបីនាក់ដែលកំពុងធ្វើសកម្មភាពជីករកកំណប់ក្រោមស្ពានមួយក្នុងក្រុងបាត់ដំបង។
កាលពីថ្ងៃច័ន្ទ អ្នកប្រើប្រាស់ហ្វេសប៊ុកម្នាក់ឈ្មោះ រិទ្ធី ផាច (Rithy Phach) បានគំរាមធ្វើឃាតសមាជិកគណបក្សសង្គ្រោះជាតិ ឈ្មោះ សួន ចំរើន និង ឈ្មោះ ចាន់ពៅរ៉ូហ្ស៊េត ដែលជាមន្ត្រីក្រុមប្រឹក្សាសង្កាត់អូរចារ។
ឈ្មោះ រិទ្ធី ផាច បានសរសេរនៅលើទំព័រហ្វេសប៊ុករបស់កញ្ញា ចាន់ពៅរ៉ូហ្ស៊េត ថា “អូនឯងកុំខ្លាំងពេក ប្រយ័ត្នក្បាលអូនឯងប្រហោង និងកន្លែងលក់ទឹកអំពៅក្រោមដើមចាន់គិរីនឹងខ្ទេចគ្មានកន្លែងលក់ទៀត ឈរមើលនឹងមានតែម៉ែឪជីដូនជីតាង៉ែងនឹងឯង”។
ជននេះក៏បានសរសេរសារគំរាមកំហែងស្រដៀងគ្នានេះដែរនៅលើទំព័រហ្វេសប៊ុករបស់លោក សួន ចំរើន។
ដំបូងឡើយលោកស្រី មូរ សុខហួរ ប្រធានកិច្ចការសាធារណៈនៅគណបក្សសង្គ្រោះជាតិ បានទៅរារាំងបុរសជនជាតិវៀតណាមទាំងនេះដែលកំពុងធ្វើសកម្មភាពជីករកកំណប់មាសអំឡុងពេលលោកស្រីធ្វើដំណើរកាត់តាមខេត្តនេះកាលពីថ្ងៃទី៤ ខែឧសភា។
លោក ជា ជីវ មន្ត្រីក្រុមប្រឹក្សាខេត្តបាត់ដំបងតំណាងគណបក្សសង្គ្រោះជាតិ បានមានប្រសាសន៍ថា ក្រោយមកសមាជិកគណបក្សសង្គ្រោះជាតិទាំងពីររូបនេះមានជម្លោះជាមួយលោក ចាន់ ម៉ាណៃ ប្រធានមន្ទីរសាធារណការ និងដឹកជញ្ជូនខេត្ត ដោយសារតែការជីករកកំណប់នេះ ដែលអាជ្ញាធរអះអាងថា គ្រាន់តែជាការជីកដីដើម្បីជួសជុលស្ពានប៉ុណ្ណោះ៕សុខុម