មន្ត្រីអន្តោប្រវេសន៍ម្នាក់បានបញ្ជាក់កាលពីម្សិលមិញថា អាជ្ញាធរបានចាប់ផ្តើមពង្រឹងច្បាប់ដែលមានអាយុកាលមួយទសវត្សរ៍មកហើយ ដោយតម្រូវឲ្យជនបរទេសដែលធ្វើការនៅប្រទេសកម្ពុជាត្រូវមានប័ណ្ណការងារត្រឹមត្រូវតាមច្បាប់បន្ថែមទៅនឹងទិដ្ឋាការការងារ។
លោក នៅ លក្ខិណា អគ្គនាយករងនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបានមានប្រសាសន៍ថា “យើងកំពុងអនុវត្តកិច្ចការនេះប្រហែលមួយខែមកហើយ”។ ការងារនេះបានចាប់ផ្តើម បន្ទាប់ពីមានការបង្កើតអគ្គនាយកដ្ឋាននេះកាលពីខែមេសា។
លោកមានប្រសាសន៍ថា “យើងមានច្បាប់ ប៉ុន្តែយើងមិនអាចពិន័យបានទេ ពីព្រោះយើងមិនមាន[ការអនុញ្ញាត]ពីក្រសួងហិរញ្ញវត្ថុ។ បន្ទាប់ពីការបង្កើតអគ្គនាយកដ្ឋានអន្តោប្រវេសន៍កាលពីថ្ងៃទី១ ខែមេសា ទើបយើងមាន[ការអនុញ្ញាត]”។
ប័ណ្ណការងារគឺខុសពីទិដ្ឋាការការងារ ហើយមានតម្លៃ៤០០.០០០រៀល ឬ ប្រហែល១០០ដុល្លារ។
តាមមាត្រា២៦១នៃច្បាប់ស្តីពីការងារ ជនបរទេសមិនអាចធ្វើការនៅប្រទេសកម្ពុជាបានទេ បើសិនអ្នកទាំងនោះគ្មានប័ណ្ណការងារនិងអត្តសញ្ញាណប័ណ្ណការងារចេញដោយក្រសួងការងារទេនោះ។ ច្បាប់នេះចែងថា “ប័ណ្ណការងារមានសុពលភាពរយៈពេលមួយឆ្នាំ ហើយអាចបន្តបានដរាបណាការពន្យារពេលនោះមិនទាន់ហួសពេលកំណត់នៃការអនុញ្ញាតឲ្យស្នាក់នៅ”។
មាត្រា១៩និង៣១នៃច្បាប់អន្តោប្រវេសន៍គ្រប់គ្រងប័ណ្ណការងារ និងផ្តល់ “អំណាចដល់រដ្ឋាភិបាលដើម្បីអនុវត្តការត្រួតពិនិត្យនិងគ្រប់គ្រងប័ណ្ណការងាររបស់ជនបរទេស”។ ការពិន័យមានពី៥០ដុល្លារដល់១២៥ដុល្លារ។ អ្នកបំពានក៏អាចជាប់ពន្ធនាគារដល់ទៅ៣ខែផងដែរ។
ឧត្តមសេនីយ៍ឯក លក្ខិណា បានមានប្រសាសន៍ថា ការពង្រឹងច្បាប់ដំបូងចាប់ផ្តើមធ្វើនៅរាជធានីភ្នំពេញ ហើយនឹងបន្តទៅដល់ខេត្តនានាក្នុងពេលឆាប់ៗនេះ។
លោកមានប្រសាសន៍ទៀតថា មានប្រាំក្រុមដែលមានមនុស្សប្រាំទៅប្រាំមួយនាក់ មកពីអគ្គនាយកដ្ឋានអន្តោប្រវេសន៍ ក្រសួងការងារនិងការិយាល័យអន្តោប្រវេសន៍ខេត្ត ដែលនឹងត្រួតពិនិត្យកិច្ចការខាងប័ណ្ណការងារនេះ។
លោក លក្ខិណា បានមានប្រសាសន៍ថា “ប្រទេសកម្ពុជាជានីតិរដ្ឋ។ ជនបរទេសមិនអាចធ្វើអ្វីដែលពួកគេចង់ធ្វើបានទេ”។ លោកឧត្តមសេនីយ៍ឯករូបនេះបានបន្ថែមថា ការិយាល័យរបស់លោកបានប្រមូលប្រាក់ពិន័យបានប្រហែល៥.៧០០ដុល្លាររួចហើយកាលពីខែមុន៕ មានិត