ប្រជាពលរដ្ឋដែលត្រូវគេបណ្តេញចេញមួយក្រុមតូចមកពីតំបន់បឹងកក់ រាជធានីភ្នំពេញ បានតវ៉ានៅមុខស្ថានទូតសិង្ហបុរីកាលពីព្រឹកម្សិលមិញ ប្រឆាំងនឹងផែនការមួយរបស់ក្រុមហ៊ុនសិង្ហបុរី ក្នុងការទិញដីនៅក្នុងតំបន់បឹងកក់ ជាដីដែលពួកគាត់និយាយថា គេបានបណ្តេញពួកគាត់ចេញដោយខុសច្បាប់។
ប្រជាពលរដ្ឋប្រហែល៣.០០០គ្រួសារត្រូវបានបណ្តេញចេញពីបឹងកក់តាំងពី២០០៨ ដើម្បីបើកផ្លូវសម្រាប់គម្រោងអភិវឌ្ឍន៍អចលនទ្រព្យថ្លៃៗ ដោយក្រុមហ៊ុនឯកជនរបស់លោក ឡាវ ម៉េងឃិន ជាសមាជិកព្រឹទ្ធសភាគណបក្សប្រជាជនកម្ពុជា។
នៅខែសីហា ក្រុមហ៊ុន HLH Group មានមូលដ្ឋាននៅប្រទេសសិង្ហបុរី បានប្រកាសឲ្យដឹងថា ក្រុមហ៊ុនបុត្រសម្ព័ន្ធរបស់ខ្លួនមានផែនការទិញដីទំហំ១.៣៥ហិកតានៅបឹងកក់ ក្នុងតម្លៃ១៤,៩លានដុល្លារសម្រាប់អគារការិយាល័យ ខុនដូប្រណិតៗ និងអគារសម្រាប់លក់។
អ្នកស្រី សៀ ណារ៉េត អ្នកដែលត្រូវគេបណ្តេញម្នាក់ក្នុងចំណោម១៥នាក់ដែលបានមកចូលរួមតវ៉ានេះបាននិយាយថា “យើងមិនចង់ឲ្យពួកគេទិញដីនេះទេ ពីព្រោះវាជាដីមានជម្លោះ ហើយជម្លោះនេះមិនទាន់ត្រូវបានដោះស្រាយនៅឡើយទេ ដូច្នេះយើងចង់ឲ្យអ្នកយកលុយរបស់អ្នកវិញទៅ”។
តំណាងស្ថានទូតម្នាក់ ដែលបដិសេធមិនប្រាប់ឈ្មោះ ឬ មុខតំណែងនោះ បានចេញមកទទួលយកលិខិតរបស់អ្នកតវ៉ា និងបាននិយាយថា គណៈប្រតិភូនឹង”ពិនិត្យរឿងនេះ”។
ក្រុមហ៊ុន HLH បានឲ្យដឹងថា កិច្ចព្រមព្រៀងនេះមិនទាន់ត្រូវបានបង្ហើយនៅឡើយទេ ហើយថា ការពិនិត្យខាងផ្លូវច្បាប់នឹងត្រូវការពេលជាច្រើនខែទៀត៕ មានិត