កាលពីថ្ងៃសុក្រ អាជ្ញាធរខេត្តព្រះវិហារបានបំបែកកន្លែងចំនួនប្រាំមួយដែលពួកគេលើកឡើងថា កំពុងត្រូវបានគេប្រើប្រាស់ដើម្បីជីករ៉ែមាសដោយខុសច្បាប់នៅលើដីដែលរដ្ឋាភិបាលបានផ្តល់ទៅឲ្យក្រុមហ៊ុនចិនមួយ។
លោក គង់ មករា ប្រធានមន្ទីរឧស្សាហកម្មនិងរ៉ែខេត្តព្រះវិហារបានមានប្រសាសន៍កាលពីម្សិលមិញថា អាជ្ញាធររួមមាននគរបាលមូលដ្ឋាន កងរាជអាវុធហត្ថបានឆ្មក់ចូលកន្លែងទាំងនេះនៅក្នុងស្រុករវៀងបន្ទាប់ពីមានពាក្យបណ្តឹងពីក្រុមហ៊ុន WS Mining Industry Holding ដែលបានលើកឡើងថា ទទួលបានអាជ្ញាប័ណ្ណរុករករ៉ែមាសលើផ្ទៃដីទំហំ៩៧.០០០ហិកតាកាលពីឆ្នាំ២០០៧។
លោកបានមានប្រសាសន៍ថា ម៉ាស៊ីនភ្លើងមួយគ្រឿងនិងឧបករណ៍ខួងត្រូវបានរឹបអូសពីអ្នកជីករ៉ែទ្រង់ទ្រាយតូច ចំណែកឯឧបករណ៍ផ្សេងទៀតត្រូវបានបំផ្លាញចោលនៅនឹងកន្លែង ហើយបានដុតកន្លែងទាំងនោះចោល។ លោកបានមានប្រសាសន៍ថា “យើងបានបំផ្លាញម៉ាស៊ីនទាំងនេះចោលនៅនឹងកន្លែង ពីព្រោះវាពិបាកយកចេញណាស់”។ លោក មករា បានមានប្រសាសន៍ថា ក្រុមហ៊ុនចិនជីករ៉ែនេះក៏ត្រូវបានណែនាំឲ្យពង្រឹងសន្តិសុខ ដើម្បីទប់ស្កាត់អ្នកជីករ៉ែខុសច្បាប់មិនឲ្យត្រឡប់មកវិញផងដែរ។
លោកបានមានប្រសាសន៍ថា “យើងបានណែនាំក្រុមហ៊ុនឲ្យដាក់សន្តិសុខយាមដីដើម្បីទប់ស្កាត់អ្នកជីករ៉ែទាំងនេះមិនឲ្យត្រឡប់មកវិញ ពីព្រោះយើងជាមន្ត្រីរាជការ និងគ្មានអាវុធដើម្បីតតាំងជាមួយអ្នកជីករ៉ែខុសច្បាប់ទាំងនេះឡើយ” ដែលជារឿយៗប្រដាប់ដោយកាំភ្លើងកែច្នៃទៀតផង។
លោក អ៊ា សារ៉ូ អភិបាលស្រុកដែលបានចូលរួមក្នុងប្រតិបត្តិការនោះកាលពីថ្ងៃសុក្របានមានប្រសាសន៍ថា មិនមានការចាប់ខ្លួនជនណាម្នាក់ឡើយ ពីព្រោះការឆ្មក់ចូលកន្លែងទាំងអស់រកមិនឃើញជនណាម្នាក់ឡើយ។ លោកបានមានប្រសាសន៍ថា អ្នកជីករ៉ែមាសប្រហែលបីឬបួននាក់ក្នុងកន្លែងនីមួយៗទំនងជាដឹងពីការឆ្មក់ចូលនេះជាមុន។
លោកបានមានប្រសាសន៍ថា “យើងនឹងសហការជាមួយមន្ទីរឧស្សាហកម្ម និងរ៉ែខេត្តដើម្បីស្វែងរកមេដឹកនាំកន្លែងជីករ៉ែទាំងប្រាំមួយនោះ ហើយឲ្យពួកគេទទួលខុសត្រូវចំពោះមុខច្បាប់”។ លោកបានបន្ថែមថា នឹងមានការឆ្មក់ចូលយ៉ាងហោចណាស់បួនកន្លែងទៀតដែលយើងដឹងនៅក្នុងស្រុកនេះដែលក៏ស្ថិតនៅលើដីរបស់ក្រុមហ៊ុនចិននេះដែរ។
លោក សារ៉ូ បានមានប្រសាសន៍ថា “យើងបានបង្ក្រាបប្រាំមួយកន្លែងនៅពេលនេះ ហើយយើងនឹងបន្តកន្លែងមួយចំនួនទៀតនៅពេលឆាប់ៗនេះ”។
គេមិនអាចទាក់ទងក្រុមហ៊ុន WS Mining ដើម្បីសុំអត្ថាធិប្បាយបានទេ។ តំបន់នេះមានវិវាទរវាងអ្នកជីករ៉ែទ្រង់ទ្រាយតូចនិងធំរយៈពេលច្រើនឆ្នាំមកហើយ។ អ្នកភូមិមូលដ្ឋានមួយចំនួននិយាយថា ពួកគាត់ពឹងផ្អែកលើការជីករ៉ែដោយដៃនេះដើម្បីចិញ្ចឹមជីវិតជាយូរមកហើយ មុនពេលក្រុមហ៊ុននានាទទួលបានសិទ្ធិលើដីនេះទៅទៀត៕សារុន