នគរបាលបាននិយាយកាលពីម្សិលមិញថា ស្ត្រីជាអ្នករកស៊ីនៅខេត្តរតនគិរីម្នាក់ត្រូវបានចាប់ខ្លួនកាលពីថ្ងៃពុធ បន្ទាប់ពីគាត់បានចងបុគ្គលិកម្នាក់ដែលគាត់ចោទថា បានលួចលុយ ហើយបានបង្ខាំងនាងក្នុងបន្ទប់អស់រយៈពេលពីរថ្ងៃ។
យោងតាមលោកស្រី កែវ ដានី ស្នងការរងនគរបាលខេត្តបានឲ្យដឹងថា ជនសង្ស័យឈ្មោះ សុខ គន្ធា អាយុ៣៣ឆ្នាំត្រូវបានចាប់ខ្លួនបន្ទាប់ពីក្រុមគ្រួសារជនរងគ្រោះឈ្មោះ ម៉ាន់ ចិន្តា អាយុ២៣ឆ្នាំបានដាក់ពាក្យបណ្ដឹងទៅនគរបាល ដោយអះអាងថា ស្ត្រីវ័យក្មេងរូបនេះត្រូវបានថៅកែរបស់ខ្លួនបង្ខាំងដោយខុសច្បាប់។
អ្នកស្រី ចិន្តា បានធ្វើការនៅហាងមួយដែលបើកអាជីវកម្មថតចម្លងនិងសេវាកម្មផ្ទេរប្រាក់របស់ក្រុមហ៊ុនវីង ដែលអ្នកស្រី គន្ធា បានរត់ចេញពីផ្ទះរបស់គាត់នៅក្នុងសង្កាត់ឡាបានសៀក ក្រុងបានលុង។
នៅពេលនគរបាលមកដល់ផ្ទះនោះកាលពីថ្ងៃពុធ ពួកគេបានរកឃើញស្ត្រីឈ្មោះ ចិន្តា ត្រូវបានបង្ខាំងនៅក្នុងបន្ទប់។ នាងទំនងជាមិនត្រូវបានវាយដំ ឬបង្អត់អាហារនោះទេ ប៉ុន្តែត្រូវបានបង្ខាំងទុកនៅទីនោះតាំងពីថ្ងៃច័ន្ទមក។
នាងបានប្រាប់នគរបាលថា អ្នកស្រី គន្ធា បានចងជើងនាងនិងយកស្កុតបិទមាត់រហូតដល់នាងសារភាពថា បានលួចលុយ៥០.០០០ដុល្លារ ដែលបានបាត់ពីប្រតិបត្តិការវីងនោះ។ អ្នកស្រី ចិន្តា បាននិយាយថា ទីបំផុតគាត់បានប្រាប់អ្នកស្រី គន្ធា ថា គាត់បានលួចលុយ៥.០០០ដុល្លារដើម្បីឲ្យគេដោះលែងខ្លួន។
លោកស្រី ដានី បានមានប្រសាសន៍ថា ” ក្រុមគ្រួសារដឹងថា ជនរងគ្រោះត្រូវបានបង្ខាំងបន្ទាប់ពីពួកគាត់ទទួលបានការហៅទូរស័ព្ទពីជនរងគ្រោះនៅយប់ថ្ងៃទី១៦ ខែមិថុនា។ ស្ត្រីជាថៅកែបានអនុញ្ញាតឲ្យជនរងគ្រោះទូរស័ព្ទទៅក្រុមគ្រួសារ ពីព្រោះគាត់ចង់ឲ្យគ្រួសាររបស់នាងយកលុយដែលនាងបានលួចមកសងវិញ”។
លោក ប៊ុត ហេង នាយប៉ុស្តិ៍ឃុំបានមានប្រសាសន៍ថា អ្នកស្រី ចិន្តា ត្រូវបានបង្ខាំងទុកនៅក្នុងបន្ទប់ដេក ហើយមើលទៅមានទឹកមុខស្លេកស្លាំង និងភ័យខ្លាច”។ លោកបានមានប្រសាសន៍ថា ” ខ្ញុំបានឃើញ ចិន្តា ត្រូវគេបង្ខាំងនៅក្នុងបន្ទប់ដេក។ គេមិនអនុញ្ញាតឲ្យនាងចេញក្រៅឡើយ”។
យោងតាមលោកស្រី ដានី បានឲ្យដឹងថា អ្នកស្រី គន្ធា មិនព្រមសារភាពថា គាត់បានបង្ខាំងបុគ្គលិករបស់ខ្លួនដោយខុសច្បាប់ឡើយ ហើយបានអះអាងថា គាត់គ្រាន់តែឲ្យនាង “នៅក្នុងបន្ទប់រង់ចាំបណ្ដោះអាសន្ន” ទម្រាំក្រុមគ្រួសាររបស់នាងយកប្រាក់ចំនួន៥០.០០០ដុល្លារមកសងតែប៉ុណ្ណោះ ។ អ្នកស្រី ចិន្តា បដិសេធថា គាត់មិនបានលួចលុយនោះទេ។
លោក អេនថូនី ភើគីន (AnthonyPerkins) នាយកប្រតិបត្តិក្រុមហ៊ុនវីង បានមានប្រសា សន៍ថា លោកបានដឹងពីរឿងនេះ ប៉ុន្តែថា ហាងរបស់អ្នកស្រី គន្ធា មិនមែនជាកន្លែងផ្ទេរប្រាក់របស់ក្រុមហ៊ុនវីងទៀតទេចាប់តាំងពីខែមេសាមក។ លោកបានមានប្រសាសន៍ថា ” យើងសោកស្ដាយណាស់ដោយទទួលបានព័ត៌មាននេះ ប៉ុន្តែហាងនោះលែងជាកន្លែងផ្ទេរប្រាក់របស់ក្រុមហ៊ុនវីងទៀតហើយ។ មិន ថាលុយនោះ លួចយក ទៅធ្វើអ្វីទេ យើងមិនមានតម្រុយណាមួយឡើយ។ នៅថ្ងៃដែលពួកគេបិទហាង គឺគេបានបិទគណនេយ្យជាមួយយើងដែរ”។
ទោះជាយ៉ាងណា ទាំងលោកស្រី ដានី និងលោក ហេង បានអះអាងថា សេវាកម្មផ្ទេរប្រាក់នៅតែដំណើរការនៅផ្ទះរបស់អ្នកស្រី គន្ធា ដដែល។លោក ហេង បានមានប្រសាសន៍ថា ” ខ្ញុំឃើញក្រុមហ៊ុនវីងនៅតែបើកដំណើរការផ្ទេរប្រាក់នៅផ្ទះរបស់គាត់់ដដែល”៕ សារុន (រាយការណ៍បន្ថែមដោយ JoshuaWilwohl)