លោក កុយ គួង អ្នកនាំពាក្យក្រសួងការបរទេសបានលើកឡើងកាលពីម្សិលមិញថា ស្ត្រីខ្មែរពីរនាក់ដែលត្រូវបានជួញដូរទៅធ្វើការជាស្ត្រីបម្រើការតាមផ្ទះក្នុងប្រទេសម៉ាឡេស៊ីនោះ នឹងត្រូវបញ្ជូនមកប្រទេសកម្ពុជាវិញនៅថ្ងៃអង្គារបន្ទាប់ពីអាជ្ញាធរក្នុងប្រទេសម៉ាឡេស៊ីបានជួយសង្គ្រោះពួកគេពីការរំលោភបំពានរបស់និយោជក។
បើទោះជាព័ត៌មានលម្អិតស្តីពីការជួញដូរពួកគេនិងទំហំនៃការរំលោភបំពានមិនទាន់ដឹងក៏ដោយ ក៏លោក កុយ គួង បានមានប្រសាសន៍ថា ស្ត្រីទាំងពីរនាក់ឈ្មោះ សៀម ស្រីង៉ាម មកពីខេត្តកំពង់ចាម និង ឆយ រុនផែន មកពីខេត្តពោធិ៍សាត់ ត្រូវបានជួយសង្គ្រោះកាលពីសប្តាហ៍មុន ហើយត្រូវបានបញ្ជូនមកកាន់ស្ថានទូតកម្ពុជាប្រចាំទីក្រុងគូឡាឡាំពួ។ លោកបានមានប្រសាសន៍ថា “អាជ្ញាធរម៉ាឡេស៊ីបានជួយសង្គ្រោះពួកគេទាំងពីរនាក់ ហើយក្រោយមកត្រូវបានបញ្ជូនទៅឲ្យក្រុមមន្ត្រីកម្ពុជាប្រចាំប្រទេសម៉ាឡេស៊ី”។
លោកបានបន្ថែមថា អង្គការអន្តរជាតិទេសន្តរប្រវេសន៍នឹងជួយរៀបចំឲ្យស្ត្រីទាំងពីរនាក់នេះធ្វើដំណើរតាមយន្តហោះមកប្រទេសកម្ពុជាវិញ។ លោក កុយ គួង បានមានប្រសាសន៍ថា “ពួកគេនឹងត្រូវបញ្ជូនមកវិញនៅម៉ោង១០និង៣០នាទីព្រឹកថ្ងៃអង្គារ”។
លោកនាយករដ្ឋមន្ត្រី ហ៊ុន សែន បានចេញបម្រាមហាមមិនឲ្យបញ្ជូនស្ត្រីបម្រើការតាមផ្ទះទៅប្រទេសម៉ាឡេស៊ីកាលពីខែតុលា ឆ្នាំ២០១១បន្ទាប់ពីមានរបាយការណ៍កើនឡើងស្តីពីការរំលោភបំពានស្ត្រីបម្រើការតាមផ្ទះ និងការកេងប្រវ័ញ្ចនៅក្នុងក្រុមហ៊ុនជ្រើសរើសពលករ និងដោយស្នាដៃនិយោជករបស់ខ្លួន។ រដ្ឋាភិបាលកម្ពុជានិងម៉ាឡេស៊ីរំពឹងថា នឹងចុះហត្ថលេខា លើអនុស្សរណៈនៃការយោគយល់គ្នានៅខែនេះដោយអនុញ្ញាតឲ្យបញ្ជូនពួកគេត្រឡប់មកវិញ៕សារុន