លោក កែវ រ៉េមី រដ្ឋលេខាធិការទីស្តីការគណៈរដ្ឋមន្ត្រីបានមានប្រសាសន៍នៅសន្និសីទកាសែតកាលពីថ្ងៃសុក្រថា លោកចង់ឃើញមន្ត្រីនគរបាលជាស្ត្រីគ្រប់គ្រងអ្នកតវ៉ាជាស្ត្រីនៅពេលមានការធ្វើបាតុកម្មនាពេលអនាគត។
លោក កែវ រ៉េមី បានមានប្រសាសន៍ថា អ្នកតវ៉ាជាស្ត្រីបានប្រើប្រាស់រៀបធ្វើបាតុកម្មថ្មីៗក្រោមការណែនាំរបស់អង្គការមិនមែនរដ្ឋាភិបាល ដែលលោកមានប្រសាសន៍ថា បានពាក់ព័ន្ធនឹងការតវ៉ាទាំងនោះ។
លោក កែវ រ៉េមី បានមានប្រសាសន៍ថា “ឥឡូវនេះបាតុករមានរបៀបធ្វើបាតុកម្មច្រើនបែបច្រើនយ៉ាងណាស់ មនុស្សមួយចំនួនរត់ទៅឱបអាជ្ញាធរ ពេលធ្វើការតវ៉ាដោយប្រើដៃរុញច្រាននិងទះអាជ្ញាធរ ប៉ុន្តែនៅពេលអាជ្ញាធររុញច្រានវិញ អ្នកថតរូបថតពួកគេដើម្បីបង្ហាញថា អាជ្ញាធរប្រើអំពើហិង្សា”។
លោកបានមានប្រសាសន៍ថា “មនុស្សមួយចំនួនទៀតដោះសម្លៀកបំពាក់របស់ខ្លួន ដូច្នេះឥឡូវនេះយើងត្រូវតែមានអាជ្ញាធរជាស្ត្រីដើម្បីគ្រប់គ្រង ហើយកាន់ក្រមា ឬសារុងបាំងពួកគេ។ កម្លាំងសាលារាជធានីមាននគរបាលជាស្ត្រី…បុរសមិនអាចកាន់សារុង ឬសម្លៀកបំពាក់ទៅស្លៀកឲ្យអ្នកតវ៉ាទាំងនោះបានទេ ហើយមិនអាចប៉ះពាល់ស្បែករបស់ពួកគេបានដែរ”។
ប៉ុន្តែក្រសួងមហាផ្ទៃបានលើកឡើងថា មិនទាន់មានផែនការបែបនេះទេ។ លោក ឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍កាលពីម្សិលមិញថា មានតែមន្ត្រីនគរបាលជាបុរសក្នុងជួរនគរបាលសាលារាជធានីនិងនគរបាលបង្ក្រាបបាតុកម្មប៉ុណ្ណោះត្រូវប្រើប្រាស់ដើម្បីគ្រប់គ្រងបាតុកម្ម។ លោក ខៀវ សុភ័គ បានមានប្រសាសន៍ថា “យើងមិនមានមន្ត្រីជាស្ត្រីទេ។ នៅពេលនេះ យើងមិនប្រើនគរបាលជាស្ត្រីដើម្បីបង្ក្រាបបាតុកម្មឡើយ”។
លោក ជួន សុវណ្ណ ស្នងការនគរបាលរាជធានី មិនអាចទាក់ទងសុំការអត្ថាធិប្បាយបានទេ ហើយលោក ជួន ណារិន ជាស្នងការរងបានដាក់ទូរស័ព្ទចុះនៅពេលអ្នកយកព័ត៌មានសួរអំពីការលើកឡើងរបស់លោក កែវ រ៉េមី។
លោកស្រី ឆាយ គឹមហន តំណាងអ្នកតវ៉ាបញ្ហាវិវាទដីធ្លីនៅបុរីកីឡាបាននិយាយថា ជួនកាលបាតុករគ្មានជម្រើសក្រៅពីដោះសម្លៀកបំពាក់របស់ខ្លួនចេញឡើយ។ អ្នកស្រីបាននិយាយថា “ប្រសិនបើលោក កែវ រ៉េមី ឬក្រុមគ្រួសាររបស់លោកត្រូវបានបង្ខំឲ្យចាកចេញពីដីរបស់ខ្លួននោះ តើពួកគេនឹងធ្វើយ៉ាងណាវិញ?។ ប្រសិនបើគាត់ជួបបញ្ហាដូចពួកយើងវិញ គាត់នឹងដឹងពីការឈឺចាប់របស់យើង។
អ្នកស្រី ទេព វន្នី សកម្មជនមកពីសហគមន៍បឹងកក់បាននិយាយថា ជួនកាលការឈឺចាប់របស់សកម្មជនសិទ្ធិដីធ្លីអាចត្រូវបានធ្វើឡើងតាមវិធីបែបនេះ។ អ្នកស្រីបាននិយាយថា “យើងមិនមានជម្រើសផ្សេងឡើយ។ យើងបានត្រឹមតែស្រែកយំ ឬដោះសម្លៀកបំពាក់ចេញដើម្បីសម្តែងអំពីការឈឺចាប់របស់យើងចំពោះការបាត់បង់ដីរបស់ខ្លួនតែប៉ុណ្ណោះ”៕សារុន