កាលពីម្សិលមិញ អ្នកភូមិដែលតំណាងឲ្យគ្រួសារជាច្រើនក្នុងខេត្តក្រចេះបានដាក់ញត្តិនៅស្ថានទូតកូរ៉េខាងត្បូងសុំឲ្យជួយដោះស្រាយវិវាទដីធ្លីរបស់ខ្លួនជាមួយក្រុមហ៊ុនកសិពាណិជ្ជកម្មរបស់កូរ៉េខាងត្បូង បន្ទាប់ពីទទួលបានព័ត៌មានថា ស្ថានទូតនេះបានដាក់ពាក្យបណ្ដឹងប្ដឹងពួកគាត់។
អ្នកភូមិប្រហែល២០០នាក់មកពីស្រុកស្នួល ខេត្តក្រចេះ កំពុងស្នាក់នៅក្នុងវត្តសាមគ្គីរង្សី ក្នុងរាជធានីភ្នំពេញ ហើយមានគម្រោងហែក្បួនទៅភូមិគ្រឹះរបស់លោកនាយករដ្ឋមន្ត្រី ហ៊ុន សែន ប្រសិនបើការទាមទាររបស់ពួកគាត់ឲ្យក្រុមហ៊ុន Horizon Agricultural Development ប្រគល់ដីមានវិវាទចំនួន១.៥០០ហិកតាមិនត្រូវបានឆ្លើយតបត្រឹមថ្ងៃសុក្រទេនោះ។
ញត្តិនោះមានខ្លឹមសារថា “មានផលប៉ះពាល់យ៉ាងខ្លាំងទៅលើអ្នកភូមិដែលបានរស់នៅលើដីនេះជាយូរមកហើយ រួមមានការរានដីនិងចម្ការកៅស៊ូរបស់យើង…ដំណាំស្វាយចន្ទី ដំឡូងមី សណ្ដែកខៀវ និងពោតជាដើម។ ក្រុមហ៊ុនក៏បានប្រើប្រាស់កម្លាំងប្រដាប់អាវុធ បានចាប់ខ្លួនប្រជាពលរដ្ឋ និងបានគំរាមបាញ់ប្រជាពលរដ្ឋណាដែលបានរស់នៅលើដីនេះ”។
ញត្តិនេះក៏បានស្នើឲ្យឯកអគ្គរដ្ឋទូតកូរ៉េខាងត្បូងជួយដោះស្រាយវិវាទដីធ្លីរបស់ពួកគាត់ផងដែរ។ អ្នកភូមិបាននិយាយថា លោក គង់ គឹមនី អភិបាលស្រុកស្នួលបានជូនដំណឹងថា ស្ថានទូតកូរ៉េខាងត្បូងបានដាក់ពាក្យបណ្ដឹងប្ដឹងពួកគាត់ប្រហែលមួយខែមកហើយ។
លោក ឌិន សារឿន តំណាងអ្នកភូមិបាននិយាយថា “អភិបាលស្រុករូបនេះបានប្រាប់អ្នកភូមិថា ពួកគេមានគម្រោងដោះស្រាយបញ្ហានេះ ប៉ុន្តែពួកគេមិនអាចធ្វើឲ្យលើសពីនេះទេ ពីព្រោះនេះគឺជាបញ្ហារវាងប្រទេសកម្ពុជា និងប្រទេសកូរ៉េ”។
លោក គឹមនី បានបញ្ជាក់ថា លោកបានជូនដំណឹងដល់អ្នកភូមិអំពីពាក្យបណ្ដឹងមកពីស្ថានទូតនេះ។ លោកបានមានប្រសាសន៍កាលពីម្សិលមិញថា “ស្ថានទូតកូរ៉េប្រចាំរាជធានីភ្នំពេញបានដាក់ពាក្យបណ្ដឹងទៅអាជ្ញាធរសុំឲ្យការពារដីរបស់ក្រុមហ៊ុន ហើយបានចោទអ្នកភូមិថា បានរំលោភយកដី”។
លោកបានមានប្រសាសន៍ថា បុគ្គលិករបស់លោកមានគម្រោងចេញប័ណ្ណកម្មសិទ្ធិឲ្យអ្នកភូមិ មុនពេលស្ថានទូតដាក់ពាក្យបណ្ដឹង។
មន្ត្រីស្ថានទូតកូរ៉េខាងត្បូងបានបញ្ជាក់ថា ស្ថានទូតបានដាក់ពាក្យបណ្ដឹងទៅក្រសួងរៀបចំដែនដី តាងនាមឲ្យក្រុមហ៊ុនកាលពីខែមីនា។
លោក ផាក មីនស៊ូ លេខាទី២នៅស្ថានទូតនេះបានមានប្រសាសន៍ថា “យើងបានដាក់ពាក្យបណ្ដឹងផ្លូវការទៅក្រសួងរៀបចំដែនដីកាលពីថ្ងៃទី៣ ខែមីនា និងមានជំនួបផ្លូវការរវាងឯកអគ្គរដ្ឋទូត គីម ហាន់ស៊ូ និងលោករដ្ឋមន្ត្រី អុឹម ឈុនលឹម”។
លោក គីម ជាឯកអគ្គរដ្ឋទូតបានមានប្រសាសន៍ថា ភាគច្រើននៃអ្នកភូមិដែលជាប់ពាក់ព័ន្ធនឹងវិវាទដីធ្លីនេះទើបតែបានចាប់ផ្ដើមផ្លាស់មករស់នៅលើដីរបស់ក្រុមហ៊ុន Horizon បន្ទាប់ពីក្រុមហ៊ុននេះបានចាប់ផ្ដើមអភិវឌ្ឍដីសម្បទានរបស់ខ្លួនតែប៉ុណ្ណោះ។
លោកបានមានប្រសាសន៍ថា “ក្រុមហ៊ុនមានបញ្ហាធំ ពីព្រោះក្រុមហ៊ុនបានវិនិយោគប្រាក់លើដីេនះដើម្បីអភិវឌ្ឍ និងដាំកៅស៊ូ។ ពួកគេទទួលបានការអនុញ្ញាតពីក្រសួងកសិកម្មដើម្បីដាំដុះលើដីនេះ។ នៅពេលក្រុមហ៊ុនបានចាប់ផ្ដើមភ្ជួរដី មានប្រជាពលរដ្ឋតិចតួចប៉ុណ្ណោះរស់នៅទីនោះ។ ក្រោយមកប្រជាពលរដ្ឋច្រើនទៀតបានប្រកាសថា វាជាដីរបស់ពួកគាត់”។ ឯកអគ្គរដ្ឋទូតរូបនេះបានមានប្រសាសន៍ថា លោកមិនដឹងអំពីការដាក់ញត្តិរបស់ក្រុមអ្នកភូមិកាលពីម្សិលមិញឡើយ៕ សារុន