កាលពីថ្ងៃសុក្រ ក្រសួងមហាផ្ទៃបានបង្ហាញឯកសារនិងត្រារដ្ឋាភិបាលក្លែងក្លាយជាច្រើន ដែលត្រូវបានរកឃើញក្នុងផ្ទះមួយនៅទីក្រុងភ្នំពេញ និងបានឲ្យដឹងថា ខ្លួនបានពង្រីកការស៊ើបអង្កេតលើសពីមនុស្ស៣នាក់ដែលត្រូវបានចាប់ខ្លួនរួចទៅហើយនោះ។
នគរបាលព្រហ្មទណ្ឌក្រសួងមហាផ្ទៃ កាលពីថ្ងៃសុក្របានឆ្មក់ចូលផ្ទះមួយនៅខណ្ឌដូនពេញ របស់ឈ្មោះ នៅ សាខន អាយុ៥២ឆ្នាំ ដែលនៅផ្ទះនោះ គេបានរកឃើញត្រាក្លែងក្លាយ ដែលដូចត្រារបស់ស្ថាប័នរដ្ឋមួយចំនួន ព្រមទាំងត្រាផ្ទាល់ខ្លួនរបស់លោក កែប ជុតិមា សមាជិកសភាគណបក្សប្រជាជនកម្ពុជា និងរបស់លោក ម៉ៅ ចាន់ដារ៉ា អគ្គនាយកនៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃ។
លោកឧត្តមសេនីយ៍ទោ អិុន បូរ៉ា ប្រធាននាយកដ្ឋាននគរបាលព្រហ្មទណ្ឌ បានមានប្រសាសន៍ថា លោក សាខន ក៏ដូចជាលោក សោម ឧត្តមរស្មី អាយុ២៤ឆ្នាំ និងលោក ញ៉េប វណ្ណា អាយុ៥១ឆ្នាំ នឹងឡើងសាលាដំបូងរាជធានីនៅថ្ងៃអាទិត្យ។
លោកបានមានប្រសាសន៍ថា “ឥឡូវនេះ យើងកំពុងស៊ើបអង្កេតមនុស្សផ្សេងទៀតដែលពាក់ព័ន្ធក្នុងករណីនេះ ក្រៅពីមនុស្សទាំង៣នាក់នេះ ដូច្នេះយើងមិនអាចផ្តល់ព័ត៌មានបន្ថែមបានឡើយ”។
អគ្គស្នងការដ្ឋាននគរបាលជាតិបានបង្ហោះព័ត៌មានលម្អិតនៃការស៊ើបអង្កេតលើគេហទំព័ររបស់ខ្លួនកាលពីថ្ងៃព្រហស្បតិ៍។
ព័ត៌មានទាំងនោះបានស្រង់សម្តីលោក ម៉ក់ ជីតូ ប្រធាននាយកដ្ឋានកណ្តាលនគរបាលយុត្តិធម៌ ដែលបានមានប្រសាសន៍ថា ការស៊ើបអង្កេតត្រូវបានធ្វើឡើងបន្ទាប់ពីឯកសារក្លែងក្លាយមួយមានហត្ថលេខា ត្រា ហើយនិងអាជ្ញាប័ណ្ណរបស់ក្រសួងពាណិជ្ជកម្មត្រូវបានគេរកឃើញ។
លោក ម៉ក់ ជីតូ មិនអាចទាក់ទងសុំការអធិប្បាយបានទេកាលពីថ្ងៃសុក្រ។ ទោះជាយ៉ាងនេះក្តី លោក អ៊ាវ រិទ្ធ នាយការិយាល័យព្រហ្មទណ្ឌនៃក្រសួងមហាផ្ទៃ បានបញ្ជាក់ថា ក្រសួងពាណិជ្ជកម្មបានជាប់ពាក់ព័ន្ធ។
លោក អ៊ាវ រិទ្ធ បានមានប្រសាសន៍ថា “ក្រសួងពាណិជ្ជកម្មជាដើមបណ្តឹងក្នុងសំណុំរឿងនេះ។ យើងកំពុងសើុបអង្កេតមនុស្សជាច្រើននាក់ទៀត ដែលពាក់ព័ន្ធក្នុងការធ្វើឯកសារក្លែងក្លាយ”។
លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា លោករវល់ណាស់មិនអាចអធិប្បាយអំពីករណីនេះបានទេ។
ការរកឃើញឯកសារក្លែងក្លាយរបស់ក្រសួងពាណិជ្ជកម្មនេះបាននាំឲ្យនគរបាលទៅដល់ផ្ទះលោក សាខន ដែលនៅផ្ទះនោះគេបានរកឃើញត្រាប្រហែល១.០៥០ ពុម្ពដែកចំនួន៣៧ និងពុម្ពស្ពាន់ចំនួនពីរ ហើយនឹងឧបករណ៍ដែលគេប្រើដើម្បីផលិតឯកសារក្លែងក្លាយទាំងនេះ។
ត្រាក្លែងក្លាយរួមមានត្រារបស់ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ ក្រសួងការបរទេស ក្រសួងយុត្តិធម៌ ក្រសួងអប់រំ ក្រសួងកសិកម្ម និងត្រារបស់ធនាគារជាតិផងដែរ។
ការចាប់បាននេះ ក៏រួមមានទាំងត្រាក្លែងក្លាយរបស់នគរបាលជាតិ ស្នងការដ្ឋាននគរបាលប្រាំខេត្ត អង្គភាពអង្គរក្សរបស់លោកនាយករដ្ឋមន្ត្រី សាលាដំបូងរាជធានីភ្នំពេញ និងរបស់ស្ថាប័នជាច្រើនផ្សេងទៀត៕មានិត