នៅក្នុងការកែប្រែចំនួនដ៏ខ្លាំងមួយនៃការប៉ាន់ប្រមាណរបស់រដ្ឋាភិបាលកាលពីលើកមុន ក្រសួងការបរទេសបានលើកឡើងកាលពីម្សិលមិញថា ពលករខ្មែរប្រមាណ៦៦០.០០០នាក់ ឬជិតស្មើនឹង៥ភាគរយនៃចំនួនប្រជាជនសរុបនៅក្នុងប្រទេសកម្ពុជាកំពុងធ្វើការនៅក្នុងប្រទេសថៃសព្វថ្ងៃ។
មុនពេលរដ្ឋាភិបាលយោធាថៃបានចាប់ផ្ដើមវិធានការមួយ ដើម្បីបោសសម្អាតពលករចំណាកស្រុកខុសច្បាប់នៅក្នុងប្រទេសថៃកាលពីខែមិថុនា ជាវិធានការមួយដែលធ្វើឲ្យពលករខ្មែរប្រហែល២៥០.០០០នាក់បានត្រឡប់មកប្រទេសរបស់ខ្លួនវិញនោះ រដ្ឋាភិបាលបានប៉ាន់ប្រមាណថា ពលករខ្មែរប្រមាណ៩០.០០០នាក់កំពុងធ្វើការនៅក្នុងប្រទេសថៃដោយស្របច្បាប់។
ទោះជាយ៉ាងណា លោក កុយ គួង អ្នកនាំពាក្យក្រសួងការបរទេសបានឲ្យដឹងកាលពីម្សិលមិញថា ពលករខ្មែរប្រមាណ២៧០.០០០នាក់ ដែលបានធ្វើការដោយខុសច្បាប់ក្នុងប្រទេសថៃកាលពីលើកមុន ឥឡូវនេះទទួលបានសិទ្ធិស្របច្បាប់ហើយ ដោយធ្វើឲ្យពលករខ្មែរដែលឆ្លងព្រំដែនទៅរកការងារធ្វើក្នុងប្រទេសថៃមានចំនួនសរុបប្រហែល៦៦០.០០០នាក់។
លោកបានមានប្រសាសន៍ថា “មានពលកររបស់យើងប្រហែល២៧០.០០០នាក់ ដែលកំពុងធ្វើការដោយខុសច្បាប់នៅក្នុងប្រទេសថៃបានចុះឈ្មោះ និងទទួលបានប័ណ្ណពណ៌ស៊ីជម្ពូ ហើយពលករខ្មែរប្រមាណ៣៩០.០០០នាក់ គឺស្របច្បាប់រួចហើយ”។
កាលពីចុងខែមិថុនា ប្រទេសថៃបានបើកការិយាល័យនៅទូទាំងប្រទេសជាកន្លែងដែលកម្មករខុសច្បាប់អាចចុះឈ្មោះបញ្ជាក់ពីអត្តសញ្ញាណរបស់ខ្លួន ជាថ្នូរនឹងប័ណ្ណពណ៌ស៊ីជម្ពូ ដែលអនុញ្ញាតឲ្យពួកគេបន្តធ្វើការរយៈពេល៦០ថ្ងៃបន្តទៀត។ លោក កុយ គួង បានលើកឡើងថា ការផ្តល់ពេលចំនួនពីរខែនេះនឹងអនុញ្ញាតឲ្យកម្មករទទួលបានឯកសារត្រឹមត្រូវ។
លោកបានមានប្រសាសន៍ថា “ប័ណ្ណពណ៌ស៊ីជម្ពូ បើកផ្លូវឲ្យពលករទាំងនោះអាចធ្វើការដោយស្របច្បាប់ និងយូរអង្វែង ហើយផ្ដល់ឱកាសឲ្យពួកគេធ្វើលិខិតឆ្លងដែន និងទិដ្ឋាការ”។
លោក កុយ គួង បាននិយាយយ៉ាងខ្លីទៅកាន់អ្នកយកព័ត៌មានក្រោយកិច្ចប្រជុំមួយរវាងលោក ហោ ណាំហុង រដ្ឋមន្ត្រីក្រសួងការបរទេស និងលោក ផាកឌី ទូឆៃយុត ឯកអគ្គរាជទូតផុតអាណត្តិរបស់ថៃ។
យោងតាមលោក កុយ គួង បានឲ្យដឹងថា លោក ផាកឌី បានថ្លែងអំណរគុណលោក ហោ ណាំហុង ចំពោះការមិនអនុញ្ញាតឲ្យក្រុមប្រឆាំងនឹងរដ្ឋាភិបាលយោធាថៃបង្កើតរដ្ឋាភិបាលនិរទេសមួយក្នុងប្រទេសកម្ពុជា លោកទាំងពីរបាននិយាយថា គម្រោងផ្លូវដែកឆ្លងកាត់ព្រំដែនមួយក្បែរក្រុងប៉ោយប៉ែតគួរតែជាអាទិភាព។
លោក ហោ ណាំហុង ក៏បានអំពាវនាវឲ្យមានការបញ្ចប់ការចាប់ខ្លួនកម្មករខ្មែរនៅច្រកព្រំដែនប៉ោយប៉ែត ជាទីដែលអ្នករុញរទេះកម្ពុជារាប់សិបនាក់ត្រូវបានចាប់ខ្លួន ហើយដោះលែងវិញក្នុងពេលប៉ុន្មានថ្ងៃថ្មីៗនេះទាក់ទិននឹងរឿងដឹកជញ្ជូនទំនិញឆ្លងកាត់ព្រំដែន ដែលរំលោភនឹងសញ្ញាពាណិជ្ជកម្មរបស់ក្រុមហ៊ុនថៃផងដែរ។
លោក កុយ គួង បានមានប្រសាសន៍បន្តថា ” លោកឧបនាយករដ្ឋមន្ត្រី [ហោ ណាំហុង] បានស្នើឲ្យប្រទេសទាំងពីរធ្វើយ៉ាងណាកុំឲ្យមានការចាប់ខ្លួន ហើយដាក់ទោសទណ្ឌលើមេខ្យល់ទាំងនៅក្នុងប្រទេសកម្ពុជា និងប្រទេសថៃ”៕ គឹមហឿន