ខេត្តប៉ៃលិន-មនុស្សប្រហែល២០០នាក់បានប្រមូលផ្តុំគ្នានៅមុខសាលាខេត្តប៉ៃលិនជាអតីតតំបន់ការពាររបស់ខ្មែរក្រហមកាលពីព្រឹកម្សិលមិញ ដើម្បីតវ៉ាចំពោះដំណើរទៅកាន់ទីនោះដោយលោក សម រង្ស៊ី និងលោក កឹម សុខា មេដឹកនាំគណបក្សប្រឆាំង ដែលត្រូវបានលុបចោលមួយថ្ងៃមុននេះ។
លោក សម រង្ស៊ី និងលោក កឹម សុខា បានលុបចោលដំណើររបស់លោកទាំងពីរទៅកាន់អតីតតំបន់ខ្មែរក្រហមកាលពីថ្ងៃអាទិត្យ បន្ទាប់ពីក្រុមមន្ត្រី និងបុរសស្លៀកពាក់ស៊ីវិលនៅក្នុងស្រុកអន្លង់វែងបានគំរាមបិទផ្លូវពួកគាត់ ហើយក្រុមមន្ត្រីក្រសួងមហាផ្ទៃបាននិយាយថា ពួកគេមិនអាចធានាសុវត្ថិភាពលោកទាំងពីរបានទេ។
លោកទាំងពីរបានត្រឡប់ដល់រាជធានីភ្នំពេញវិញ និងបានធ្វើសន្និសីទសារព័ត៌មានមួយកាលពីម្សិលមិញ ដោយថ្កោលទោសគណបក្សប្រជាជនកម្ពុជាគ្រប់គ្រងអំណាច ចំពោះការប្រើអតីតពួកឧទ្ទាមដែលមិនអាចគ្រប់គ្រងបានមកទប់ស្កាត់សកម្មភាពនយោបាយរបស់លោកទាំងពីរ។
នៅទីរួមខេត្តប៉ៃលិន ដែលត្រូវចំណាយពេលធ្វើដំណើរប្រហែលប្រាំមួយម៉ោងពីភាគនិរតីនៃតំបន់អន្លង់វែង និងដែលបានដួលរលំក្នុងឆ្នាំ១៩៩៦ អ្នកដែលចេញមកបាននិយាយថា ពួកគេទៅដល់ទីនោះដើម្បីប្រឆាំងការប្រមូលផ្តុំរបស់គណបក្សប្រឆាំង ដែលត្រូវបានលុបចោល។
កាន់បដាមានខ្លឹមសារថា”យើងដាច់ខាតមិនត្រូវការវត្តមានរបស់ សម រង្ស៊ី និង កឹម សុខានៅក្នុងទឹកដីប៉ៃលិនទេ” និងដើរចុះឡើងនៅលើសួនដែលថែទាំបានល្អនៅទល់មុខសាលាខេត្ត អ្នកខ្លះនិយាយថា លោក សម រង្ស៊ី “គួរឲ្យខ្ពើម” ចំណែកអ្នកខ្លះនិយាយថា ពួកគេធ្លាប់គាំទ្រលោក។
ឈ្មោះ ឈិន សុធា អាយុ៣១ឆ្នាំ ជាអ្នករៀបចំការតវ៉ា ដែលគាំទ្រលោកនាយករដ្ឋមន្ត្រីហ៊ុន សែន បាននិយាយថា ” វាជាការល្អ ប្រសិនបើគាត់មកនិយាយអ្វីធម្មតា។ ប៉ុន្តែប្រជាពលរដ្ឋនឹងប្រតិកម្ម ប្រសិនបើគាត់ប្រមាថអ្នកជួយពួកគេ ដោយហៅពួកគេថា ់អាខ្វាក់ ់ឬ ់ចោរលក់ទឹកដីឲ្យវៀតណាម ់”។
ស្ត្រីអ្នកតវ៉ាម្នាក់ទៀត ឈ្មោះ ជា ពៅ អាយុ៣៩ឆ្នាំ បាននិយាយថា អ្នកស្រីអស់ទំនុកចិត្តលើលោក សម រង្ស៊ី យូរមកហើយ។ អ្នកស្រីបានឲ្យដឹងថា “ខ្ញុំខកចិត្តនឹងគាត់យូរមកហើយ ពីព្រោះគាត់មិនដែលធ្វើអ្វីដូចដែលបានសន្យាទេ”។
អ្នកស្រី ជា ពៅ បានអះអាងថា លោក រង្ស៊ី មិនគោរពការសន្យាថា នឹងឲ្យក្របីពីរក្បាលនិងត្រាក់ទ័រមួយគ្រឿងដល់ភូមិរបស់អ្នកស្រី ជាថ្នូរនឹងសន្លឹកឆ្នោតរបស់ពួកគេក្នុងការបោះឆ្នោតឆ្នាំ១៩៩៨នោះទេ។ អ្នកស្រីបាននិយាយថា ”នោះជាមូលហេតុដែលគាត់ចាញ់ពីរអាណត្តិនៅទីនេះ ពីព្រោះគាត់និយាយកុហក”។
គណបក្សរបស់លោក សម រង្ស៊ី បានឈ្នះនៅក្នុងខេត្តប៉ៃលិនដែលមានតែមួយអាសនៈក្នុងការបោះឆ្នោតជ្រើសតាំងតំណាងរាស្ត្រកាលពីខែកក្កដាឆ្នាំ១៩៩៨ មិនយូរប៉ុន្មាន បន្ទាប់ពីលោក អៀង សារី អតីតរដ្ឋមន្ត្រីក្រសួងការបរទេសរបស់ខ្មែរក្រហមបានដឹកនាំតំបន់នោះចុះចូលគណបក្សប្រឆាំង។
ទោះជាយ៉ាងណា អតីតទាហានថ្មើរជើងរបស់ខ្មែរក្រហមម្នាក់ ដែលបានដឹកនាំការធ្វើយុទ្ធនាការឃោសនារបស់លោក សម រង្ស៊ី នៅក្នុងខេត្តនេះ ត្រូវបានបដិសេធមិនផ្តល់អាសនៈ ឲ្យទេ ដោយបែរជាផ្តល់ឲ្យ លោក ស៊៊ុន គឹមហ៊ុន អាណិកជនខ្មែររស់នៅអាមេរិក ដែលក្រោយមកបានចុះចូលជាមួយគណបក្ស ហ្វុ៊នស៊ីនប៉ិចទៅវិញ។
គណបក្សប្រជាជនកម្ពុជាគ្រប់គ្រងអំណាចបានឈ្នះរាល់ការបោះឆ្នោតជ្រើសតាំងតំណាងរាស្ត្រនៅក្នុងខេត្តនេះចាប់តាំងពីពេលនោះមក។ ក្នុងការបោះឆ្នោតកាលពីឆ្នាំមុន គណបក្សនេះទទួលបានសំឡេងឆ្នោត៦៤,៨ភាគរយ នៅក្នុងខេត្តប៉ៃលិន ដោយធ្វើឲ្យភរិយារបស់លោក អុី ឈាន អតីតអភិបាលខេត្ត ជាប់ជាតំណាងរាស្ត្រ។
អ្នករៀបចំការតវ៉ាម្នាក់នៅទីកន្លែងប្រមូលផ្តុំកាលពីម្សិលមិញ ដែលដំបូងប្រាប់ថាខ្លួនជាមន្ត្រីខេត្ត ប៉ុន្តែក្រោយមកបាននិយាយថា ខ្លួនគ្រាន់តែជាពលរដ្ឋម្នាក់ប៉ុណ្ណោះ បានដឹកនាំការតវ៉ារយៈពេលបីម៉ោងរហូតដល់ចប់នៅម៉ោងប្រហែល១០និង៣០នាទី បន្ទាប់ពីអ្នកយកព័ត៌មានម្នាក់បានជូនដំណឹងថា លោក សម រង្ស៊ី និង លោក កឹម សុខា ទើបតែលេចមុខជាសាធារណៈនៅក្នុងរាជធានីភ្នំពេញ។
បន្ទាប់ពីទទួលទូរស័ព្ទជាបន្តបន្ទាប់ បុរសដែលបដិសេធមិនប្រាប់ឈ្មោះរបស់ខ្លួននេះ បានឲ្យសញ្ញាទៅក្រុមមនុស្សទាំងនោះ បំបែកគ្នាតាមម៉ូតូ និងគោយន្ត។
តាមទូរស័ព្ទ លោក សម រង្ស៊ី បានបដិសេធចំពោះការអះអាងរបស់អ្នកស្រី ជា ពៅ ថា លោកមិនបានសន្យាអ្វីជាមួយអ្នកស្រី ជា ពៅ ដូចការអះអាងរបស់គាត់ឡើយ។
លោក សម រង្ស៊ី បានមានប្រសាសន៍ថា “យើងមិនដែលធ្វើការសន្យាបែបនោះទេ។ វាមិនមែនអាស្រ័យលើការសន្យាបែបនោះ ដែលធ្វើឲ្យយើងទទួលអាសនៈរបស់យើងក្នុងឆ្នាំ១៩៩៨នោះទេ។ វាអាស្រ័យលើសារសន្តិភាព។ ខ្ញុំមិនបាននិយាយអ្វីលើសពីនោះទេ”។
លោក សម រង្ស៊ី បានស្នើសុំឲ្យរដ្ឋាភិបាលធ្វើយ៉ាងណាធានាថា ខ្លួនអាចគ្រប់គ្រងទាហានសមាហរណកម្មខ្មែរក្រហមបាន ដើម្បីអនុញ្ញាតឲ្យគណបក្សប្រឆាំងរបស់លោកបានជួបអ្នកគាំទ្ររបស់ខ្លួននៅភាគពាយព្យនៅពេលអនាគត។
លោក កើត សុធា អភិបាលខេត្តប៉ៃលិន ដែលកាលពីខែមុនបានជំនួសតំណែងលោក អុី ឈាន ដែលជាអតីតប្រធានកងសន្តិសុខរបស់ ប៉ុល ពត បានមានប្រសាសន៍ថា លោក រង្ស៊ី និង លោក សុខា នឹងមានសុវត្ថិភាពកាលពីម្សិលមិញ។ លោកបានមានប្រសាសន៍ថា “តាមគោលការណ៍ យើងត្រូវជួយការពារសន្តិសុខរបស់ពួកគាត់ ពីព្រោះយើងយកចិត្តទុកដាក់អំពីស្ថានភាពនេះ …[ហើយ] ការប្រើពាក្យអសុរោះ បាននាំឲ្យមានប្រតិកម្មពីប្រជាពលរដ្ឋ”៕ ប៊ុននី