លោកអភិបាលស្រុកកែវសីមា បានឲ្យដឹងថា កាលពីថ្ងៃព្រហស្បតិ៍ សាលាដំបូងខេត្តមណ្ឌលគិរី បានចេញដីកាចាប់ខ្លួនមន្ត្រីកងរាជអាវុធហត្ថម្នាក់ដែលដកកាំភ្លើងភ្ជង់ក្បាលអភិបាលស្រុកម្នាក់។
លោក ស៊ិន វ៉ាន់វុធ អភិបាលស្រុកកែវសីមា បានមានប្រសាសន៍ថា ចាប់តាំងពីលោកនិងអាជ្ញាធរផ្សេងទៀតបានឃាត់រថយន្តមួយគ្រឿងដែលផ្ទុកឈើប្រណីតរត់ពន្ធខុសច្បាប់នៅរំលងអធ្រាត្រឈានចូលថ្ងៃព្រហស្បតិ៍ លោកក៏បានទទួលការគំរាមកំហែងដល់ជីវិតពីលោក ស៊ូ ម៉ារិទ្ធ ដែលពេលនេះត្រូវបាននគរបាលតាមចាប់ខ្លួន។
លោក វ៉ាន់វុធ បានមានប្រសាសន៍ថា “គាត់បានគំរាមកំហែងខ្ញុំថា គាត់មិនឲ្យខ្ញុំរស់នៅបានសុខឡើយ”។ លោកបានបន្ថែមថា ” តុលាការបានចេញដីកាមួយ។ ប្រសិនបើរកឃើញគាត់ គាត់នឹងត្រូវចាប់ខ្លួន”។
ហេតុការណ៍នេះបានកើតឡើងបន្ទាប់ពីប្រតិបត្តិការចម្រុះមួយដោយនគរបាល កងរាជអាវុធហត្ថ និងមន្ត្រីខណ្ឌព្រៃឈើបានឃាត់រថយន្តម៉ាក Lexus មួយគ្រឿងដែលដឹកឈើនាងនួន ចំនួន១៦កំណាត់នៅលើផ្លូវជាតិលេខ៧៦ក្នុងស្រុកកែវសីមា។ ក្រុមមន្ត្រីបានដកយកសោរថយន្តនេះ ប៉ុន្តែរថយន្តទី២បានមកដល់កន្លែងកើតហេតុបន្ទាប់នោះ។
លោក ម៉ារិទ្ធ បានឈប់រថយន្តហើយដើរសំដៅទៅរកលោកអភិបាលស្រុក ទាញកាំភ្លើងភ្ជង់ក្បាលគាត់ និងទារយកសោដែលដកហូត។ មន្ត្រីផ្សេងទៀតស្ងាត់ស្ងៀម ហើយលោក ម៉ារិទ្ធ បានត្រឡប់ទៅកាន់រថយន្តរបស់ខ្លួនវិញ ហើយបើករថយន្តចេញពីកន្លែងកើតហេតុនោះ៕ ប៊ុននី