ក្រសួងទេសចរណ៍បានលើកឡើងអំឡុងកិច្ចប្រជុំមួយកាលពីម្សិលមិញថា ខណៈដែលវិស័យទេសចរណ៍ក្នុងប្រទេសថៃអន់ថយ ចំពេលមានស្ថានភាពចលាចលផ្នែកនយោបាយដែលធ្វើឲ្យចំនួនភ្ញៀវទេសចរចិនធ្លាក់ចុះយ៉ាងខ្លាំងនោះ កម្ពុជាត្រូវតែខិតខំប្រឹងប្រែងឲ្យខ្លាំងដើម្បីធ្វើឲ្យប្រាកដថា ការខិតខំប្រឹងប្រែងរបស់ខ្លួន ដើម្បីប្រែក្លាយប្រទេសនេះឲ្យទៅជាកន្លែងមានសុវត្ថិភាពសម្រាប់ភ្ញៀវទេសចរចិន មិនត្រូវបានរារាំង។
អំឡុងរយៈពេលបួនខែដើមឆ្នាំនេះ ទាំងនៅក្នុងប្រទេសថៃ និងប្រទេសកម្ពុជាមានការធ្លាក់ចុះខ្លាំងនូវចំនួនភ្ញៀវទេសចរមកពីប្រទេសចិន ដែលជាទីផ្សារដ៏ធំមួយសម្រាប់បណ្តាប្រទេសនៅអាស៊ីអាគ្នេយ៍ និងដែលជាចំណុចស្នូលនៃផែនការពង្រីកវិស័យទេសចរណ៍របស់រដ្ឋាភិបាលកម្ពុជា។
របាយការណ៍មួួយដែលក្រសួងទេសចរណ៍បានចេញផ្សាយកាលពីម្សិលមិញ បង្ហាញថា “ភ្ញៀវទេសចរចិន ដែលកាន់តែមានសារៈសំខាន់ខ្លាំងឡើងៗក្នុងរយៈពេលប៉ុន្មានឆ្នាំថ្មីៗនេះទំនងជានឹងធ្លាក់ចុះខ្លាំង”។
ខណៈដែលចំនួនភ្ញៀវទេសចរចិនមកទស្សនានៅប្រទេសកម្ពុជាបានបន្តកើនឡើងនៅឆ្នាំនេះ កំណើនយ៉ាងឆាប់រហ័សកាលពីឆ្នាំមុនបានធ្លាក់ចុះគួរឲ្យកត់សម្គាល់ ដោយចំនួនភ្ញៀវទេសចរចិននៅក្នុងរយៈពេលបួនខែដើមឆ្នាំនេះកើនឡើងតែ១៨,២ភាគរយប៉ុណ្ណោះ បើធៀបនឹង៥៥ភាគរយអំឡុងរយៈពេលដូចគ្នាកាលពីឆ្នាំ២០១៣។
កាលពីឆ្នាំមុនជនជាតិចិនដែលមកទស្សនាប្រទេសកម្ពុជាមានចំនួនត្រឹមតែជាង៤៦៣.០០០នាក់ប៉ុណ្ណោះ។ រដ្ឋាភិបាលបានដាក់ចេញផែនការប្រកបដោយមហិច្ឆតាដើម្បីទាក់ទាញភ្ញៀវទេសចរចិនឲ្យបានយ៉ាងហោចណាស់១,៣លាននាក់នៅត្រឹមឆ្នាំ២០១៨ ជាមួយនឹងការបង្កើនយុទ្ធនាការទីផ្សារ ការបង្កើនជើងហោះហើរផ្ទាល់ បូករួមមគ្គុទេសដ៍ទេសចរនិយាយភាសាចិន និងតំបន់ជនជាតិចិនរស់នៅដែលមានការទទួលស្គាល់ជាផ្លូវការនៅតាមទីក្រុងដែលមានភ្ញៀវទេសចរច្រើនផងដែរ។
ប៉ុន្តែ ជំនួសឲ្យការអស់សង្ឃឹមដោយសារតែស្ថានភាពនៅក្នុងប្រទេសថៃ ដែលចំនួនភ្ញៀវទេសចរអន្តរជាតិបានធ្លាក់ចុះចំនួន៦ភាគរយនៅឆ្នាំនេះ វិស័យសាធារណៈ និងឯកជន នៅក្នុងប្រទេសកម្ពុជាគួរតែប្រើប្រាស់ស្ថានភាពនេះដើម្បីពង្រឹងកេរ្តិ៍ឈ្មោះរបស់កម្ពុជានៅ ក្នុងទីផ្សារចិន ដែលជាទីផ្សារដ៏សំខាន់ នេះបើតាមប្រសាសន៍របស់លោក នឹប សាមុត អគ្គនាយកនៃអគ្គនាយកដ្ឋានទេសចរណ៍នៃក្រសួងទេសចរណ៍។
អំឡុងកិច្ចពិភាក្សាមួយដែលមានឈ្មោះថា “ស្ថានភាពចលាចលផ្នែកនយោបាយក្នុងប្រទេសជិតខាង៖ តើវាមានផលប៉ះពាល់អ្វីខ្លះដល់វិស័យទេសចរណ៍កម្ពុជា?” លោកបានមានប្រសាសន៍ថា “យើងគួរតែពង្រឹងកិច្ចសហការរបស់យើងជាមួយក្រុមហ៊ុនរៀបចំដំណើរទេសចរណ៍ចិន។ នេះគឺជាឱកាសសម្រាប់យើងបង្កើតកញ្ចប់ទេសចរណ៍គួរឲ្យទាក់ទាញ ដើម្បីទាក់ទាញប្រជាជនចិន”។
លោក នឹប សាមុត បានជំរុញឲ្យក្រុមហ៊ុនរៀបចំដំណើរទេសចរណ៍ និងក្រុមហ៊ុនអាកាសចរណ៍នានាខិតខំប្រឹងប្រែងរួមគ្នាបង្កើតទំនាក់ទំនងជាមួយបណ្តាក្រុមហ៊ុនក្នុងប្រទេសម៉ាឡេស៊ី និងសិង្ហបុរី ដើម្បី ផ្តល់ឱកាសឲ្យភ្ញៀវទេសចរអន្តរជាតិធ្វើដំណើរវាងប្រទេសថៃនៅពេលពួកគេមកកាន់តំបន់នេះ។
លោកបានមានប្រសាសន៍បន្ថែមទៀតថា ”យើងគួរតែពង្រឹងកិច្ចសហការជាមួយបណ្តាក្រុមហ៊ុនដឹកជញ្ជូនដែលយកតម្លៃទាប ហើយជំរុញឲ្យក្រុមហ៊ុនអាកាសចរណ៍នានាផ្តល់ជើងហោះហើរពិសេសដែលភ្ជាប់ប្រទេសកម្ពុជាផ្ទាល់ទៅកាន់ប្រទេសផ្សេងៗទៀត ដើម្បីឲ្យភ្ញៀវទេសចរមកកាន់ប្រទេសកម្ពុជាជាផ្នែកនៃកញ្ចប់ទេសចរណ៍។ ប្រសិនបើយើងអាចទាក់ទាញជើងហោះហើរប្រភេទនេះបាន វានឹងជួយដោះស្រាយវិបត្តិនាពេលអនាគត”។
លោក ខែក នរិនដា ប្រធានផ្នែកទំនាក់ទំនងនៅក្រុមហ៊ុនអាកាសយានដ្ឋានកម្ពុជា (CambodiaAirport) បានមានប្រសាសន៍ថា ការលុបជើងហោះហើរពីក្រុងបាងកក មកកាន់អាកាសយានដ្ឋានអន្តរជាតិភ្នំពេញ និងអាកាសយានដ្ឋានអន្តរជាតិសៀមរាប បានកើនឡើងចាប់តាំងពីខែមីនាមក ដោយគូសបញ្ជាក់ថា ទាំងក្រុមហ៊ុនបាងកក អ៊ែរវ៉ែ និងក្រុមហ៊ុន ខេមបូឌា អង្គរអ៊ែរ បានរាយការណ៍ថា “មានភ្ញៀវជិះតិច”។
លោក ធួន សីុណាន ប្រធានសមាគមទេសចរណ៍អាស៊ីប៉ាសីុហ្វិក ហៅកាត់ថា ប៉ាតា បានមានប្រសាសន៍ថា ទោះបីជាភ្ញៀវទេសចរចំនួន៣៥ភាគរយដែលមកទស្សនាកម្ពុជាឆ្លងកាត់តាមក្រុងបាងកកក្តី ក៏លោកមានសុទិដ្ឋិនិយមថា វាជារឿងងាយស្រួលក្នុងការជំរុញឲ្យភ្ញៀវទេសចរបង្វែរផ្លូវធ្វើដំណើររបស់ពួកគេ។ លោកមានប្រសាសន៍ទៀតថា “ភ្នាក់ងារទេសចរគួរតែឆក់យកឱកាសនេះបញ្ចុះបញ្ចូលដៃគូរបស់ខ្លួនឲ្យណែនាំភ្ញៀវរបស់ពួកគេឲ្យមកទស្សនាកម្ពុជា ឆ្លងកាត់តាមប្រទេសផ្សេងៗក្រៅពីប្រទេសថៃ”។
ប៉ុន្តែ លោក ចូណាថាន់ បន (JonathanBond) អ្នកគ្រប់គ្រងទូទៅផ្នែកលក់ និងផ្នែកទីផ្សារនៃក្រុមហ៊ុនអាកាសចរណ៍ CenterforAsia-Pacific Aviation ដែលមានមូលដ្ឋាននៅក្នុងទីក្រុងសីុដនី បានមានប្រសាសន៍ថា ការបញ្ចុះបញ្ចូលឲ្យភ្ញៀវទេសចរចៀសវាងប្រទេសថៃនៅពេលធ្វើដំណើរមកកាន់កម្ពុជានោះ គឺមានមហិច្ឆតាពេកហើយ។ លោកបានមានប្រសាសន៍បន្ថែមទៀតថា “បាងកក គឺជាចំណុចឆ្លងកាត់ដ៏សំខាន់ ដូច្នេះកុំអាលលុបវាចោលអី នៅពេលមានរឿងអាក្រក់កើតឡើង។ អ្នកត្រូវរង់ចាំមើលវាសិនថា តើផលប៉ះពាល់ជាអ្វី”៕ សុខុម