នៅក្នុងការចាប់ផ្ដើមបែបលេងឆាកល្ខោនមួយចំពោះការកាន់តំណែងរបស់លោក កឹម សុខា អនុប្រធានគណបក្សសង្គ្រោះជាតិជាអនុប្រធានទី១រដ្ឋសភានោះ កាលពីម្សិលមិញលោកនាយករដ្ឋមន្ត្រី ហ៊ុន សែន បានក្រោកឈរនៅក្នុងរដ្ឋសភាដើម្បីប្រាប់ឲ្យលោក ងួន ញ៉ិល អនុប្រធានទី១រដ្ឋសភាដែលអស់អាណត្តិប្រគល់អាសនៈរបស់ខ្លួនទៅឲ្យលោក កឹម សុខា។
តាមកិច្ចព្រមព្រៀងកាលពីចុងខែមុនរវាងលោក ហ៊ុន សែន និងលោក សម រង្ស៊ី មេដឹកនាំគណបក្សប្រឆាំង ដើម្បីបញ្ចប់ការធ្វើពហិការមិនចូលសភារបស់គណបក្សសង្គ្រោះជាតិនោះ គណបក្សប្រជាជនកម្ពុជាកំពុងកាន់អំណាចនៅតែគ្រប់គ្រងតំណែងប្រធានរដ្ឋសភា និងអនុប្រធានទី២រដ្ឋសភាដដែល ដោយគណបក្សសង្គ្រោះជាតិគ្រប់គ្រងតំណែងអនុប្រធានទី១រដ្ឋសភា។
លោក កឹម សុខា ត្រូវបានបោះឆ្នោតជ្រើសរើសជាអនុប្រធានទី១រដ្ឋសភានៅក្នុងកិច្ចប្រជុំរដ្ឋសភាកាលពីព្រឹកម្សិលមិញ ដោយទទួលបានសំឡេងគាំទ្រចំនួន១១៦សំឡេង ប្រឆាំងចំនួនបួនសំឡេង និងអនុបវាទចំនួនពីរសំឡេងនៅក្នុងការបោះឆ្នោតសម្ងាត់ រីឯលោក គង់ សំអុល រដ្ឋមន្ត្រីក្រសួងព្រះបរមរាជវាំងវិញមិនមានវត្តមានទេ ដោយសារលោកបានធ្វើដំណើរទៅទីក្រុងបេ៉កាំងជាមួយព្រះមហាក្សត្រ នរោត្តម សីហមុនី។
បន្ទាប់ពីសម្រាក១៥នាទីក្រោយការបោះឆ្នោត លោក ងួន ញ៉ិល ដែលត្រូវបានប្ដូរតំណែងមកជាអនុប្រធានទី២រដ្ឋសភានោះ បានប្រញាប់ប្រញាល់ដើរទៅកាន់អាសនៈចាស់ជាអនុប្រធានទី១របស់លោកវិញ ដែលស្ថិតនៅខាងស្ដាំដៃលោក ហេង សំរិន ប្រធានរដ្ឋសភា។
ដោយទំនងជាស្ទាក់ស្ទើរ និងអាក់អន់ចិត្តផងនោះ លោក កឹម សុខា ហាក់បីដូចជាចង់ទៅអង្គុយលើអាសនៈដែលទុកសម្រាប់អនុប្រធានទី២រដ្ឋសភាស្ថិតនៅខាងឆ្វេងដៃលោក ហេង សំរិន មុនពេលលោក ហ៊ុន សែន ក្រោកឡើងធ្វើអន្តរាគមន៍។
លោក ហ៊ុន សែន បានមានប្រសាសន៍តាមរយៈមីក្រូហ្វូនមុនពេលស្នើឲ្យសមាជិកសភារបស់គណបក្សប្រជាជនរូបនេះប្រគល់អាសនៈរបស់លោកទៅឲ្យលោក កឹម សុខា ថា ” ប្រសិនបើមិនចង់ដូរទេ ដោះស្លាកហ្នឹងទើបបាន គ្រាន់ដើរទៅមួយភ្លែតហ្នឹងមានទាស់អី។ សូមអញ្ជើញឯកឧត្តម ងួន ញ៉ិល ទៅខាងនោះ”។
បន្ទាប់មក លោក ងួន ញ៉ិល និងលោក កឹម សុខា បានផ្លាស់ប្ដូរអាសនៈគ្នាភ្លាមៗ ដែលស្ថិតនៅពីក្រោយលោក ហេង សំរិន។ លោកនាយករដ្ឋមន្ត្រីដែលនៅតែឈរនៅឡើយ ទំនងជាបន្ទោសលោក ងួន ញ៉ិល ដែលត្រូវបានបោះឆ្នោតជ្រើសរើសជាអនុប្រធានទី១នៃរដ្ឋសភាឯកបក្សដែលមានតែសមាជិកសភារបស់គណបក្សប្រជាជននៅក្នុងការចូលកាន់តំណែងក្នុងរដ្ឋសភារបស់ខ្លួនកាលពីខែកញ្ញា។ លោក ហ៊ុន សែន បានមានប្រសាសន៍បន្តថា ” វាអត់ត្រូវ សុំទោស គ្រាន់តែប៉ុណ្ណឹងពិបាកម្លេ៉ះ គ្រាន់តែមួយដើរមកខាងនេះ មួយដើរទៅខាងនោះ”។
ការបោះឆ្នោតកាលពីព្រឹកម្សិលមិញនេះ បានធ្វើឲ្យលោកស្រី ឃួន សុដារី អនុប្រធានទី២រដ្ឋសភាត្រូវលះបង់តំណែងរបស់ខ្លួន ដើម្បីបើកផ្លូវឲ្យលោក ងួន ញ៉ិល។ លោកស្រី សុដារី មិនជំទាស់ចំពោះការដកលោកស្រីចេញពីតំណែងនេះទេ ហើយបានទទួលយកអាសនៈរបស់លោកស្រីជាសមាជិកសភាធម្មតា បន្ទាប់ពីសម្រាកមួយភ្លែតមក។
ចាប់តាំងពីមានកិច្ចព្រមព្រៀងកាលពីថ្ងៃទី២២ ខែកក្កដាមក លោកនាយករដ្ឋមន្ត្រីបានព្រមានថា សមាជិកសភាទាំង៦៧រូបរបស់គណបក្សប្រជាជនកម្ពុជាប្រហែលជាមិនមានវិន័យបក្សឲ្យចូលរួមជាមួយសមាជិកសភាទាំង៥៥រូបរបស់គណបក្សសង្គ្រោះជាតិ ដើម្បីបោះឆ្នោតធ្វើកំណែទម្រង់ តាមការព្រមព្រៀងគ្នាឡើយ បើគ្មានវត្តមានរបស់លោកនៅក្នុងសភាទេនោះ។
ការលេងឆាកល្ខោនកាលពីព្រឹកម្សិលមិញ ទំនងជាបង្ហាញពីអំណាចនៃការព្រមានរបស់លោក ហ៊ុន សែន ដែលលោកធ្លាប់បានព្រមានថា លោកនឹងផ្លាស់ប្ដូរថ្ងៃប្រជុំសភា ប្រសិនបើគណបក្សសង្គ្រោះជាតិហ៊ានធ្វើពហិការមិនចូលសភា។
លោក កឹម សុខា ដែលអំឡុងពេលធ្វើពហិការមិនចូលសភា បានសន្យាចំពោះអ្នកគាំទ្រគណបក្សសង្គ្រោះជាតិថា គណបក្សប្រឆាំងនឹងមិនទទួលយកអាសនៈឡើយ ប្រសិនបើគ្មានការធានាឲ្យមានការបោះឆ្នោតសាជាថ្មីនោះ បានប្រាប់អ្នកយកព័ត៌មានបន្ទាប់ពីកិច្ចប្រជុំរដ្ឋសភាកាលពីម្សិលមិញថា អំណាចនីតិបញ្ញត្តិរបស់គណបក្សសង្គ្រោះជាតិ នឹងត្រួតពិនិត្យស្ថាប័ននីតិប្រតិបត្តិ និងតុលាការ។
លោកបានមានប្រសាសន៍ថា “យើងចង់ឃើញកង់ទាំងបីនៃប្រជាធិបតេយ្យដើរស្របគ្នា ប្រសិនបើយើងបណ្ដោយឲ្យអំណាចនីមួយក្លាយជាគ្មានតុល្យភាពនោះ វានឹងមិនមានស្ថិរភាពនយោបាយទេ”។
ការបោះឆ្នោតកាលពីម្សិលមិញក៏បង្ហាញឲ្យឃើញផងដែរថា ប្រធានគណៈកម្មការចំនួនបីក្នុងចំណោមគណៈកម្មការរដ្ឋសភាទាំង១០ត្រូវបានបោះឆ្នោតជ្រើសរើស ដោយលោក ជាម យៀប បន្តតំណែងរបស់លោកជាប្រធានគណៈកម្មការហិរញ្ញវត្ថុ សេដ្ឋកិច្ច និងធនាគារ ជាតំណែងដែលនៅក្នុងកិច្ចព្រមព្រៀងគឺទុកសម្រាប់គណបក្សប្រជាជនកម្ពុជា។
លោក អេង ឆៃអ៊ាង និង លោក ប៉ុល ហំម សមាជិកមកពីគណបក្សប្រឆាំងត្រូវបានបោះឆ្នោតតែងតាំងជាប្រធានគណៈកម្មការសិទ្ធិមនុស្ស និងប្រធានគណៈកម្មការវិនិយោគ ផែនការ និងកសិកម្ម។ រដ្ឋសភានឹងបើកកិច្ចប្រជុំម្ដងទៀតនៅថ្ងៃនេះ ដើម្បីបន្តជ្រើសរើសប្រធានគណៈកម្មការដែលនៅសេសសល់៕ គឹមហឿន