យោងតាមសាក្សីបានឲ្យដឹងថា សមាជិកសភាគណបក្សប្រជាជនកម្ពុជាម្នាក់ មកពីខេត្តព្រះវិហារ ត្រូវបានបណ្តេញចេញពីវត្តមួយនៅរាជធានីភ្នំពេញកាលពីម្សិលមិញ បន្ទាប់ពីបានធ្វើឲ្យអ្នកភូមិខឹងខ្លាំង ដោយសារតែមិនបានបង្ហាញការយល់ស្របដល់ជម្លោះដីធ្លីរបស់ពួកគាត់។
កាលពីម្សិលមិញ លោក សួស យ៉ារ៉ា សមាជិកសភាម្នាក់មកពីខេត្តព្រះវិហារ បានធ្វើដំណើរទៅវត្តសាមគ្គីរង្សី ដើម្បីជួបជាមួយប្រជាពលរដ្ឋ១៥៦គ្រួសារមកពីខេត្តនេះ ដែលបាននិងកំពុងធ្វើបាតុកម្មនៅរាជធានីភ្នំពេញ ដើម្បីអំពាវនាវដល់អាជ្ញាធរថ្នាក់ជាតិជួយធ្វើអន្តរាគមន៍ក្នុងជម្លោះរបស់ពួកគាត់អំពីដី៥៧០ហិកតា។
ព្រះតេជគុណថាច់ ហាសំអាង ចៅអធិការរង វត្តសាមគ្គីរង្សី បានមានសង្ឃដីកាថា ក្រៅតែពីមិនបានជួយ លោក យ៉ារ៉ា បានត្រឹមតែធ្វើឲ្យអ្នកភូមិខឹងទៅវិញ។
ព្រះតេជគុណ ថាច់ ហាសំអាង បានមានសង្ឃដីកាថា “ហេតុអ្វីបានជាប្រជាពលរដ្ឋធ្វើដំណើរមករាជធានីភ្នំពេញដើម្បីតវ៉ាទាមទារដីរបស់ពួកគាត់”។
ព្រះតេជគុណ មានសង្ឃដីកាថា “គាត់បានព្យាយាមឃាត់យើងមិនឲ្យមានសង្ឃដីកា…គាត់មកធ្វើឲ្យអ្នកភូមិខឹង។ គាត់មិនបានមករកដំណោះស្រាយឲ្យអ្នកភូមិទេ ប៉ុន្តែគាត់មកគំរាមនិងបំភិតបំភ័យទៅវិញ”។
វីដេអូរយៈពេល៦នាទីដែលបង្ហោះលើបណ្តាញទំនាក់ទំនងសង្គមហ្វេសប៊ុក បានបង្ហាញការឆ្លងឆ្លើយបញ្ចេញកំហឹងដាក់គ្នារវាងលោក យ៉ារ៉ា ព្រះសង្ឃ និងអ្នកភូមិ។
បន្ទាប់ពីការពិភាក្សាគ្នាប្រហែល២នាទី ព្រះសង្ឃចាប់ផ្តើមស្រែក និងចង្អុលលោក យ៉ារ៉ា។
លោក យ៉ារ៉ា បានតបវិញថា “ប្រសិនបើព្រះតេជគុណនៅតែបង្អាក់រំខានខ្ញុំ តើខ្ញុំនិយាយយ៉ាងម៉េចកើត?”។
បន្ទាប់មក សមាជិកសភារូបនេះបានដើរសំដៅទៅរកច្រកចេញពីវត្ត ក្នុងពេលដែលព្រះសង្ឃជាច្រើនអង្គបន្តស្រែកដាក់។ នៅទីបញ្ចប់ លោកបានរត់ចេញទាំងបាតជើងសព្រាតពីអគារភ្លាមមួយរំពេច ខណៈដែលព្រះសង្ឃនិងអ្នកភូមិមួយចំនួនតូចដេញតាមពីក្រោយ។
ប៉ុន្តែ ព្រះតេជគុណ ថាច់ ហាសំអាង បានបដិសេធថា ព្រះសង្ឃមិនបានដេញលោក យ៉ារ៉ា ទេ។
ព្រះតេជគុណ បានមានសង្ឃដីកាថា “យើងមិនបានដេញគាត់ចេញ ឬ ព្យាយាមវាយគាត់ទេ ប៉ុន្តែ គាត់ខ្លាច ហើយបានរត់ចេញដោយខ្លួនឯង”៕មានិត