អ្នកចរចារបស់គណបក្សប្រជាជនកម្ពុជានិងគណបក្សសង្គ្រោះជាតិបានលើកឡើងថា ខ្លួនបានពិភាក្សាគ្នាលើសេចក្តីលម្អិតមួយចំនួននៃច្បាប់ថ្មីដែលគ្រប់គ្រងគណៈកម្មាធិការជាតិរៀបចំការបោះឆ្នោត (គ.ជ.ប.) បន្ទាប់ពីកិច្ចពិភាក្សាកាលពីថ្ងៃច័ន្ទ ហើយពួកគេរំពឹងថា នឹងបញ្ចប់សេចក្តីព្រាងច្បាប់នេះឲ្យរួចរាល់នៅដំណាច់ខែនេះ។
គណបក្សប្រឆាំងបានរិះគន់ គ.ជ.ប. ជាយូរមកហើយថា បានជួយគណបក្សប្រជាជនកម្ពុជានៅក្នុងការបោះឆ្នោត។ ការទាមទារឲ្យរៀបចំ គ.ជ.ប. ឡើងវិញ គឺជាការទាមទារមួយក្នុងចំណោមការទាមទារសំខាន់ៗមួយចំនួនរបស់គណបក្សសង្គ្រោះជាតិដែលគណបក្សប្រជាជនកម្ពុជាបានយល់ព្រមដោះស្រាយដើម្បីបញ្ចប់ភាពជាប់គាំងផ្នែកនយោបាយរយៈពេលជិតមួយឆ្នាំ បន្ទាប់ពីគណបក្សកាន់អំណាចទទួលបានជ័យជម្នះដ៏ចម្រូងចម្រាសនៅក្នុងការបោះឆ្នោតជាតិកាលពីឆ្នាំមុន។
អ្នកចរចារបស់គណបក្សប្រជាជនកម្ពុជាដែលទទួលបន្ទុកចរចាស្ដីពីច្បាប់ គ.ជ.ប.ថ្មីរួមមានលោក សក់ សេដ្ឋា រដ្ឋលេខាធិការក្រសួងមហាផ្ទៃ។
លោក សក់ សេដ្ឋា បានមានប្រសាសន៍ថា “មកទល់ពេលនេះ គេពិភាក្សាបានពីរជំពូករួចហើយ ហើយយើងនៅមានបញ្ហាមួយចំនួនទៀតដែលចាំបាច់ត្រូវបញ្ជាក់ ។ បញ្ហាទាំងនោះមានដូចជា ការបង្កើតគណៈកម្មការមណ្ឌលបោះឆ្នោត ច្បាប់និងការទទួលខុសត្រូវរបស់គណៈកម្មការរៀបចំកាបោះឆ្នោតខេត្ត និងគណៈកម្មការរៀបចំការបោះឆ្នោតឃុំ-សង្កាត់ ព្រមទាំងការិយាល័យបោះឆ្នោតផងដែរ”។
លោក គួយ ប៊ុនរឿន អ្នកចរចាម្នាក់ក្នុងចំណោមអ្នកចរចាសំខាន់ៗរបស់គណបក្សសង្គ្រោះជាតិបានលើកឡើងថា កាលពីថ្ងៃច័ន្ទ គណបក្សទាំងពីរបានយល់ព្រមថា គណៈកម្មការថ្នាក់ក្រោមជាតិគួរតែមានសមាជិកមកពីគណបក្សនីមួយៗចន្លោះពីប្រាំនាក់ទៅប្រាំពីរនាក់ ដោយអាស្រ័យលើទំហំនៃខេត្ត ឃុំ សង្កាត់ ឬមណ្ឌលបោះឆ្នោតដែលខ្លួនគ្រប់គ្រង។
សព្វថ្ងៃគណៈកម្មការទាំងនេះមានសមាជិកចំនួនប្រាំពីររូបដោយមិនគិតពីទំហំនៃតំបន់ដែលខ្លួនគ្រប់គ្រង។
លោក ប៊ុនរឿន បានលើកឡើងទៀតថា ប្រធានបទសម្រាប់ការចរចានៅពេលក្រោយស្ដីពីច្បាប់នេះនឹងរួមបញ្ចូលសេចក្ដីលម្អិតស្ដីពីការផ្ដល់ឲ្យ គ.ជ.ប. ដែលត្រូវបានធ្វើកំណែទម្រង់រួចនូវថវិកាស្វយ័ត ដែលរួមមានសិទ្ធិរៃអង្គាសប្រាក់ដោយខ្លួនឯង និងមានស្វយ័តភាពចំពោះថា តើត្រូវចំណាយមូលនិធិនោះតាមរបៀបណា។
លោកសង្ឃឹមថា សេចក្ដីព្រាងច្បាប់នេះនឹងត្រូវបញ្ចប់រួចរាល់នៅដំណាច់ខែនេះ ហេតុដូច្នេះគណបក្សទាំងពីរអាចបន្តការងារធ្វើកំណែទម្រង់ច្បាប់បោះឆ្នោតបច្ចុប្បន្នរបស់ប្រទេសកម្ពុជាបន្តទៀត។
លោក សេដ្ឋា បានលើកឡើងបន្ថែមទៀតថា កិច្ចប្រជុំលើកក្រោយស្ដីពីច្បាប់ គ.ជ.ប.ថ្មីនេះ គឺគ្រោងធ្វើនៅថ្ងៃទី២៩ ខែកញ្ញា។ លោកក៏សង្ឃឹមផងដែរថា នឹងអាចបញ្ចប់សេចក្ដីព្រាងច្បាប់នេះរួចរាល់នៅដំណាច់ខែនេះ ប៉ុន្តែបានលើកឡើងថា ការងារនេះអាចអូសបន្លាយដល់ខែតុលា។
ទោះជាយ៉ាងណា ច្បាប់ថ្មីនេះនឹងមិនដោះស្រាយអំពីបញ្ហាថា តើនរណានឹងក្លាយជាសមាជិកទាំង៩របស់ គ.ជ.ប.នោះទេ។ គណបក្សនីមួយៗត្រូវតែជ្រើសរើសសមាជិកចំនួនបួនរូបរបស់ខ្លួន។ ប៉ុន្តែបន្ទាប់ពីពួកគេបានឯកភាពគ្នាជ្រើសរើសលោកស្រី ពុង ឈីវកេក អ្នកតស៊ូមតិសម្រាប់សិទ្ធិមនុស្សដ៏លេចធ្លោឲ្យធ្វើជាសមាជិកទី៩កាលពីខែកក្កដានោះ គណបក្សប្រជាជនកម្ពុជាបានច្រានចោលលក្ខខណ្ឌមួយក្នុងចំណោមលក្ខខណ្ឌចំនួនបី ដែលលោកស្រីបានដាក់ចេញសម្រាប់ការទទួលយកតំណែងរបស់ខ្លួន។ លក្ខខណ្ឌដែលត្រូវបានច្រានចោលនោះគឺថា សមាជិក គ.ជ.ប.ទាំងអស់ត្រូវមានអភ័យឯកសិទ្ធិស្របច្បាប់។
លោក ប៊ុនរឿន បានមានប្រសាសន៍ទៀតថា គណបក្សសង្គ្រោះជាតិនៅតែសង្ឃឹមថា នឹងឃើញលោកស្រី ពុង ឈីវកេក ក្លាយជាសមាជិកទី៩នេះ។
លោក សេដ្ឋា បានលើកឡើងថា គណបក្សទាំងពីរនឹងព្យាយាមដោះស្រាយបញ្ហាបន្ទាប់ពីការចរចាស្ដីពីច្បាប់ គ.ជ.ប.ថ្មីត្រូវបានបញ្ចប់៕ ស៊ុយឈាង