កាលពីម្សិលមិញវិទ្យុសំឡេងប្រជាធិបតេយ្យ (វីអូឌី) បានដាក់ពាក្យបណ្ដឹងប្ដឹងលោក ប៉ា សុជាតិវង្ស អភិបាលរាជធានីភ្នំពេញ និងមន្ត្រីខណ្ឌដូនពេញពីររូបទៀត ពីបទវាយដំអ្នកយកព័ត៌មានរបស់ខ្លួនម្នាក់នៅជិតទីលានប្រជាធិបតេយ្យកាលពីថ្ងៃទី២ ខែឧសភា។
ពាក្យបណ្ដឹងនេះ គឺប្ដឹងលោក ប៉ា សុជាតិវង្ស ព្រមទាំងលោក សុខ សម្បត្តិ អភិបាលខណ្ឌដូនពេញ និងលោក សុខ ពេញវុធ អភិបាលរង ទាមទារឲ្យផ្តល់សំណងចំនួន៣០.០០០ដុល្លារដល់លោក ឡាយ សាមាន ដែលបានរងរបួសដោយសារស្នាដៃកម្លាំងសន្ដិសុខខណ្ឌដូនពេញ។របួសទាំងនោះរួមមានការបាក់ឆ្អឹងថ្ពាល់ ដែលត្រូវទៅព្យាបាលនៅមន្ទីរពេទ្យបំរុងរ៉ាដ ក្នុងទីក្រុងបាងកក។
លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យបានមានប្រសាសន៍កាលពីម្សិលមិញថា “ប្រទេសរបស់យើងមិនគួរជាឋានសួគ៌សម្រាប់ជនសង្ស័យទេ។ ខ្ញុំជឿថា កម្លាំងសន្ដិសុខស្ថិតក្រោមបញ្ជាសាលារាជធានី”។
លោក ឡុង ឌីម៉ង់ អ្នកនាំពាក្យសាលារាជធានីបានព្រមានថា វីអូឌី ត្រូវតែបង្ហាញភ័ស្តុតាងថា អភិបាលខណ្ឌ និងអភិបាលក្រុង ជាអ្នកទទួលខុសត្រូវចំពោះការធ្វើឲ្យលោកឡាយ សាមាន របួស។ លោក ឡុង ឌីម៉ង់ បានមានប្រសាសន៍ថា វាជាសិទ្ធិរបស់ពួកគេក្នុងការដាក់ពាក្យបណ្ដឹង ប៉ុន្តែប្រសិនបើតុលាការសាកសួរ ថាតើពួកគេមានភ័ស្ដុតាងគ្រប់គ្រាន់ដើម្បីបង្ហាញឬអត់នោះ ប្រហែលជាយើងនឹងត្រូវប្ដឹងបកពួកគេវិញ៕ សារុន