នគរបាលបាននិយាយកាលពីម្សិលមិញថា ពួកគេនឹងមិនធ្វើការចោទប្រកាន់លោក ឯក សុវណ្ណារ៉ា កូនប្រុសអតីតស្នងការនគរបាលខេត្តកណ្តាល ដែលកាលពីថ្ងៃទី១២ ខែមេសាបានបើករថយន្ត លុចសីុស បុកម៉ូតូមួយគ្រឿងជិះគ្នាបីនាក់ បណ្តាលឲ្យបុរសម្នាក់ស្លាប់ និងពីរនាក់ទៀតត្រូវកាត់ជើងឆ្វេងនោះទេ។
យោងតាមសមាជិកក្រុមគ្រួសារ ដែលបានលើកឡើងថា ដំបូងពួកគាត់ទាមទារសំណង៤.០០០ដុល្លារនោះបាននិយាយថា ក្រុមគ្រួសារលោក ដោក ម៉េង អាយុ២៨ឆ្នាំ ដែលបានស្លាប់នៅមន្ទីរពេទ្យបន្ទាប់ពីគ្រោះថ្នាក់នោះ ទទួលបានប្រាក់ចំនួន៤លានរៀលពីអ្នកបើកបរឲ្យលោក សុវណ្ណារ៉ា ។ បុរសទាំងពីរនាក់ដែលបានកាត់ជើងឆ្វេងទាំងពីរនាក់នោះទទួលបានសំណង២លានរៀល។
លោក នឿ សុខន អធិការរងនគរបាលស្រុកខ្សាច់កណ្តាល កន្លែងដែលគ្រោះថ្នាក់ចរាចរណ៍កើតឡើង បានមានប្រសាសន៍ថា “យើងមិនបានបញ្ជូនពាក្យបណ្តឹងទៅតុលាការទេ ពីព្រោះភាគីទាំងពីរបានដោះស្រាយបញ្ហានេះនៅការិយាល័យរបស់យើងកាលពីពីរសប្តាហ៍មុនរួចហើយ។
លោក សុខន បានមានប្រសាសន៍ថា លោក អ៊ាវ ចំរើន ស្នងការនគរបាលខេត្តបានទទួលយកអនុសាសន៍របស់លោក ម៉ែន សុឃឿន អធិការនគរបាលស្រុក ឲ្យលើកលែងការចោទប្រកាន់ករណីនេះ។
លោក សុវណ្ណារ៉ា ដែលជាមន្ត្រីនគរបាលដែរនិយាយថា លោកបានជួបជាមួយនគរបាលមូលដ្ឋានដើម្បីជម្រាបប្រាប់ពួកគាត់ថា លោកមិនជាប់ពាក់ព័ន្ធនឹងគ្រោះថ្នាក់ចរាចរណ៍នោះទេ ដោយលោកអះអាងថា នៅពេលកើតហេតុលោកមិននៅក្នុងរថយន្តនោះទេ។ លោកបាននិយាយថា “ខ្ញុំឮថា អ្នកបើកបររថយន្តបានដោះស្រាយបញ្ហាជាមួយក្រុមគ្រួសារជនរងគ្រោះរួចហើយ ហើយពួកគាត់យល់ព្រមបញ្ចប់បញ្ហានេះហើយ”។
លោក សុវណ្ណារ៉ា បាននិយាយថា ឥឡូវនេះលោកស្គាល់ឈ្មោះអ្នកបើកបររថយន្តនោះហើយ ពីព្រោះលោកជាមិត្តភក្តិផឹកសីុជាមួយគ្នា។ លោក សុវណ្ណារ៉ា បានមានប្រសាសន៍ថា “ខ្ញុំបានទៅការិយាល័យនគរបាលរួចហើយហើយបានប្រាប់ពួកគេថា ខ្ញុំមិនជាប់ពាក់ព័ន្ធក្នុងហេតុការណ៍នោះទេ ពីព្រោះខ្ញុំគ្រាន់តែទៅមើលហេតុការណ៍នោះតែប៉ុណ្ណោះ”។
លោក សុខន អធិការរងនគរបាលស្រុកបានមានប្រសាសន៍ថា លោកមិនចាំឈ្មោះអ្នកបើកបររថយន្តឲ្យលោក សុវណ្ណារ៉ា ទេ។
យោងតាមនគរបាលបានឲ្យដឹងថា លោក សុវណ្ណារ៉ា និងបុរសមួយក្រុមទៀតនៅកន្លែងកើតហេតុបានប្រាប់នគរបាលថា ពួកគេនឹង ” ជួយដោះស្រាយបញ្ហានេះ” បន្ទាប់ពីប៉ះកង់រថយន្ដដែលបែកដោយសារគ្រោះថ្នាក់នេះរួច។
យោងតាមមន្ត្រីនគរបាលម្នាក់ដែលបានលើកឡើងថា អ្នកបើកបររថយន្តបានព្យាយាមបើកបុកមន្ត្រីនគរបាលនៅពេលដែលបើករថយន្តចេញនោះបានឲ្យដឹងថា ប៉ុន្តែនៅពេលប៉ះកង់រថយន្តរួច លោក សុវណ្ណារ៉ា និងគូកនរបស់ខ្លួនបានឡើងជិះរថយន្ត ហើយបើកចេញយ៉ាងលឿន។
លោក សំ លាង ជាជីតារបស់ ដោក ម៉េង បាននិយាយថា គ្រួសាររបស់លោកគ្មានជម្រើសក្រៅពីទទួលយកប្រាក់១.០០០ដុល្លារដើម្បីធ្វើបុណ្យសពឡើយ។ លោកបាននិយាយថា “ខ្ញុំយល់ថា ទឹកប្រាក់៤លានរៀលនេះមិនគ្រប់គ្រាន់ដើម្បីទិញជីវិតមនុស្សបានទេ។ ប៉ុន្តែ ប្រសិនបើយើងនៅតែទាមទារ៤.០០០ដុល្លារនោះ យើងប្រាកដជាមិនទទួលបានអ្វីសោះឡើយ ពីព្រោះអ្នកបើកបររថយន្តនិយាយថា គាត់អាចឲ្យបានតែប៉ុណ្ណឹង”។
កាលពីខែសីហា ឆ្នាំ២០០២ លោក សុវណ្ណារ៉ា ត្រូវបានចាប់ខ្លួនពីបទបាញ់អង្គរក្សលោកនាយករដ្ឋមន្ត្រី ហ៊ុន សែន ម្នាក់ស្លាប់នៅផ្លូវដ៏មមាញឹកមួយក្នុងរាជធានីភ្នំពេញ បន្ទាប់ពីមានជម្លោះដោយសារស្រវឹងស្រា។ ក្រុមគ្រួសារជនរងគ្រោះទទួលបានសំណង៣.០០០ដុល្លារ៕ សារុន