អ្នកភូមិជាច្រើនអ្នកដែលមានជម្លោះដីធ្លីជាមួយក្រុមហ៊ុនកសិពាណិជ្ជនៅខេត្តក្រចេះ បានធ្វើដំណើរមកដល់វត្តសាមគ្គីរង្សី ក្រុងភ្នំពេញកាលពីម្សិលមិញ ខណៈដែលពួកគាត់បានប្រកាសថានឹងដើរហែទៅគេហដ្ឋានរបស់នាយករដ្ឋមន្ត្រី ហ៊ុន សែន ប្រសិនបើេជម្លោះដីធ្លីរបស់ពួកគាត់មិនត្រូវបានដោះស្រាយនៅត្រឹមថ្ងៃសុក្រទេនោះ។
យោងតាមតំណាងអ្នកភូមិបានឲ្យដឹងថា រថយន្តពីរគ្រឿងដឹកអ្នកភូមិប្រហែល៤០នាក់មកពីកន្លែងដីមានទំនាស់នៅស្រុកស្នូល បានមកដល់កាលពីព្រឹកម្សិលមិញ ជាសរុបមានអ្នកភូមិជិត២០០នាក់បានមកស្នាក់នៅក្នុងវត្តសាមគ្គីរង្សី ដើម្បីតវ៉ានៅក្នុងរាជធានី។ គេរំពឹងថា អ្នកភូមិ២០ ឬ ៣០នាក់ទៀតនឹងធ្វើដំណើរមកដល់នៅថ្ងៃនេះ។
អ្នកភូមិម្នាក់ឈ្មោះ ឌិន សារឿន អាយុ៣៩ឆ្នាំ បាននិយាយកាលពីម្សិលមិញថា “ចំនួនមនុស្សកំពុងកើនឡើង ពីព្រោះយើងទាមទារប័ណ្ណកម្មសិទ្ធិដី។ យើងប្រមូលគ្នា ពីព្រោះយើងដើរហែទៅផ្ទះរបស់លោកនាយករដ្ឋមន្ត្រី ហ៊ុន សែន ទាមទារឲ្យលោកជួយរកដំណោះស្រាយឲ្យពួកយើង”។
លោក សារឿន បាននិយាយថា តំណាងអ្នកភូមិនឹងប្រជុំជាមួយគណៈកម្មការវត្តនៅសប្តាហ៍នេះ ដើម្បីសម្រេចការរៀបចំតវ៉ាតាមការគ្រោងទុកឲ្យបានល្អ។
លោកបាននិយាយថា “បើទោះបីជាអាជ្ញាធរព្យាយាមរារាំងយើងមិនឲ្យហែក្បួនក៏ដោយ ក៏យើងនឹងមិនស្តាប់ទេ ហើយយើងនឹងហែ ព្រោះយើងត្រូវឲ្យលោក នាយករដ្ឋមន្ត្រី ហ៊ុន សែន ដឹងថាយើងកំពុងជួបបញ្ហាអ្វី”។
សន មីនា ជាតំណាងអ្នកភូមិម្នាក់ទៀតបាននិយាយថា អ្នកដែលស្នាក់នៅក្នុងវត្តសាមគ្គី រង្សី រួមទាំងអ្នកផ្សេងទៀតដែលស្នាក់នៅកន្លែងផ្សេងក្នុងរាជធានី អាចមានចំនួនប្រហែល៣០០នាក់នៅថ្ងៃសុក្រ នាំគ្នាតវ៉ាប្រសិនបើគេមិនប្រគល់ដីឲ្យអ្នកភូមិវិញទេនោះ។
លោក ឡុង ឌីម៉ង់ អ្នកនាំពាក្យសាលាក្រុងភ្នំពេញ បានបដិសេធមិនអធិប្បាយអំពីការតវ៉ាដែលគ្រោងទុកនេះទេ។
លោក មីនា បាននិយាយថា អ្នកភូមិបានទទួលការផ្តល់អាហារពីគណបក្សសង្គ្រោះជាតិ ហើយថា លោក ប៉ែន សុភា មេដឹកនាំយុវជនគណបក្សសង្គ្រោះជាតិ បានមកវត្តនេះ ចែកស៊ុត ត្រី និងអង្ករជាដើម។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានបញ្ជាក់ថា យុវជនគណបក្សនេះបានចែកស្បៀងដល់អ្នកភូមិស្នូល។ ទោះជាយ៉ាងនេះក្តី លោកបានអះអាងថា គណបក្សសង្គ្រោះជាតិមិនគ្រប់គ្រងក្រុមយុវជននេះទេ។
លោក សុវណ្ណ បានពន្យល់ថា “ប្រជាជនខ្មែររស់នៅអាមេរិកតែងតែផ្តល់អំណោយដល់អ្នកក្រីក្រនៅស្រុកខ្មែរទូទាំងប្រទេស ហើយ លោក ប៉ែន សុភា ចែកអំណោយ មិនត្រឹមតែនៅវត្តសាមគ្គី រង្សីនេះទេ គឺនៅទូទាំងប្រទេសតែម្តង”។
អ្នកភូមិនិយាយថា ពួកគាត់បានចាប់ផ្តើមមករស់នៅលើដីឃុំស្នួលកាលពីឆ្នាំ២០០០មកនោះ ហើយបានមានជម្លោះជាមួយក្រុមហ៊ុន Horizon Agricultural Development ពាក់ព័ន្ធនឹងដីប្រហែល១.៥០០ហិកតា ដែលក្រុមហ៊ុនចង់ធ្វើចម្ការដំឡូងមី និងម្រេច។
កាលពីខែឧសភា កសិករមួយក្រុមទៀតមកពីស្រុកស្នួលបានបោះតង់ស្នាក់នៅក្នុងវត្តសាមគ្គី រង្សី ដើម្បីតវ៉ាប្រឆាំងនឹងការបណ្តេញចេញពីសំណាក់ក្រុមហ៊ុនកៅស៊ូមួយ។ នៅទីបញ្ចប់ ពួកគាត់បានទទួលយកដីសម្បទានសង្គមកិច្ចទំហំ៧៥០ហិកតានៅក្នុងស្រុកស្នួល៕ មានិត