យោងតាមអាជ្ញាធរបានឲ្យដឹងថា ស្ត្រីអាយុ២៣ឆ្នាំម្នាក់ត្រូវគ្រាប់កាំភ្លើងត្រង់ស្មា ខណៈពេលកំពុងបំបៅដោះកូន អំឡុងការបាញ់តគ្នារវាងនគរបាល និងអ្នកដឹកឈើ ដែលព្យាយាមដឹកឈើគ្រញូងខុសច្បាប់កាត់តាមខេត្តក្រចេះកាលពីយប់ថ្ងៃព្រហស្បតិ៍។
លោក ជួង សៀងហាក់ ស្នងការនគរបាលខេត្តបានមានប្រសាសន៍ថា អ្នកបើកបររថយន្តម្នាក់ និងជនស្ស័យម្នាក់ត្រូវបានចាប់ខ្លួន ប៉ុន្តែ អ្នកបើកបររថយន្តទី២ម្នាក់ទៀត និងអ្នកបាញ់បានរត់គេចខ្លួន។
លោកបានមានប្រសាសន៍ថា ប្រហែលជាពាក់កណ្តាលអធ្រាត្រ នគរបាល កងរាជអាវុធហត្ថ និងមន្ត្រីរដ្ឋបាលព្រៃឈើមួយក្រុមបានឃាត់រថយន្តពីរគ្រឿង ដែលដឹកឈើគ្រញូងតាមផ្លូវជាតិលេខ៧ កាត់ស្រុកស្នួល។ លោកបានមានប្រសាសន៍ថា រថយន្តលុចស៊ីសពីរគ្រឿងបើកតាមពីក្រោយរថយន្តដឹកឈើនោះក៏ត្រូវបានឃាត់ផងដែរ ហើយបុរសមួយក្រុមបានចេញពីរថយន្តទាំពីរយ៉ាងលឿន ហើយបានបើកការបាញ់ប្រហារតែម្តង។
លោក សៀងហាក់ បានមានប្រសាសន៍ថា “ក្រុមជនល្មើសបានបាញ់ទៅលើអាជ្ញាធរដើម្បីរំដោះអ្នកបើកបររថយន្តដឹកឈើនោះដើម្បីកុំឲ្យពួកគេផ្តល់ភ័ស្តុតាង ប៉ុន្តែ អាជ្ញាធររបស់យើងបានបាញ់តដៃវិញ”។
លោកបានមានប្រសាសន៍ថា បើទោះណាជាគ្មានមន្ត្រីនគរបាល ឬជនសង្ស័យណាម្នាក់រងរបួសក៏ដោយ ក៏គ្រាប់កាំភ្លើងមួយគ្រាប់ ដែលគេមិនដឹងថា ជាគ្រាប់របស់ក្រុមណានោះបានទម្លុះជញ្ជាំងផ្ទះក្បែរនោះ ហើយបានត្រូវអ្នកស្រី ហៀល រី ត្រង់ស្មា។ លោកបានមានប្រសាសន៍ថា “គ្រាប់កាំភ្លើងបានត្រូវចំស្មាស្តាំរបស់អ្នកស្រី ខណៈដែលគាត់កំពុងបំបៅកូនខ្ចីអាយុពីរខែ។ អ្នកស្រីត្រូវបានបញ្ជូនទៅមន្ទីរពេទ្យបង្អែកស្រុកភ្លាមៗ”។
លោក ទី សុវិនថាល់ ព្រះរាជអាជ្ញាអមសាលាដំបូងខេត្តបានមានប្រសាសន៍ ថា ជនសង្ស័យដែលត្រូវចាប់ខ្លួន រួមមាន អ្នកបើកបររថយន្តដឹកឈើម្នាក់ឈ្មោះ ង៉ាន ម៉េងហុង អាយុ៣១ឆ្នាំ និងម្នាក់ទៀតគេគ្រាន់តែស្គាល់ថាឈ្មោះ ពៅ។
លោកបានមានប្រសាសន៍ថា ពួកគេទាំងពីរត្រូវបានចោទប្រកាន់ពីបទរក្សាទុក និងដឹកផលិតផលធ្វើពីឈើដោយគ្មានការអនុញ្ញាតតាមច្បាប់ព្រៃឈើរបស់កម្ពុជា។ បុរសឈ្មោះ ពៅ បើទោះជាមិនមែនជាខ្មាន់កាំភ្លើងក៏ដោយ ក៏ត្រូវបានចោទប្រកាន់ពីបទរារាំងការងាររបស់អាជ្ញាធរដែរ។
លោក សុវិនថាល់ បានមានប្រសាសន៍ថា ជនសង្ស័យទាំងពីរនាក់បានសារភាពចំពោះបទល្មើសរបស់ខ្លួន ហើយបានអះអាងថា ពួកគេពិតជាបានដឹកឈើទៅឲ្យឈ្មួញក្នុងមូលដ្ឋានឈ្មោះថា ធី ដែលអាជ្ញាធរធ្លាប់ស្គាល់ពីមុន។
លោក សុវិនថាល់ បានមានប្រសាសន៍ថា “ឥឡូវនេះយើងកំពុងសើុបអង្កេតករណីនេះ ពីព្រោះយើងទទួលបានព័ត៌មានមួយចំនួនពីអ្នករកស៊ីឈើ។ យើងនឹងចាប់ខ្លួនជននេះប្រសិនបើយើងរកឃើញថា ជននេះពិតជាជាប់ពាក់ព័ន្ធក្នុងករណីនេះមែននោះ”។
លោកបានមានប្រសាសន៍ថា ឈើធ្នង់ដែលរឹបអូសបានទាំងប្រាំបួនដុំ ដែលមួយដុំមានប្រវែងប្រហែល៣ម៉ែត្រ អាចលក់បានប្រហែល៦០.០០០ដុល្លារនៅលើទីផ្សារ ហើយកំពុងត្រូវបានរក្សាទុកនៅការិយាល័យរដ្ឋបាលព្រៃឈើមូលដ្ឋាន។
លោក សយ សារិទ្ធិ នាយខណ្ឌរដ្ឋបាលមូលដ្ឋានបានបញ្ជាក់ថា ឈើដែលរឹបអូសបាននេះត្រូវបានរក្សាទុកនៅការិយាល័យរបស់លោក ប៉ុន្តែ បានបដិសេធមិនធ្វើអត្ថាធិប្បាយបន្ថែមទេ។ ហេតុការណ៍នេះ គឺជាលើកទី៣ហើយក្នុងខែនេះ ដែលពាក់ព័ន្ធនឹងអាជ្ញាធរបាញ់អ្នកសង្ស័យដឹកឈើខុសច្បាប់។
ក្នុងខេត្តកំពង់ធំឯណោះវិញកាលពីពីរសប្តាហ៍មុន អ្នករកស៊ីដឹកឈើម្នាក់បានរត់គេចខ្លួនបន្ទាប់ពីនគរបាលបានបើករថយន្តដេញតាមចម្ងាយ៥គីឡូម៉ែត្រ ដោយបានទុករថយន្តរបស់ខ្លួនចោល ហើយបាញ់មកលើអាជ្ញាធរ មុនពេលរត់គេចតាមផ្លូវខ្វាត់ខ្វែងតូច។
កាលពីដើមខែនេះនៅក្នុងខេត្តមណ្ឌលគិរី មន្ត្រីនគរបាលជាតិម្នាក់បានបាញ់រថយន្តមួយគ្រឿងដែលសង្ស័យថា ដឹកឈើកាប់ខុសច្បាប់ បន្ទាប់ពីបានឃាត់មិនព្រមឈប់។ ការបាញ់នោះបានបណ្តាលឲ្យបុរសម្នាក់ស្លាប់ និងបុរសម្នាក់ទៀតរងរបួស តែរកមិនឃើញមានឈើក្នុងរថយន្តនោះទេ៕សារុន