អ្នកភូមិប្រហែល២០០នាក់មកពីស្រុកពញាឮបានតវ៉ានៅខាងក្រៅសាលាដំបូងខេត្តកណ្តាលកាលពីម្សិលមិញ អំឡុងពេលតុលាការសាកសួរតំណាងរបស់ខ្លួនពាក់ព័ន្ធនិងទំនាស់ដីធ្លីដែលអូសបន្លាយជាយូរមកហើយ។
តុលាការបានកោះហៅអ្នកភូមិ១២ នាក់កាលពីថ្ងៃទី៣០ខែមិថុនា បន្ទាប់ពីក្រុមហ៊ុនអភិវឌ្ឍន៍ផានអុីមុិចបានប្តឹងប្រជាជនជាច្រើនគ្រួសារ ដែលបានដឹកនាំការតវ៉ាប្រឆាំងក្រុមហ៊ុននេះ ថាបានរំលោភយកដី៦៣ហិកតារបស់អ្នកភូមិ១៨០គ្រួសារ ក្នុងភូមិចំនួនពីនៅឃុំពញាឮ។
លោក វង្ស ប៊ុនវិសុទ្ធ ព្រះរាជអាជ្ញារងអមសាលាដំបូងខេត្តបានមានប្រសាសន៍ថា តុលាការបានសាកសួរអ្នកភូមិបួននាក់កាលពីម្សិលមិញ ហើយនឹងសាកសួរប្រាំបីនាក់ទៀតនៅថ្ងៃព្រហស្បតិ៍។ លោកបានមានប្រសាសន៍ថា “យើងមិនបានចោទនរណាម្នាក់នៅឡើយទេ ពីព្រោះតុលាការនឹងបន្តសាកសួរអ្នកដែលពាក់ព័ន្ធក្នុងទំនាស់ដីធ្លីនេះនៅពេលពីរបីថ្ងៃបន្ទាប់ទៀត”។
លោក ឈឹម សុវណ្ណាវុធ អាយុ៤៩ឆ្នាំជាឧត្តមសេនីយ៍ទោនៅក្រសួងមហាផ្ទៃ និងលោក យុល គឹមសេង អាយុ៥៤ឆ្នាំត្រូវបានសាកសួររួមជាមួយ ធី ណារិន អាយុ៤៦ឆ្នាំ និង ស សូ អាយុ៥៦ឆ្នាំ។
លោក យូ ផាត់ មេឃុំពញាឮក៏ស្ថិតក្នុងចំណោមអ្នកភូមិ៨នាក់ដែលត្រូវបានគេសាកសួរផងដែរ។
អ្នកភូមិបានបដិសេធថា អ្នកភូមិមិនធ្លាប់បានលក់ដីនោះទៅឲ្យក្រុមហ៊ុននោះទេ ហើយបានធ្វើការតវ៉ាជាច្រើនលើកក្នុងពេលប៉ុន្មានខែថ្មីៗនេះ ដោយអំពាវនាវដល់អាជ្ញាធរឲ្យស៊ើបអង្កេត។
អ្នកភូមិជាង២០០នាក់បានបិទកំណាត់ផ្លូវជាតិលេខ៥ក្នុងតំបន់នោះកាលពីចុងខែមេសា ដោយបានដុតកង់ឡាន និងឈើ រំខានដល់ការធ្វើចរាចរណ៍។
អ្នកភូមិបានដាក់ញត្តិរួមជាមួយស្នាមមេដៃជាង៤០០ផងកាលពីថ្ងៃទី១ខែឧសភាទៅអាជ្ញាធរស្រុកឲ្យរកដំណោះស្រយចំពោះជម្លោះនេះ។
លោក លី លាង អាយុ៣៨ឆ្នាំជាអ្នកភូមិម្នាក់ដែលជាប់ពាក់ព័ន្ធក្នុងជម្លោះនេះ បាននិយាយថា ឥឡូវនេះក្រុមហ៊ុនចោទអ្នកភូមិថារំលោភយកដីរបស់ក្រុមហ៊ុនទៅវិញ។ “តុលាការបានសាកសួរអ្នកភូមិអំពីមូលហេតុបិទផ្លូវជាតិ ហើយនិងដកបង្គោលព្រំដីរបស់ក្រុមហ៊ុន”។
កាលពីឆ្នាំ២០០៧ ក្រុហ៊ុននេះទទួលបានដី២,៦ហិកតានៅបូរីកីឡា ក្រុងភ្នំពេញ ប៉ុន្តែមិនបានសង់អគារលំនៅដ្ឋានគ្រប់គ្រាន់ឲ្យសហគមន៍បូរីកីឡានោះទេ ជាហេតុធ្វើឲ្យមានការតវ៉ាជាច្រើនលើក និងការប្រឈមមុខគ្នារវាងអ្នកភូមិបុរីកីឡានិងសន្តិសុខក្រុមហ៊ុនហើយនិងនគរបាលដែលមានអំពើហិង្សាជាញឹកញាប់ ។មានិត