កាលពីម្សិលមិញ លោក ឆាយ សុផល ជាអ្នកកាសែតក្នុងស្រុក បានចេញផ្សាយសៀវភៅជាភាសាខ្មែរមួយក្បាល ដែលចងក្រងជីវប្រវត្តិរបស់បុរសទាំង៣៦រូប ដែលបានធ្វើជានាយករដ្ឋមន្ត្រីរបស់កម្ពុជាចាប់តាំងពីប៉ុន្មានចុងក្រោយនៃការត្រួតត្រារបស់អាណាព្យាបាលបារាំងមក។
លោកបានមានប្រសាសន៍ក្នុងពិធីចេញផ្សាយសៀវភៅមានចំណងជើងថា ” នាយករដ្ឋមន្ត្រីខ្មែរទាំង៣៦រូបជានរណា?” នេះ ដែលរៀបចំឡើងនៅការិយាល័យក្លឹបអ្នកកាសែតកម្ពុជាក្នុងរាជធានីភ្នំពេញថា សៀវភៅនេះត្រូវបានបោះពុម្ពផ្សាយក្នុងគោលបំណងអប់រំសាធារណជនឲ្យមានការយល់ដឹងអំពីមេដឹកនាំមុនលោក ហ៊ុន សែន ដែលបានធ្វើជានាយករដ្ឋមន្ត្រីចាប់តាំងពីឆ្នាំ១៩៨៥មក។
លោកបានសួរថា ” សម្រាប់យុវជនបច្ចុប្បន្ន ប្រសិនបើយើងនិយាយអំពីនាយករដ្ឋមន្ត្រី ពួកគេស្គាល់សម្ដេចតេជោ [លោក ហ៊ុន សែន] ឬអ្នកខ្លះចាំបានពីព្រះអង្គម្ចាស់ នរោត្តម រណឫទ្ធិ ឬលោក អុឹង ហួត ប៉ុន្តែរហូតមកទល់ពេលនេះ តើមានប៉ុន្មាននាក់ដែលស្គាល់នាយករដ្ឋមន្ត្រីច្រើនជាងនេះ?”។
លោក ឆាយ សុផល អតីតអ្នកយកព័ត៌មានឲ្យទីភ្នាក់ងារសារព័ត៌មាន រ៉យទ័រ ដែលពេលនេះជាសាស្ត្រាចារ្យបង្រៀនមុខវិជ្ជាសារព័ត៌មាននៅដឺបា៉តេម៉ង់ទំនាក់ទំនងប្រព័ន្ធផ្សព្វផ្សាយ នៃសាកលវិទ្យាល័យភូមិន្ទភ្នំពេញ បានមានប្រសាសន៍បន្តថា ” អ្នកខ្លះ ពេលអស់អំណាចត្រូវរត់គេចខ្លួន អ្នកខ្លះគ្រាន់តែអស់អំណាចភ្លាម គេចាប់យកទៅបាញ់ចោល”។
ក្នុងចំណោមឥស្សរជនដែលគួរឲ្យចាប់អារម្មណ៍ជាងគេនៅក្នុងសៀវភៅ ដែលទទួលបានមូលនិធិមួយផ្នែកពីក្រសួងព័ត៌មាននេះ គឺព្រះអង្គម្ចាស់ ស៊ីសុវត្ថិ យុត្តិវង្ស ដែលបានដឹកនាំគណបក្សប្រជាធិបតេយ្យរហូតទទួលបានជ័យជម្នះនៅក្នុងការបោះឆ្នោតក្នុងឆ្នាំ១៩៤៦មុនពេលព្រះអង្គចូលទិវង្គតយ៉ាងអាថ៌កំបាំង។
លោកបានសរសេរថា “អាថ៌កំបាំងជុំវិញការចូលទិវង្គតរបស់ព្រះអង្គមិនទាន់ត្រូវបានដោះស្រាយគ្រប់ជ្រុងជ្រោយនៅឡើយទេ ហើយមានការចោទសួរជាច្រើនអំពីការចូលទិវង្គតរបស់ព្រះអង្គថា តើព្រះអង្គចូលទិវង្គតដោយរបៀបណា? តើមានភ័ស្តុតាងណាខ្លះបង្ហាញថា ព្រះអង្គប្រឈួន? តើបារាំងដាក់ថ្នាំបំពុលព្រះអង្គ ឬក៏គណបក្សប្រជាធិបតេយ្យជាប់ពាក់ព័ន្ធក្នុងរឿងនេះ? ហើយនរណាជាអ្នកទទួលផលពីព្រះអង្គ?”។
សៀវភៅនេះក៏លើកឡើងអំពីករណីរបស់នាយករដ្ឋមន្ត្រី អ៊ាវ កើស ដែលជាសមាជិកមួយរូបដែររបស់គណបក្សប្រជាធិបតេយ្យ ប៉ុន្តែលោកបានកាន់តំណែងជានាយករដ្ឋមន្ត្រីបានជាងមួយសប្ដាហ៍។
លោក ឆាយ សុផល បានមានប្រសាសន៍ថា “លោក អ៊ាវ កើស ធ្វើជានាយករដ្ឋមន្ត្រីបានតែ៩ថ្ងៃប៉ុណ្ណោះ គឺពីថ្ងៃទី២០ ដល់ថ្ងៃទី២៨ ខែកញ្ញា ឆ្នាំ១៩៤៩។ គាត់គឺជាបុគ្គលមួយរូបដ៏មានសុជីវធម៌ មិនឆេវឆាវ និងចូលចិត្តជជែកគ្នាជាមួយគ្រួសាររបស់គាត់ ប៉ុន្តែគាត់មិនចូលចិត្តលេងកីឡាទេ”។
សៀវភៅនេះគូសបញ្ជាក់ថា នៅក្នុងឆ្នាំដដែលនោះ លោក អ៊ាវ កើស គឺជាមេដឹកនាំសហជីពដ៏លេចធ្លោមួយរូប ហើយលោកត្រូវបានឃាតករធ្វើឃាត។ សៀវភៅនេះសរសេរទៀតថា ” នៅម៉ោង៦ល្ងាច បន្ទាប់ពីលោក អា៊វ កើស បិទកិច្ចប្រជុំរបស់គណៈកម្មាធិការប្រតិបត្តិនៃគណបក្សប្រជាធិបតេយ្យ គ្រាប់បែកមួយគ្រាប់ត្រូវបានគប់ចូលក្នុងការិយាល័យបក្ស។ លោក អា៊វ កើស បានរងរបួស ហើយក៏បាត់បង់ជីវិត”។
លោក អ៊ាវ បណ្ណិកា កូនប្រុសលោកនាយករដ្ឋមន្ត្រី អា៊វ កើស បានបន្តបង្កើតមជ្ឈមណ្ឌលធនធានសោតទស្សន៍បុប្ផាណា នៅក្នុងរាជធានីភ្នំពេញ ជាមួយផលិតករភាពយន្តលោក ប៉ាញ រិទ្ធី កាលពីខែធ្នូ ឆ្នាំ២០០៦ ហើយលោកក៏មានតួនាទីនៅក្នុងព្រឹទ្ធសភាដែរ។
សៀវភៅនេះត្រូវបានសរសេរឡើងដោយផ្អែកលើព័ត៌មានប្រវត្តិសាស្ត្រដែលមានស្រាប់ ប៉ុន្តែវាក៏ផ្អែកលើបទសម្ភាសជាមួយសាច់ញាតិនៅរស់ដែរ ដើម្បីបន្ថែមព័ត៌មានលម្អិតផ្ទាល់ខ្លួនស្តីពីឥស្សរជននយោបាយទាំងនេះ។
បទសម្ភាសមួយត្រូវបានធ្វើឡើងជាមួយលោកស្រី ជូឡុង សូមួរ៉ា តំណាងរាស្ត្រមកពីគណបក្សសង្គ្រោះជាតិ ដែលឪពុករបស់លោកស្រីគឺលោក ញ៉ឹក ជូឡុង បានធ្វើជានាយករដ្ឋមន្ត្រីនៅក្នុងឆ្នាំ១៩៦២ និងដែលស្វាមីរបស់លោកស្រីគឺលោក សម រង្ស៊ី ប្រធានគណបក្សសង្គ្រោះជាតិ ជាឥស្សរជនដែលគេរំពឹងថា នឹងក្លាយជានាយករដ្ឋមន្ត្រីនៅពេលអនាគត។
សៀវភៅនេះសរសេរថា “លោកស្រី សូមួរ៉ា បានប្រាប់ខ្ញុំថា ឪពុករបស់លោកស្រីជាបុរសសង្ហារ និងមានមន្តស្នេហ៍។ គាត់ចូលចិត្តអាហារខ្មែរ និងអាហារអឺរ៉ុប។ សម្រាប់អាហារខ្មែរ គាត់ចូលចិត្តសម្លត្រពាំង ប៉ុន្តែគាត់មិនចូលចិត្តប្រហុក ម៉ាំ និងម្ហូបដែលមានក្លិនស្អុយនោះទេ”៕ សុខុម