កាលពីម្សិលមិញ លោកនាយករដ្ឋមន្ត្រី ហ៊ុន សែន បានច្រានចោលការប៉ាន់ស្មានដែលថា កម្ពុជាអាចធ្វើជាទីកន្លែងសម្រាប់រដ្ឋាភិបាលនិរទេសខ្លួនដែលបង្កើតឡើងដោយកងកម្លាំងស្មោះត្រង់នឹងលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃដែលត្រូវបានបណ្ដេញចេញពីអំណាច។
នៅក្នុងសុន្ទរកថាដែលបានថ្លែងនៅឯកោះពេជ្រ ក្នុងពិធីចែកសញ្ញាបត្ររបស់សាកលវិទ្យាល័យភូមិន្ទភ្នំពេញ លោក ហ៊ុន សែន ក៏បានព្រមានលោក ថាក់ស៊ីន ដែលជាសម្ពន្ធមិត្តនិងមិត្តភក្ដិរយៈពេលយូររបស់លោកអំពីអស្ថិរភាពដែលអាចបង្កឡើងដោយការបង្កើតរដ្ឋាភិបាលនិរទេសខ្លួននេះ។
លោក ហ៊ុន សែន បានថ្លែងក្នុងពិធីនេះថា “ទី១ កម្ពុជាចាត់ទុកស្ថានភាពថៃជាបញ្ហាផ្ទៃក្នុងរបស់ថៃ ហើយកម្ពុជានឹងមិនជ្រៀតជ្រែក ហើយក៏មិនដែលបានជ្រៀតជ្រែកក្នុងបញ្ហាផ្ទៃក្នុងរបស់ថៃដែរ”។ លោកនាយករដ្ឋមន្ត្រីបានពន្យល់ប្រាប់ថា លោកកំពុងស្ថិតនៅក្នុងទីក្រុងសៀងហៃនៅពេលដែលយោធាថៃប្រកាសច្បាប់អាជ្ញាសឹកនៅម៉ោង៣ទៀបភ្លឺឈានចូលថ្ងៃអង្គារ ហើយបានទូរស័ព្ទណែនាំប្រាប់មកទីក្រុងភ្នំពេញវិញភ្លាមៗ។
លោកបានមានប្រសាសន៍ថា “នៅពេលមានរដ្ឋប្រហារ ខ្ញុំបានទាក់ទងលោក ស ខេង ហើយបានសុំឲ្យគាត់ចេញសេចក្ដីប្រកាសឲ្យកងកម្លាំងប្រដាប់អាវុធនៅតាមព្រំដែនរក្សាទំនាក់ទំនងធម្មតា និងកុំឲ្យដាក់ពង្រាយកងកម្លាំងប្រដាប់អាវុធ ដើម្បីចៀសវាងកុំឲ្យមានការយល់ច្រឡំណាមួយ”។ លោកបានបន្ថែមទៀតថា “ឥរិយាបថរបស់យើងគឺខំប្រឹងធ្វើការរក្សាទំនាក់ទំនងជាធម្មតាជាមួយថៃមិនថា មានរដ្ឋាភិបាលស៊ីវិលឬរដ្ឋាភិបាលយោធាឡើយ។
ឥឡូវនេះខ្ញុំឮថា ព្រះមហាក្សត្រថៃបានឡាយព្រះហត្តលេខាយល់ព្រមឲ្យយោធាដឹកនាំប្រទេស ដូច្នេះរឿងនេះចប់ហើយ ពីព្រោះព្រះមហាក្សត្រថៃបានយល់ព្រមឲ្យយោធាដឹកនាំប្រទេសហើយ”។ លោក ហ៊ុន សែន បានមានប្រសាសន៍ថា “ខ្ញុំសង្ឃឹមថា អតីតនាយករដ្ឋមន្ត្រី យីងឡាក់និងថាក់ស៊ីន យល់អំពីជំហររបស់កម្ពុជា ពីព្រោះឥឡូវនេះ យីងឡាក់ និង ថាក់ស៊ីនមិនមែនជានាយករដ្ឋមន្ត្រីដឹកនាំប្រទេសទេ”។
លោកស្រី យីងឡាក់ ស៊ីណាវ៉ាត្រា ប្អូនស្រីរបស់លោក ថាក់ស៊ីន ត្រូវបានបណ្ដេញចេញពីតួនាទីជានាយករដ្ឋមន្ត្រីកាលពីបីសប្ដាហ៍មុន នៅពេលមានសេចក្ដីសម្រេចពាក់ព័ន្ធនយោបាយពីតុលាការធម្មនុញ្ញរបស់ថៃ។ បន្ទាប់មកកាលពីថ្ងៃព្រហស្បតិ៍ យោធាថៃបានបណ្ដេញមន្ត្រីនៅសេសសល់របស់រដ្ឋាភិបាលលោកស្រី ហើយបានឡើងកាន់អំណាច។
លោក ថាក់ស៊ីន ត្រូវបានបណ្ដេញចេញពីតួនាទីជានាយករដ្ឋមន្ត្រីនៅក្នុងរដ្ឋប្រហារយោធាកាលពីឆ្នាំ២០០៦ ហើយបានភៀសខ្លួនទៅទីក្រុងឌូបៃ ដើម្បីគេចវេះពីការចោទប្រកាន់ពីបទពុករលួយ។
លោក ហ៊ុន សែន ដែលមានទំនាក់ទំនងផ្ទាល់ខ្លួនជិតស្និទ្ធជាច្រើនឆ្នាំជាមួយលោក ថាក់ស៊ីន ដែលលោកធ្លាប់បានចាត់ទុកថា ជាមិត្តអមតៈរបស់លោកនោះ បានសន្យាឲ្យអតីតមេដឹកនាំថៃរូបនេះ និងអ្នកគាំទ្រលោកចូលមកស្នាក់នៅក្នុងប្រទេសកម្ពុជាដោយសុវត្ថិភាព និងបានអនុញ្ញាតឲ្យលោក ថាក់ស៊ីន និងអ្នកគាំទ្រអាវក្រហមរបស់គាត់ជួបជុំគ្នានៅអង្គរវត្តកាលពីឆ្នាំ២០១២។
លោក ថាក់ស៊ីន បានប្រាប់អ្នកគាំទ្រនៅពេលនោះថា “នាយករដ្ឋមន្ត្រី ហ៊ុន សែន មានបេះដូងដែក ហើយវាមានសំណាងសម្រាប់ប្រទេសជិតខាង។ ប្រសិនបើលោកមិនមានបេះដូងដែកបែបនេះទេ យើងទាំងអស់គ្នាមិនអាចមកទីនេះបានទេ”។
មិត្តភាពនេះបាននាំឲ្យមានការប៉ាន់ស្មាននៅតាមប្រព័ន្ធផ្សព្វផ្សាយអន្តរជាតិកាលពីដើមសប្ដាហ៍នេះថា លោក ថាក់ស៊ីន អាចត្រូវបានអនុញ្ញាតឲ្យរៀបចំកម្លាំងនៅក្នុងប្រទេសកម្ពុជា។
លោក រ៉ូបឺត អ៊ែមស្ទើដាម មេធាវីអន្តរជាតិរបស់លោក ថាក់ស៊ីន ត្រូវបានវិទ្យុជាតិអូស្ត្រាលី អេប៊ីស៊ី ដកស្រង់សម្ដីកាលពីថ្ងៃអាទិត្យថា រដ្ឋាភិបាលដែលត្រូវបានបណ្ដេញចេញរបស់លោកស្រី យីងឡាក់ និងអ្នកគាំទ្រលោក ថាក់ស៊ីន កំពុងរៀបចំផែនការបង្កើតរដ្ឋាភិបាលនិរទេសខ្លួនមួយដើម្បីប្រឆាំងរដ្ឋាភិបាលយោធានេះ។ វិទ្យុ អេប៊ីស៊ី នេះបានប៉ាន់ស្មានដោយចំហថា កម្ពុជាអាចធ្វើជាទីតាំងរបស់រដ្ឋាភិបាលនិរទេសខ្លួន។
ទោះជាយ៉ាងណា នៅឯពិធីចែកសញ្ញាបត្រកាលពីម្សិលមិញនេះ លោក ហ៊ុន សែន បានច្រានចោលពាក្យចចាមអារ៉ាមដែលថា កងកម្លាំងរបស់លោក ថាក់ស៊ីន អាចត្រូវបានអនុញ្ញាតឲ្យរៀបចំនៅក្នុងប្រទេសកម្ពុជា។ ផ្ទុយទៅវិញលោកបានអំពាវនាវឲ្យពួកអាវក្រហមរង់ចាំរដ្ឋាភិបាលយោធានេះរៀបចំការបោះឆ្នោតថ្មីនៅក្នុងប្រទេសក្នុងរយៈពេលមួយឆ្នាំកន្លះ ឬពីរឆ្នាំទៀត”។
លោក ហ៊ុន សែន បានមានប្រសាសន៍ថា “ខ្ញុំសូមបញ្ជាក់ថា កម្ពុជាមិនមែនជាកន្លែងសម្រាប់ផ្ដល់ឲ្យប្រទេសណាមួយ ឬក្រុមណាមួយរបស់ថៃ ឬប្រទេសណាមួយបង្កើតរដ្ឋាភិបាលនិរទេសខ្លួនទេ ហើយរដ្ឋធម្មនុញ្ញកម្ពុជាមិនអនុញ្ញាតឲ្យកម្ពុជាធ្វើជាទីកន្លែងប្រឆាំងនឹងប្រទេសណាមួយដែរ”។
លោក ហ៊ុន សែន ក៏បានមានប្រសាសន៍ដែរថា រដ្ឋាភិបាលនិរទេសខ្លួនអាចធ្វើឲ្យលោកស្រី យីងឡាក់ លោក ថាក់ស៊ីន និងគណបក្សភឿថៃជួបហេតុការណ៍ណាមួយ ហើយបានស្នើឲ្យអ្នកទាំងពីរច្រានចោលការអះអាងជាសាធារណៈរបស់លោក អ៊ែមស្ទើដាម ។
មុនពេលប្រាប់ថា លោកសូមផ្ដល់យោបល់ក្នុងនាមជាអ្នកវិភាគនយោបាយ មិនមែនជានាយករដ្ឋមន្ត្រីកម្ពុជានោះ លោកបានមានប្រសាសន៍ថា “យោបល់នេះ ប្រសិនបើខ្ញុំជាលោក ថាក់ស៊ីន វិញ ខ្ញុំនឹងច្រានចោលឥឡូវនេះ។ ប្រសិនបើខ្ញុំជា យីងឡាក់ ខ្ញុំច្រានចោលវាភ្លាម ពីព្រោះវាជាយោបល់គ្រោះថ្នាក់ណាស់”។ លោកបានបន្ថែមទៀតថា “យោបល់នេះអាចធ្វើឲ្យ យីងឡាក់ និង ថាក់ស៊ីន ស្លាប់”។
លោកនាយករដ្ឋមន្ត្រីក៏បានអំពាវនាវឲ្យប្រជាជនកម្ពុជាដែលរស់នៅក្នុងប្រទេសថៃគោរពបទបញ្ជារបស់យោធាថៃ និងកុំចូលរួមនៅក្នុងសកម្មភាពណាមួយដែលគេចាត់ទុកថា ជាសកម្មភាពនយោបាយ ឬបះបោរ។ លោកបានមានប្រសាសន៍ថា “សូមកុំចូលរួមជាមួយក្រុមណាមួយដើម្បីប្រឆាំងក្រុមណាមួយទៀត”។
លោក ហ៊ុន សែន បានឡើងធ្វើជានាយករដ្ឋមន្ត្រីដំបូងក្រោមរបបសាធារណរដ្ឋប្រជាមានិតកម្ពុជា ដែលគាំទ្រដោយវៀតណាម ដែលបានតស៊ូប្រយុទ្ធចន្លោះពីទសវត្សរ៍ឆ្នាំ១៩៨០ ដល់ដើមទសវត្សរ៍ឆ្នាំ១៩៩០ជាមួយរដ្ឋាភិបាលនិរទេសខ្លួនរបស់កម្ពុជានៅតាមព្រំដែនថៃដែលបង្កើតឡើងដោយមនុស្សផ្សេងទៀតមកពីរបបនានាចន្លោះពីទសវត្សរ៍ឆ្នាំ១៩៦០ដល់ទសវត្សរ៍ឆ្នាំ១៩៧០។
កងកម្លាំងនិរទេសខ្លួនទាំងនោះមានការគាំទ្រពីថៃ អាមេរិក និងចិន ហើយជារឿយៗបានដកខ្លួនទៅក្នុងទឹកដីថៃដើម្បីទប់ទល់នឹងយោធាដ៏ខ្លាំងរបស់ប្រទេសនេះនៅពេលមានការវាយប្រហារពីកងកម្លាំងវៀតណាម និងសាធារណរដ្ឋប្រជាមានិតកម្ពុជា។
ក្រសួងការបរទេសក៏បានចេញសេចក្ដីប្រកាសព័ត៌មានមួយដែរកាលពីម្សិលមិញដើម្បីជូនដំណឹងដល់ប្រជាពលរដ្ឋខ្មែរដែលរស់នៅក្នុងប្រទេសថៃអំពីបម្រាមគោចរដែលយោធាថៃបានដាក់ពីម៉ោង១០យប់ដល់ម៉ោង៥ព្រឹក និងបានប្រកាសថា ស្ថានទូតកម្ពុជាប្រចាំទីក្រុងបាងកកបានបង្កើតខ្សែទូរស័ព្ទទាន់ហេតុការណ៍សម្រាប់អ្នកមានបញ្ហាបន្ទាន់”។
លោក កុយ គួង អ្នកនាំពាក្យក្រសួងការបរទេសបាននិយាយថា “មិនមានបញ្ហាទេប្រសិនបើប្រជាជនខ្មែររបស់យើងគោរពបទបញ្ជា និងច្បាប់របស់គេ៕ គឹមហឿន