កាលពីម្សិលមិញ សន្តិសុខខណ្ឌជ្រោយចង្វាបានបញ្ឈប់អ្នកភូមិមិនឲ្យរារាំងក្រុមហ៊ុនឯកជនមួយដែលកំពុងបូមខ្សាច់ចាក់ទៅក្នុងតំបន់ដីសើមនៅក្រោយផ្ទះរបស់ខ្លួន។
ក្រុមហ៊ុនវិនិយោគកម្ពុជាក្រៅប្រទេស(OCIC) កំពុងបង្កើតគម្រោងអចលនទ្រព្យមានទឹកប្រាក់ចំនួន៣ពាន់លានដុល្លារ ដែលគេស្គាល់ថា” ក្រុងជ្រោយចង្វា ក្រុងនៃអនាគត” នៅលើតំបន់ដីសើមនេះ បន្ទាប់ពីទទួលបានកិច្ចសន្យាជួលរយៈពេល៩៩ឆ្នាំ ពីរដ្ឋាភិបាល។
អ្នកភូមិប្រហែល៤០នាក់ ដែលផ្ទះរបស់ពួកគាត់លយទៅក្នុងទន្លេសាប និងគ្មានសុវត្ថិភាព ដោយសារទឹកហូរបុកពីតំបន់ដីសើមត្រឡប់ចូលទៅក្នុងទន្លេវិញ បានព្យាយាមរឹបអូសយកម៉ាស៊ីនបូមទឹករបស់ក្រុមហ៊ុននេះ ពេលនោះសន្តិសុខធ្វើអន្តរាគមន៍។
លោក កឺក ឌីណា អាយុ៤៥ឆ្នាំ បានមានប្រសាសន៍ថា ” យើងបានព្យាយាមបញ្ឈប់ក្រុមហ៊ុននេះមិនឲ្យបូមខ្សាច់ច្រើនលើកហើយ”។ លោក ឌីណា បានចោទក្រុមហ៊ុននេះថាបានព្យាយាមធ្វើឲ្យជន់លិចអចលនទ្រព្យរបស់ពួកគាត់ដោយចេតនា។ លោកបានមានប្រសាសន៍ថា ” ពួកគេកំពុងព្យាយាមទន្ទ្រានយកដីរបស់ខ្ញុំ”។
អ្នកនាង មាំង និមល អាយុ២៥ឆ្នាំ ដែលផ្ទះរបស់គាត់លែងមានសុវត្ថិភាពរស់នៅ បានឲ្យដឹងថា នាងព្រួយបារម្ភថា ដីរបស់នាងនឹងត្រូវជន់លិចទាំងស្រុងឆាប់ៗនេះ។ អ្នកនាង និមល បាននិយាយថា “យើងបានស្នើឲ្យអាជ្ញាធរសង្កាត់និងខណ្ឌជួយច្រើនលើកហើយ ប៉ុន្តែពួកគេមិនដែលធ្វើអន្តរាគមន៍ទេ។ ជានិច្ចកាល ពួកគេការពារក្រុមហ៊ុន នៅពេលក្រុមហ៊ុនទន្ទ្រានយកដីរបស់ពួកយើង ដោយគ្មានការអនុញ្ញាតពីយើង”។
លោក មៀច សេរី នាយប៉ុស្តិ៍នគរបាលសង្កាត់ព្រែកលៀប បានបញ្ជាក់ថា សន្តិសុខខណ្ឌត្រូវបានបញ្ជូនទៅទីកន្លែងបូមខ្សាច់ ដើម្បីធានាការងាររបស់ក្រុមហ៊ុននេះបន្តដោយគ្មានការរំខាន។ លោក សេរី បានមានប្រសាសន៍ថា “សន្តិសុខខណ្ឌជាង១០នាក់បានទៅទីនោះ។ សន្តិសុខទាំងនោះត្រូវបានបញ្ជាឲ្យការពារម៉ាស៊ីននោះ”។ លោកបានបន្ថែមថា តំបន់នោះ មានជម្លោះយ៉ាងខ្លាំងរវាងក្រុមហ៊ុន OCIC និងអ្នកភូមិ ហើយថា សន្តិសុខក៏នៅទីនោះដែរ ដើម្បីទប់ស្កាត់អំពើហិង្សា។ លោក សេរី បានមានប្រសាសន៍ថា ” ជានិច្ចកាល ក្រុមហ៊ុននេះ បូមខ្សាច់ ដែលធ្វើឲ្យប៉ះពាល់ដីរបស់អ្នកភូមិ”។
លោក ណន អូនី មន្ត្រីផ្នែកច្បាប់នៃក្រុមការងារពិសេសសិទ្ធិលំនៅដ្ឋានបានមានប្រសាសន៍ថា ស្ថានភាពនៅសង្កាត់ព្រែកលៀប ធ្ងន់ធ្ងរណាស់។ លោក អូនី បានមានប្រសាសន៍ថា ” នេះជាការរំលោភសិទ្ធិលំនៅដ្ឋានធ្ងន់ធ្ងរ។ ក្រុមហ៊ុនមិនគិតថា តើធ្វើនេះនឹងប៉ះពាល់ដល់អ្នកស្រុកនៅក្នុងតំបន់នេះឡើយ”។
លោក ទូច សំណាង ប្រធានគម្រោងរបស់ក្រុមហ៊ុន OCIC បានបដិសេធមិនអត្ថាធិប្បាយអំពីស្ថានភាពនេះទេ។ លោកបានមានប្រសាសន៍ថា ” ខ្ញុំមិនអាចអត្ថាធិប្បាយបានទេ” ហើយលោកក៏បិទទូរស័ព្ទតែម្តង៕ប៊ុននី