ក្រសួងអប់រំបានប្រកាសថា សិស្សវិទ្យាល័យទាំងអស់ដែលប្រឡងសញ្ញាបត្រមធ្យមសិក្សាទុតិយភូមិធ្លាក់ នឹងមានឱកាសប្រឡងជាប់លើកទី២ នៅថ្ងៃទី១៣ និងទី១៤ ខែតុលា បន្ទាប់ពីមានសេចក្ដីសម្រេចរបស់លោកនាយករដ្ឋមន្ត្រី ហ៊ុន សែន ឲ្យរៀបចំការប្រឡងឡើងវិញចំពេលដែលមានសេចក្តីរាយការណ៍ថា មានអត្រាប្រឡងជាប់តិចបំផុត។
លោក ហង់ ជួន ណារុ៉ន រដ្ឋមន្ត្រីក្រសួងអប់រំបានមានប្រសាសន៍ថា ដោយសារមានការតឹងរុឹងនៅឆ្នាំនេះ ចំនួនសិស្សប្រឡងជាប់មានតិច។ នេះគឺជាការប្រឡងដ៏តឹងរ៉ឹងបំផុត ប៉ុន្តែខ្ញុំមិនចង់ធ្វើការសន្និដ្ឋាន” ថាតើមានសិស្សប៉ុន្មាននាក់ប្រឡងធ្លាក់នោះទេ។ លទ្ធផលប្រឡងគ្រោងប្រកាសនៅចុងខែនេះ។
លោក ហង់ ជួន ណារ៉ុន បានអំពាវនាវដល់អង្គភាពប្រឆាំងអំពើពុករលួយ ដែលបានជ្រើសរើសអ្នកសង្កេតការណ៍ស្ម័គ្រចិត្តជាង២.០០០នាក់ឲ្យជួយពិនិត្យមើលការប្រឡងកាលពីថ្ងៃទី៤ និងទី៥ ខែសីហា ដែលលោកបានលើកឡើងថា ជាកត្តាតែមួយគត់ដើម្បីកំណត់ពីសមត្ថភាពសិស្សចូលរៀនតាមសាកលវិទ្យាល័យរដ្ឋនានាកាលពីដើមឆ្នាំនេះ។ លោក ហ៊ុន សែន បានប្រកាសឲ្យមានការប្រឡងឡើងវិញកាលពីសប្ដាហ៍មុន។
រដ្ឋមន្ត្រីក្រសួងអប់រំរូបនេះបានមានប្រសាសន៍ថា ” លោកនាយករដ្ឋមន្ត្រីបានសម្រេច ហើយបានអនុញ្ញាតឲ្យមានការប្រឡងលើកទី២”។ បើទោះណាជាការខិតខំប្រឹងប្រែងរបស់លោកដើម្បីលុបបំបាត់ការលួចចម្លងកាលពីប្រឡងលើកទី១ក៏ដោយ ក៏លោក ហង់ ជួន ណារ៉ុន បានមានប្រសាសន៍ថា លោកបារម្ភថា បរិមាណសិស្សប្រឡងជាប់នឹងមានតិច។
លោកបានមានប្រសាសន៍ថា ” ខ្ញុំបារម្ភថា ប្រសិនបើសិស្សប្រឡងធ្លាក់ច្រើន តើពួកគេនឹងធ្វើអ្វី?។ វាច្បាស់ណាស់ថា យើងត្រូវធ្វើការប្រឡងលើកទី២ ពីព្រោះយើងមិនអាចឲ្យសិស្សធ្លាក់ទេ”។
លោក ហង់ ជួន ណារ៉ុន បានមានប្រសាសន៍ថា ការប្រឡងលើកទី២ នឹងមានវិញ្ញាសាថ្មី ប៉ុន្តែវាលំបាកដូចប្រឡងលើកទី១ដែរ។ លោកបានបា៉ន់ប្រមាណថា នឹងចំណាយថវិកាប្រហែល២លានដុល្លារ គឺប្រហែលពាក់កណ្ដាលនៃការចំណាយប្រឡងលើកទី១។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍ថា អង្គការរបស់លោកមិនគាំទ្រការប្រឡងលើកទី២នេះទេ ពីព្រោះវាប៉ះពាល់ដល់ស្មារតីនៃកំណែទម្រង់។
លោក រ៉ុង ឈុន ដែលបានបា៉ន់ប្រមាណថា សិស្សមិនដល់៣០ភាគរយផងបានប្រឡងជាប់នោះ បានមានប្រសាសន៍ថា ប្រសិនបើគោលបំណងរបស់លោក ហង់ ជួន ណារ៉ុន គឺដើម្បីលុបបំបាត់ការលួចចម្លង និងកែលម្អគុណភាពអប់រំនោះ ការអនុញ្ញាតឲ្យមានការប្រឡងលើកទី២មិនមានន័យឡើយ។ លោកបានមានប្រសាសន៍ថា ” សិស្សមិនអាចត្រៀមខ្លួនសម្រាប់ការប្រឡងលើកទី២ទេ បន្ទាប់ពីការសិក្សារយៈពេលមួយខែនោះ។ ពួកគេមិនចេះទេ”៕ សារុន
(រាយការណ៍បន្ថែមដោយ AlexConsiglio)