អង្គការសង្គមស៊ីវិលមួយក្រុមនឹងដាក់ញត្តិថ្វាយព្រះមហាក្សត្រ នរោត្តម សីហមុនី នៅថ្ងៃនេះ អំពាវនាវដល់ព្រះមហាក្សត្រកុំឲ្យឡាយព្រះហស្តលេខាលើច្បាប់ចំនួនបីស្ដីពីប្រព័ន្ធតុលាការ ដែលពួកគេលើកឡើងថា នឹងធ្វើឲ្យគណបក្សប្រជាជនកម្ពុជាមានការត្រួតត្រាកាន់តែខ្លាំងលើប្រព័ន្ធតុលាការ និងធ្វើឲ្យប៉ះពាល់ដល់សេរីភាពរបស់ប្រជាពលរដ្ឋ។
បើទោះជាមានការលើកឡើងនូវកង្វល់ពីសំណាក់អង្គការមិនមែនរដ្ឋាភិបាលទាំងក្នុងស្រុកនិងអន្តរជាតិក៏ដោយ ក៏ច្បាប់ស្ដីពីប្រព័ន្ធតុលាការនេះត្រូវបានអនុម័តដោយគ្មានការកែប្រែនៅក្នុងរដ្ឋសភាឯកបក្ស និងព្រឹទ្ធសភាក្នុងរយៈពេលពីរខែកន្លងមកនេះដែរ ហើយកាលពីពីរសប្ដាហ៍មុន ត្រូវបានក្រុមប្រឹក្សាធម្មនុញ្ញ ដែលមានសមាជិកសុទ្ធតែមកពីគណបក្សប្រជាជនកម្ពុជា ចាត់ទុកថា ស្របតាមរដ្ឋធម្មនុញ្ញ។មានតែព្រះហស្តលេខារបស់ព្រះមហាក្សត្រ សីហមុនី ប៉ុណ្ណោះទើបធ្វើឲ្យសេចក្តីព្រាងច្បាប់នេះក្លាយជាច្បាប់។
លោក សៀ ភារម្យ ប្រធានក្រុមការងារពិសេសសិទ្ធិលំនៅដ្ឋាន ជាអង្គការមិនមែនរដ្ឋាភិបាលមួយក្នុងចំណោមអង្គការមិនមែនរដ្ឋាភិបាលចំនួនប្រាំមួយ ដែលបានចូលរួមក្នុងការដាក់ញត្តិនៅថ្ងៃស្អែកបានមានប្រសាសន៍ថា បើទោះជាអង្គការទាំងនេះមិនរំពឹងថា ព្រះមហាក្សត្រនឹងយកព្រះទ័យទុកដាក់ចំពោះសំណើរបស់ខ្លួនក៏ដោយ ក៏ពួកគេសង្ឃឹមថា នឹងធ្វើការជំទាស់ជាសាធារណៈ មុនពេលច្បាប់នេះត្រូវបានផ្ដល់សច្ចានុមតិដែរ។
លោកបានមានប្រសាសន៍ថា ” ប្រសិនបើព្រះមហាក្សត្រនៅតែឡាយព្រះហស្តលេខាក្រោមសម្ពាធ ក៏យើងមិនអាចរារាំងព្រះអង្គមិនឲ្យឡាយព្រះហស្តលេខាបានដែរ ប៉ុន្តែយ៉ាងហោចណាស់ក៏យើងអាចបង្ហាញថា យើងបានលើកឡើងអំពីបញ្ហានេះប្រាប់សាធារណជនដែរ”។
លោក សៀ ភារម្យ បានប៉ាន់ប្រមាណថា មនុស្សពី៥០នាក់ទៅ៨០នាក់នឹងចូលរួមដាក់ញត្តិនៅព្រះបរមរាជវាំង។ លោកបានមានប្រសាសន៍ថា “យើងគិតថា អាជ្ញាធរនឹងរារាំងពួកយើង ប៉ុន្តែយើងគ្រាន់តែព្យាយាមដាក់ញត្តិថ្វាយព្រះមហាក្សត្រតែប៉ុណ្ណោះ”៕ សារុន