កម្មករជាង៥.០០០នាក់មកពីរោងចក្រស្បែកជើងមួយក្នុងខេត្តកំពង់ចាម បានធ្វើកូដកម្មកាលពីម្សិលមិញទាមទារឲ្យអ្នកគ្រប់គ្រងរោងចក្រដំឡើងប្រាក់កម្រៃរបស់ខ្លួន។
ក្រុមកម្មករបានប្រមូលផ្ដុំគ្នាតវ៉ានៅខាងក្រៅរោងចក្រស្បែកជើង Juhui ដែលកាន់កាប់ដោយជនជាតិចិនតៃវ៉ាន់ នៅក្នុងស្រុកជើងព្រៃ ដោយរាំតាមបទចម្រៀងពីឧគ្ឃោសនសព្ទ ខណៈដែលមន្ត្រីយោធា និងនគរបាលស្រុកប្រហែល៦០នាក់បានឈរមើល។
ដោយត្រូវបានដឹកនាំដោយសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) កម្មករបានទាមទារ១៥ចំណុច រួមទាំងប្រាក់សម្រាប់បាយថ្ងៃត្រង់១ដុល្លាររាល់ថ្ងៃ ប្រាក់សម្រាប់កម្មករមានជំនាញ និងប្រាក់២.០០០រៀលសម្រាប់ការធ្វើការថែមម៉ោងក្នុង១ម៉ោង។
ការតវ៉ានេះបានធ្វើឡើងបន្ទាប់ពីមានការច្រានចោលការទាមទារ១១ចំណុចស្រដៀងគ្នានេះរបស់ក្រុមប្រឹក្សាអាជ្ញាកណ្ដាលនៅក្នុងការសម្រេចមួយកាលពីថ្ងៃទី១២ ខែសីហា។
អ្នកស្រី មុំ សារ៉ែម តំណាងស៊ីខៅឌូ នៅរោងចក្រនេះបាននិយាយថា អ្នកស្រីបានជូនដំណឹងដល់អាជ្ញាធរកាលពីថ្ងៃទី២៥ ខែសីហា ពីគោលបំណងរបស់កម្មករក្នុងការធ្វើកូដកម្ម បន្ទាប់ពីអ្នកគ្រប់គ្រងរោងចក្រមិនបានចូលមកពិភាក្សាជុំវិញការទាមទារថ្មីនោះ។
អ្នកស្រីបាននិយាយថា ” កម្មករនឹងឈប់ធ្វើកូដកម្ម ប្រសិនបើការទាមទាររបស់ខ្លួនទទួលបានការឆ្លើយតបពីរោងចក្រ”។
លោក តេង សម្បត្តិ ប្រធានរដ្ឋបាលនៅរោងចក្រស្បែកជើង Juhui បានមានប្រសាសន៍ថា អ្នកគ្រប់គ្រងរោងចក្របានជួបប្រជុំកាលពីយប់មិញ ដើម្បីពិភាក្សាអំពីកូដកម្មនោះ។ លោកបានមានប្រសាសន៍ថា ” យើងទទួលបានសំណើពីសហជីព ហើយបច្ចុប្បន្ននេះយើងកំពុងពិចារណាសំណើនោះ”។ មន្ទីរការងារខេត្តគ្រោងសម្របសម្រួលការចរចារវាងភាគីទាំងពីរនៅថ្ងៃនេះ។
នៅក្នុងការតវ៉ាដាច់ដោយឡែកមួយទៀតកាលពីម្សិលមិញ ដែលដឹកនាំដោយស៊ីខៅឌូដែរនោះ កម្មករប្រហែល៣០០នាក់មកពីរោងចក្រកាត់ដេរ XinFang ដែលកាន់កាប់ដោយជនជាតិចិនតៃវ៉ាន់បានហែក្បួនទៅក្រសួងការងារទាមទារឲ្យអាជ្ញាធរធ្វើអន្តរាគមន៍ក្នុងវិវាទរបស់ខ្លួន។
ក្រុមនេះបានធ្វើដំណើរប្រហែល១០គីឡូម៉ែត្រពីរោងចក្រដែលស្ថិតក្នុងខណ្ឌពោធិ៍សែនជ័យ រាជធានីភ្នំពេញ ទៅក្រសួងនេះស្ថិតនៅតាមមហាវិថីសហព័ន្ធរុស្សី ជាទីដែលតំណាងកម្មករ១៥នាក់ត្រូវបានអញ្ជើញឲ្យចូលខាងក្នុងដើម្បីជួបប្រជុំជាមួយមន្ត្រីទាំងនោះ។ ទោះជាយ៉ាងណា មិនមានដំណោះស្រាយទេ។
កម្មកររោងចក្រ XinFang បានធ្វើកូដកម្មតាំងពីថ្ងៃទី១៨ ខែសីហាមកជុំវិញការទាមទារ១៩ចំណុច រួមមានប្រាក់ឧបត្ថម្ភថ្លៃបាយថ្ងៃត្រង់ ប្រាក់កម្រៃសម្រាប់ស្ត្រីមានផ្ទៃពោះ និងស្ត្រីទើបសម្រាលកូន ប្រាក់ឧបត្ថម្ភ៣ដុល្លារសម្រាប់ការធ្វើការនៅថ្ងៃបុណ្យ និងប្រាក់ឧបត្ថម្ភថ្លៃស្នាក់នៅ១៥ដុល្លារក្នុងមួយខែ។
រយៈពេលពីរថ្ងៃបន្ទាប់ពីដំណោះស្រាយដំបូងរបស់ខ្លួន កម្មករក៏បានចាប់ផ្ដើមអំពាវនាវឲ្យយកអ្នកស្រី សុត ចន្ធូ និង ឆេន សុវណ្ណា ជាតំណាងស៊ីខៅឌូនៅក្នុងរោងចក្រនេះដែលជាសកម្មជនសហជីពចូលធ្វើការវិញ បន្ទាប់ពីអ្នកទាំងពីរដែលបានបង្កើតសាខាសហជីពត្រូវបានបណ្ដេញចេញមក។ រោងចក្រអះអាងថា ស្ត្រីទាំងពីរនាក់នេះបានបញ្ចប់កិច្ចសន្យារបស់ខ្លួនហើយ។
លោក វង់ ថាវិន ប្រធានរដ្ឋបាលនៅរោងចក្រ XinFang បានមានប្រសាសន៍ថា រោងចក្រមិនអាចឆ្លើយតបតាមការទាមទាររបស់កម្មករបានទេរហូតដល់ថ្ងៃទី១២ ខែកញ្ញា នៅពេលប្រធានក្រុមហ៊ុនត្រឡប់មកប្រទេសកម្ពុជាវិញ។
លោកបានមានប្រសាសន៍ថា ” ខ្ញុំគ្មានលទ្ធភាពដោះស្រាយបញ្ហានេះទេ។ យើងរង់ចាំប្រធានមកដល់សិន”៕ សារុន