កាលពីម្សិលមិញ លោក ប៉ា សុជាតិវង្ស អភិបាលរាជធានី ភ្នំពេញបានរិះគន់ក្រុមហ៊ុនប្រមូលសំរាមស៊ីនទ្រី ចំពោះដំណើរការមិនល្អរបស់ក្រុមហ៊ុននេះក្នុងការ ប្រមូលសំរាមក្នុងក្រុង បន្ទាប់ពីកម្មករប្រមូលសំរាម បានធ្វើកូដកម្មកាលពីសប្តាហ៍មុនម្តងទៀតដោយ ធ្វើឲ្យសំរាមនៅពាសពេញផ្លូវ។
កម្មករ ប្រមូលសំរាមក្រុមហ៊ុន ស៊ីនទ្រី បានបញ្ចប់កូដកម្ម លើកទី២របស់ខ្លួននៅឆ្នាំនេះកាលពីថ្ងៃពុធ បន្ទាប់ ពីមានការព្រមព្រៀងចំពោះការដំឡើងប្រាក់ឈ្នួល១០ ដុល្លារក្នុងមួយខែ។ កូដកម្មនេះបានបញ្ចប់តែ ពីរថ្ងៃប៉ុណ្ណោះមុនព្រះរាជពិធីដង្ហែព្រះអដ្ឋិ ព្រះបរមរតនកោដ្ឋសម្តេចឪ នរោត្តម សីហនុ យកទៅ តម្កល់ ដោយធ្វើឲ្យសាលារាជធានីប្រមូលសន្តិសុខ ខណ្ឌរបស់ខ្លួនទៅជួយប្រមូលសំរាម។
នៅឯជំនួប ជាមួយអភិបាលខណ្ឌកាលពីម្សិលមិញ លោក ប៉ា សុជាតិវង្ស បាន បន្ទោសក្រុមហ៊ុននេះចំពោះការមិនទទួលខុសត្រូវ ចំពោះកង្វះខាតរបស់ខ្លួន ហើយមិនគោរពលក្ខខណ្ឌនៃ កិច្ចសន្យា ដែលបានផ្តល់សិទ្ធិផ្តាច់មុខដល់ការ ប្រមូលសំរាមនៅក្នុងរាជធានីភ្នំពេញ។
ទំព័រ ហ្វេសប៊ុករបស់សាលារាជធានីបានដកស្រង់សម្តីលោក ថា ” នៅពេលណាដែលមានបញ្ហា ក្រុមហ៊ុននេះមិនដែលទទួលខុសត្រូវទេ រួមទាំងនៅ ពេលដែលកម្មកររបស់ខ្លួនធ្វើកូដកម្មពីរលើកនៅ ឆ្នាំនេះ ហើយលោកបន្ថែមថា ក្រុមហ៊ុនមិនសមទទួលការងារនេះទេ ។
នេះមិនមែនជាលើកទី១ទេ ដែលលោក បា៉ សុជាតិវង្ស បានរិះគន់ក្រុមហ៊ុន ស៊ីនទ្រី ជា សាធារណៈ ចាប់តាំងពីលោកចូលមកកាន់តួនាទីកាល ពីឆ្នាំមុន ប៉ុន្តែ រហូតមកទល់ពេលនេះសកម្មភាព របស់លោកប្រឆាំងនឹងក្រុមហ៊ុនគ្រាន់តែជាការគំរាម ប៉ុណ្ណោះ។
កាលពីម្សិលមិញ លោក ឡុង ឌីម៉ង់ អ្នក នាំពាក្យសាលារាជធានីបានមានប្រសាសន៍ថា លោកអភិបាល បានបន្ទោសចំពោះសំរាមដែលធ្វើឲ្យស្ទះលូក្នុងរា ជាធានី ប៉ុន្តែជាទូទៅមានសំរាមគរដល់មាត់ទ្វារ ក្រុមហ៊ុន ស៊ីនទ្រី។ ប៉ុន្តែ លោកបានមានប្រសាសន៍ ថា លោកនឹងផ្តល់ឱកាសដល់ក្រុមហ៊ុននេះម្តងទៀត។
លោក បានមានប្រសាសន៍ថា ” យើងនឹងពិនិត្យមើលកិច្ចសន្យា រវាងសាលារាជធានីភ្នំពេញ និងក្រុមហ៊ុន ស៊ីនទ្រី ឡើង វិញម្តងទៀត ប្រសិនបើនៅតែបន្តបង្ហាញឲ្យឃើញ ថាក្រុមហ៊ុនមិនគោរពកិច្ចសន្យា”។
ក្រុមហ៊ុន ស៊ីន ទ្រី បានទទួលស្គាល់ថា ខ្លួនកំពុងមានការលំបាកក្នុងការ គ្រប់គ្រងបញ្ហាសំរាមក្នុងរាជធានី ប៉ុន្តែ បានលើកឡើង ថា ភាពចលាចលក្នុងសង្គម និងប្រជាពលរដ្ឋក្នុង រាជធានីដែលមិនទុកដាក់សំរាមឲ្យបានត្រឹមត្រូវ ក៏ត្រូវបន្ទោសផងដែរ។
លោក សេង ប៊ុនរិទ្ធ អ្នកគ្រប់ គ្រងជាន់ខ្ពស់នៅក្រុមហ៊ុន ស៊ីនទ្រី បានមានប្រសាសន៍ កាលពីម្សិលមិញថា ” យើងចង់ឲ្យរាជធានីស្អាត ដែរ ប៉ុន្តែ តើសាលារាជធានីយល់ថា វាពិបាកប៉ុណ្ណាទេ? តើពួកគេដឹងថា នៅពេលមានបាតុកម្ម ការតវា៉ ឬការស្ទះចរាចរណ៍វាធ្វើឲ្យយើងលំបាក ក្នុងការធ្វើការងាររបស់យើងទេ?”។
លោកបាន បន្ថែមថា ក្រុមហ៊ុន ស៊ីនទ្រី កំពុងជួបបញ្ហា ហិរញ្ញវត្ថុដោយការដំឡើងប្រាក់ខែកម្មករ ហើយក្រុមហ៊ុនបាន បន្ថែមរថយន្តដឹកសំរាមជាច្រើនគ្រឿងទៀត បើទោះ ជាតម្លៃប្រមូលសំរាមប្រចាំខែនៅដដែលក៏ដោយ។
លោក បានមានប្រសាសន៍ថា ជំនួសឲ្យការរិះគន់ ឬការបន្ទោស ក្រុមហ៊ុន សាលារាជធានីគួរអប់រំប្រជាពលរដ្ឋឲ្យ បោះចោលសំរាមឲ្យបានត្រឹមត្រូវផង ដើម្បីឲ្យ កម្មករងាយស្រួលក្នុងការប្រមូល”៕សារុន