29 C
Phnom Penh

បុគ្គលិក​ក្រុមហ៊ុន​កាល់តិច​បន្ត​ធ្វើកូដកម្ម​ ដោយ​​​សារ​មិនទាន់​ទទួល​បាន​លទ្ធផល​

ដោយ ឌឹ ខេមបូឌា ដេលី

បទវិភាគ

មេដឹក​នាំសហជីព​ម្នាក់​បាន​លើក​ឡើង​ថា កូដ​កម្ម​នៅ​ស្ថានីយ​ប្រេង​ឥន្ធនៈ​កាល់តិចក្នុង​រាជ​ធានីភ្នំពេញ​នឹង​បន្ត​​​​ទៀត​​​នៅ​ថ្ងៃនេះ​ បន្ទាប់ពី​ការ​ចរចា​រយៈពេល​បីម៉ោង​រវាង​ក្រុម​ហ៊ុន​តំណាង​បុគ្គលិក​ និង​មន្ត្រី​រដ្ឋាភិបាល​កាលពីម្សិលមិញ មិន​បាន​ឈាន​ដល់​កិច្ច​ព្រមព្រៀង​។

កូដ​កម្ម​នៅ​ស្ថានីយ​ប្រេង​ឥន្ធនៈ​កាល់​តិច​នៅ​តែ​បន្ត​​ទោះ​បីមាន​ការ​ចរចា​រ​រវាង​ក្រុម​ហ៊ុន​ និង​តំ​ណាង​បុគ្គលិក​ ​កាលពី​ម្សិល​មិញ​ក៏​ដោយ។​ស៊ីវ​ ចាន់​ណា
កូដ​កម្ម​នៅ​ស្ថានីយ​ប្រេង​ឥន្ធនៈ​កាល់​តិច​នៅ​តែ​បន្ត​​ទោះ​បីមាន​ការ​ចរចា​រវាង​ក្រុម​ហ៊ុន​ និង​តំ​ណាង​បុគ្គលិក​ ​កាលពី​ម្សិល​មិញ​ក៏​ដោយ។​​​ ស៊ីវ​ ចាន់​ណា

លោក ស ម៉ូរ៉ា ប្រធាន​សហព័ន្ធ​​​សហជីព​​​កម្មករចំណីអាហារ និង​សេវា​កម្មកម្ពុជា​បានមាន​ប្រសាសន៍​ថា “បន្ទាប់ពីកិច្ច​ប្រជុំ​ យើង​នៅ​តែ​មិនមាន​លទ្ធផល​ច្បាស់​លាស់​ណាមួយ​សម្រាប់​បុគ្គលិក​ដដែល​​”។

បុគ្គលិក​ប្រមាណ​៣០០​នាក់​បាន​ធ្វើកូដកម្ម​កាលពីព្រឹក​ថ្ងៃច័ន្ទទាម​ទារ​ដំឡើង​ប្រាក់​ឈ្នួល​ដល់​១៦០​ដុល្លារ និង​ទាម​ទារ​​​អត្ថ​ប្រយោជន៍​ផ្សេងៗ​​​ទៀត រួមទាំង​ប្រាក់​ឧបត្ថម្ភ​ប្រចាំ​ឆ្នាំ​ដែលស្មើនឹង​ប្រាក់​ខែមួយ​ខែ។

យោងតាម​លោក ស ម៉ូរ៉ា បាន​ឲ្យ​ដឹង​ថា ក្រុម​ហ៊ុន​បាន​យល់ព្រម​ចំពោះ​ប្រាក់​ឧបត្ថម្ភ​នេះ​ដោយ​ចាប់​ផ្ដើម​នៅ​ខែមីនា ឆ្នាំ​២០១៥ ព្រមទាំង​ការ​ទាម​ទារ​មួយ​ចំនួន​ទៀត​ ប៉ុន្តែ​លោក​បាន​មាន​ប្រសាសន៍​ថា ក្រុមហ៊ុនត្រូវ​ការ​ពេល​វេលា​ដើម្បីពិភាក្សា​ពីការ​ដំឡើង​ប្រាក់​ឈ្នួល​ និង​សិក្សា ​ថាតើ​ក្រុម​ហ៊ុន​មាន​លទ្ធភាព​ឬអត់​។

បន្ទាប់ពី​ការ​ដំឡើង​ប្រាក់​ឈ្នួល​២០​ដុល្លារ​កាល​ពីខែ​មេសា ឥឡូវ​នេះ​បុគ្គលិក​ភាគ​ច្រើន​មាន​ប្រាក់​ឈ្នួល​១១០​ដុល្លារ​ក្នុង​មួយ​ខែ ប៉ុន្តែ​ពួកគេ​និង​សហជីព​​លើក​ឡើង​ថា ការ​ដំឡើង​ប្រាក់​ឈ្នួល​នេះ​មិន​​​សម​​​ស្រប​​​នឹង​​​អតិផរណា​ទេ។

លោក​ ស ម៉ូរ៉ា បានមាន​ប្រសាសន៍​ថា បុគ្គលិក​មិនជឿជាក់​លើ​ការ​អះអាង​របស់​ក្រុម​ហ៊ុនដែល​ថា ក្រុម​ហ៊ុន​ត្រូវការ​ពេល​វេលា​ដើម្បីសិក្សា​អំពីលទ្ធភាព​ដើម្បី​ដំឡើង​ប្រាក់​ឈ្នួល​ដល់​១៦០​ដុល្លារ​​​​នោះទេ។ លោក​បាន​មាន​ប្រសាសន៍​ថា “ក្រុម​ហ៊ុន​បាន​សិក្សាបញ្ហា​​នេះ​យូរ​ហើយក្នុង​ពេល​កន្លងមក ហើយ​ការ​ដំឡើង​ប្រាក់​ឈ្នួល​នេះនៅ​តែ​តិច​ជាង​អ្វី​ដែល​បុគ្គលិក​ទទួល​បាន​នៅ​តាម​ក្រុម​ហ៊ុន​ប្រកួត​ប្រជែង​នានា​ដដែល”។ នៅពេលបញ្ចប់​ការ​ចរចា​កាលពីម្សិលមិញ អ្នក​ចូលរួម​បាន​យល់​ព្រម​ជួប​ប្រជុំគ្នា​ម្តងទៀត​ក្នុង​រយៈពេល​មួយ​សប្ដាហ៍។

លោក យឿន រ៉េត តំណាង​បុគ្គលិក​បានមាន​ប្រសាសន៍​ថា លោក​ខក​ចិត្ត​នឹង​លទ្ធផល​នេះ។ លោក​បានមាន​ប្រសាសន៍​ថា “ការ​ទាម​ទារ​សំខាន់​របស់​យើង​គឺ​ប្រាក់​ឈ្នួល​១៦០​ដុល្លារ​ និង​ប្រាក់​ឧបត្ថម្ភ​ប្រចាំឆ្នាំ​ស្មើនឹង​ប្រាក់​ខែទី១៣​។ លោក​បាន​បន្ថែម​ថា ការ​ព្រម​ព្រៀង​របស់​ក្រុម​ហ៊ុន​កាល់តិច​ដំឡើង​ប្រាក់​ឈ្នួល​ដល់​បេឡាករ​ត្រឹម​តែ​១០​ដុល្លារ​នោះ មិន​អាច​ទទួល​យក​បានទេ។

បុគ្គលិក​ឈ្មោះ សេង តារាចោម បាន​និយាយ​ថា បុគ្គលិក​គ្មាន​បំណង​ឈប់​ធ្វើ​កូដកម្ម​ទេ នៅពេល​ក្រុម​ហ៊ុន​ធ្វើការ​សិក្សានោះ។ លោក​បាន​​និយាយ​ថា បុគ្គលិក​មិន​អាច​ទទួល​យក​បានទេ។ ក្រុម​ហ៊ុន​ត្រូវ​អនុញ្ញាត​ឲ្យ​ពួកយើង​ដឹង​មុន​ថា តើ​ពួកគេ​ដំឡើង​ប្រាក់​ឈ្នួល​ឲ្យ​យើង​ប៉ុន្មាន​”។

​ស្ត្រី​អ្នកនាំពាក្យ​ក្រុមហ៊ុន​ឈេហ្វរ៉ុន ដែល​កាន់កាប់​ក្រុម​ហ៊ុន​ប្រេង​ឥន្ធនៈ​កាល់តិច​ បាន​មាន​ប្រសាសន៍​ថា ក្រុម​ហ៊ុន​ខក​ចិត្ត​នឹង​លទ្ធផល​នៃការ​ពិភាក្សា​កាលពីម្សិលមិញ។

ថន ចាន់ល័ក្ខណ៍ បាន​និយាយ​ថា យើង​ខកចិត្ត​ណាស់​ដែល​សហជីព​បន្ត​ច្រាន​ចោល​សំណើរបស់​យើង​។ យើង​សង្ឃឹម​ថា បុគ្គលិក​នឹង​យល់ព្រម​ដោះស្រាយ​បញ្ហា​នេះដោយភាពរាក់ទាក់ ហើយឈប់ធ្វើកូដកម្ម​ខុស​ច្បាប់​ទៀត​”៕ សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស