មន្ត្រីបាននិយាយកាលពីម្សិលមិញថា អ្នកនាំពាក្យស្ថានទូតវៀតណាម ដែលពាក្យសម្តីដ៏ចម្រូងចម្រាសរបស់អ្នកនាំពាក្យរូបនេះ អំពីប្រវត្តិសាស្ត្រនៃទឹកដីកម្ពុជាក្រោម បានបង្កឲ្យមានការតវ៉ាជាតិនិយម កាលពីខែកក្កដានិងខែសីហានោះ នឹងត្រូវផ្លាស់ប្តូរចេញ។
លោក កុយ គួង អ្នកនាំពាក្យក្រសួងការបរទេសកម្ពុជាបានថ្លែងបន្ទាប់ពីជំនួបរវាង លោក ហោ ណាំហុង រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ លោក ផាម ក្វាងវិញ អនុរដ្ឋមន្ត្រីក្រសួងការបរទេសវៀតណាម និងលោក ថាច់ ឌូ (Thach Du) ឯកអគ្គរដ្ឋទូតវៀតណាមទើបតែងតាំងថ្មី ថា “ស្ថានទូតវៀតណាមនឹងធ្វើកំណត់ទូតផ្ញើជូនក្រសួងការបរទេសរបស់យើង ដើម្បីផ្លាស់អ្នកនាំពាក្យស្ថានទូតវៀតណាម លោក ត្រាន វ៉ានថុង”។
លោក កុយ គួង បានមានប្រសាសន៍ថា អ្នកទាំង៣បានជួបគ្នាកាលពីម្សិលមិញនៅក្រសួងការបរទេស ដើម្បីពិភាក្សាអំពីការតវ៉ា ក៏ដូចជាជម្លោះសមុទ្រចិនខាងត្បូង និងទំនាក់ទំនងរវាងប្រទេសវៀតណាមនិងប្រទេសចិន។ លោកបានបន្ថែមថា លោកមិនបានដឹងថា អ្នកនាំពាក្យថ្មីនឹងមកដល់ប្រទេសកម្ពុជានៅពេលណាទេ។
លោក ម៉ៅ ពិសេស ប្រធានសហព័ន្ធនិស្សិតបញ្ញវន្តខ្មែរ បានមានប្រសាសន៍ថា ទោះជាមានការប្តូរអ្នកនាំពាក្យក៏ដោយ ក៏ការតវ៉ាដែលគ្រោងទុកប្រឆាំងសម្តីរបស់លោក ត្រាន វ៉ានថុង និងការបដិសេធរបស់ប្រទេសវៀតណាមមិនសុំអភ័យទោសនោះ នឹងនៅតែបន្តធ្វើដដែល។
លោកបានបន្ថែមថា “បើប្រទេសវៀតណាមគ្រាន់តែធ្វើប៉ុណ្ណឹង យើងមិនអាចទទួលយកបានទេ…។ ដូច្នេះយើងត្រូវតែទាមទារឲ្យប្រទេសវៀតណាមចេញកំណត់ទូតច្បាស់លាស់មួយ អំពីទឹកដីកម្ពុជាក្រោម ដែលបញ្ជាក់ថា លោក ត្រាន វ៉ានថុង ជាអ្នកនាំពាក្យ យល់ច្រឡំប្រវត្តិសាស្ត្រ”៕ មានិត