កាលពីម្សិលមិញ សមាជិកក្រុមប្រឹក្សារាជធានីមកពីគណបក្សសង្គ្រោះជាតិបានដើរចេញពីកិច្ចប្រជុំមួយរបស់ក្រុមប្រឹក្សារាជធានីភ្នំពេញ ដើម្បីជាការតវ៉ា បន្ទាប់ពីសមភាគីមកពីគណបក្សប្រជាជនកម្ពុជាមិនព្រមពន្យារពេលបោះឆ្នោតជ្រើសរើសបេក្ខភាពជំនួសសមាជិកមួយរូបក្នុងចំណោមសមាជិក៧រូបនៃគណៈកម្មការលទ្ធកម្មរាជធានី។
ក្រុមប្រឹក្សារាជធានី ដែលមានសមាជិក២១រូប ត្រូវបោះឆ្នោតជ្រើសរើសបុគ្គល៣រូបនៅក្នុងក្រុមប្រឹក្សានេះឲ្យចូលកាន់មុខតំណែងនៅក្នុងគណៈកម្មការលទ្ធកម្ម ហើយកាលពីម្សិលមិញត្រូវដល់ពេលបោះឆ្នោតបន្តដើម្បីជ្រើសរើសបេក្ខជន១រូប។ ប៉ុន្តែនៅពេលក្រុមប្រឹក្សារាជធានីចំនួន៦រូបមកពីគណបក្សសង្គ្រោះជាតិមើលឃើញថា បេក្ខជនរូបនោះមកពីគណបក្សប្រជាជនកម្ពុជា ពួកគាត់ក៏បានទទូចឲ្យពន្យារពេលបោះឆ្នោត ដោយសង្ឃឹមថា នឹងមានឱកាសដាក់បេក្ខភាពរបស់គណបក្សសង្គ្រោះជាតិជំនួសវិញ។
លោក ម៉ន ផល្លា មកពីគណបក្សសង្គ្រោះជាតិបានមានប្រសាសន៍ថា ” យើងចង់ឲ្យមានសមាជិក១រូបរបស់គណបក្សសង្គ្រោះជាតិនៅក្នុងគណៈកម្មការនេះ ដើម្បីការពារផលប្រយោជន៍របស់សាធារណជន”។ លោកបានលើកឡើងទៀតថា ប៉ុន្តែនៅពេលក្រុមប្រឹក្សាមិនព្រមពន្យារពេលបោះឆ្នោត ” យើងក៏ដើរចេញតែម្ដង”។
លោក គឹម សុភា សមាជិកក្រុមប្រឹក្សាមកពីគណបក្សសង្គ្រោះជាតិបានមានប្រសាសន៍ថា ក្រុមប្រឹក្សាទទួលបានព័ត៌មានលម្អិតតិចតួចណាស់អំពីអំណាចគ្រប់គ្រងរបស់រាជធានី ហើយចង់ដាក់បេក្ខភាព១រូបរបស់ខ្លួននៅក្នុងគណៈកម្មការលទ្ធកម្ម ដើម្បីធ្វើឲ្យប្រាកដថា សាធារណជនទទួលបានដំណោះស្រាយល្អបំផុត។
លោកបានមានប្រសាសន៍ទៀតថា ” នៅពេលយើងប្រជុំក្រុមប្រឹក្សារាជធានី យើងតែងតែទទួលបានរបាយការណ៍ចុងក្រោយ មិនដែលទទួលបានរបាយការណ៍លម្អិតទេ។ ប៉ុន្តែនៅពេលយើងចូលរួមនៅក្នុងគណៈកម្មការនេះ យើងនឹងទទួលបានរបាយការណ៍លម្អិត”។
ទោះបីជាមានការដើរចេញពីខាងគណបក្សសង្គ្រោះជាតិក្ដី ក៏ការបោះឆ្នោតនៅតែបន្តដំណើរការ ហើយក្រុមប្រឹក្សាបានបោះឆ្នោតជ្រើសរើសលោក ជួប ខុន សមាជិកក្រុមប្រឹក្សាមកពីគណបក្សប្រជាជនកម្ពុជា។
លោក សុខ សេក សមាជិកក្រុមប្រឹក្សាមកពីគណបក្សសង្គ្រោះជាតិបានមានប្រសាសន៍ថា “ទោះបីជាយើងបានធ្វើពហិការកិច្ចប្រជុំក្ដី ក៏ពួកគេនៅតែបន្តដំណើរការដដែល ពីព្រោះពួកគេមានសំឡេងភាគច្រើន”។
លោក ឡុង ឌីម៉ង់ អ្នកនាំពាក្យសាលារាជធានីបាននិយាយការពារការបោះឆ្នោតនេះ។លោកបានមានប្រសាសន៍ថា ” ការធ្វើពហិការនេះមិនត្រឹមត្រូវទេ ពីព្រោះយោងតាមសារាចររបស់អន្តរក្រសួង សមាជិកក្រុមប្រឹក្សារាជធានីធ្វើសេចក្ដីសម្រេចដោយសំឡេងឆ្នោតភាគច្រើន៥០ភាគរយបូក១ ហើយពួកគាត់បានព្រមព្រៀងជ្រើសរើសបុគ្គលមួយរូប គឺឯកឧត្តម ជួប ខុន ដូច្នេះយើងមិនអាចធ្វើឲ្យមានបញ្ហាផ្ទៃក្នុងបានឡើយ។ គ្មានគោលការណ៍ណាដែលចែងថា សមាជិក២រូបត្រូវតែមកពីគណបក្សប្រជាជនកម្ពុជា ហើយ១រូបមកពីគណបក្សសង្គ្រោះជាតិនោះទេ”៕ សុខុម