គម្រោងបង្ហោះបាឡុងដើម្បីទាក់ទាញចំណាប់អារម្មណ៍ទៅលើស្ថានភាពកុមារ ដែលមិនទទួលបានការអប់រំបានជួបបរាជ័យកាលពីថ្ងៃសុក្រ នៅពេលរថយន្តដឹកបាឡុងនោះត្រូវបានសន្តិសុខស្ទាក់បញ្ឈប់ ខណៈដែលរថយន្តនោះបរកាត់ឧទ្យានវត្តបុទុម។
រថយន្តដែលមានលោក អេនឌ្រូ ផាកឃឺ ជាអ្នកបើកនិងជាអ្នកបញ្ជាបាឡុងហោះនោះនិងបានផ្តួចផ្តើមគំនិតដាក់ចេញនូវគម្រោងបាឡុងហោះ ដើម្បីរៃអង្គាសប្រាក់ដោយសហការជាមួយអង្គការយូនីសេហ្វ បានបើករថយន្តនោះកាត់សួនឧទ្យាន ជាហេតុបណ្តាលឲ្យឥដ្ឋក្រាលនៅទីនោះរបូត។
បន្ទាប់ពីជួបប្រទះការឃាត់រថយន្តពីសំណាក់មន្ត្រីសន្តិសុខនៅសួនឧទ្យាននោះ នគរបាលក៏បានសាកសួរលោកផាកឃឺ អស់មួយរយៈពេលខ្លីមុនពេលយល់ព្រមឲ្យបង់ថ្លៃខូចខាត នេះបើយោងតាមលោក ឃួង ស្រេង អភិបាលរងសាលារាជធានីភ្នំពេញ។ លោក ឃួង ស្រេង បានមានប្រសាសន៍ថា “យើងបានឲ្យគាត់បង់ថ្លៃខូចខាត និងបានណែនាំគាត់ឲ្យបង្ហាញពីភាពមានសីលធម៌នៅក្នុងសង្គមយើង ហើយក៏បានអនុញ្ញាតឲ្យគាត់ចាកចេញទៅ”។
លោក ផាកឃឺ បានបង្ហាញបាឡុងនោះនៅតាមសាលារៀននានាក្នុងរាជធានីភ្នំពេញ និងនៅខេត្តសៀមរាបកាលពីសប្តាហ៍មុន ហើយមានបំណងបង្ហោះពីឧទ្យានវត្តបុទុម ទៅប្រទេសឡាវកាលពីថ្ងៃសុក្រ។
លោកនិងក្រុមការងារដែលមានសមាជិកពីរនាក់របស់លោកមានផែនការធ្វើដំណើរទូទាំងពិភពលោកដើម្បីរៃអង្គាសប្រាក់សម្រាប់អង្គការយូនីសេហ្វក្នុងរយៈពេលបួនឆ្នាំខាងមុខ ដោយមានប្រទេសឈីលីជាគោលដៅចុងក្រោយក្នុងឆ្នាំ២០១៧។
លោក មាស ប៊ុនលី មន្ត្រីជំនាញផ្នែកទំនាក់ទំនងអង្គការយូនីសេហ្វកម្ពុជាបានឲ្យដឹងថា លោក ផាកឃឺ មានអារម្មណ៍សោកស្តាយដែលបានបើករថយន្តចូលទៅក្នុងឧទ្យាននោះ ហើយបាឡុង ដែលកំពុងធ្វើដំណើរទៅកាន់ប្រទេសជាង១០០នោះនឹងត្រូវបានចាប់ផ្តើមហោះនៅកាលបរិច្ឆេទបន្ទាប់៕ ប៊ុននី