ក្រុមមន្ត្រីនគរបាលខេត្តឧត្តរមានជ័យបានឲ្យដឹងថា បុរសជនជាតិខ្មែរម្នាក់ត្រូវបានទាហានថៃបាញ់បន្ទាប់ពីគាត់និងបុរសប្រាំពីរនាក់ទៀតបានឆ្លងព្រំដែនទៅកាប់ឈើខុសច្បាប់កាលពីរំលងអធ្រាត្រឈានចូលព្រឹកម្សិលមិញ។
យោងតាមលោក អឹុម សាន់ ប្រធានភូមិអូរឫស្សី ក្នុងឃុំកូនក្រៀល ស្រុកសំរោង ជាកន្លែងដែលបុរសទាំងនេះរស់នៅនោះបានឲ្យដឹងថា ថុន ធឿន អាយុ២៨ឆ្នាំ បានរងរបួសដោយគ្រាប់កាំភ្លើងត្រង់ភ្លៅខាងឆ្វេង។ លោក អឹុម សាន់ បានមានប្រសាសន៍ថា ” បុរសបីនាក់នៅភូមិនេះបានទៅជាមួយអ្នកភូមិដទៃទៀតរកកាប់ឈើប្រណីតក្នុងទឹកដីថៃកាលពីយប់មិញ”។
លោកបានមានប្រសាសន៍ទៀតថា ទាហានថៃបានបាញ់នៅម៉ោងប្រហែល៣និង៣០នាទីរំលងអធ្រាត្រ។ លោកបានបន្ថែមថា ថុន ធឿន កំពុងសម្រាកព្យាបាលរបួសនៅមន្ទីរពេទ្យបង្អែកខេត្តបាត់ដំបង ខណៈដែលអ្នកភូមិប្រាំពីរនាក់ទៀតកំពុងរត់គេចខ្លួននៅឡើយ។
លោក ម៉ៅ សំណាង នាយប៉ុស្ដិ៍ឃុំកូនក្រៀល បានមានប្រសាសន៍ថា “យើងបានទៅជួបអ្នកភូមិទាំងនោះដើម្បីស្វែងរកព័ត៌មានបន្ថែម ប៉ុន្តែពួកគាត់បានចាកចេញពីភូមិបាត់ទៅហើយ”។
លោកអនុសេនីយ៍ឯក ឡាំ សំរឿន ដែលល្បាតនៅតាមព្រំដែន បានមានប្រសាសន៍ថា ឥឡូវនេះក្រុមមន្ត្រីរបស់យើងកំពុងផ្ដោតលើការបង្ក្រាបការឆ្លងដែនខុសច្បាប់។ យោងតាមលោក ស្រី ណារ៉េន អ្នកសម្របសម្រួលអង្គការសិទ្ធិមនុស្សអាដហុកប្រចាំខេត្តនេះបានមានប្រសាសន៍ថា រហូតមកទល់ពេលនេះនាឆ្នាំនេះ បុរសប្រាំពីរនាក់ត្រូវទាហានថៃបាញ់សម្លាប់ បន្ទាប់ពីបានលួចឆ្លងព្រំដែន៕ សារុន