ខ្ទមចំនួន១៦ចុងក្រោយដែលនៅជាប់គម្រោងអភិវឌ្ឍន៍ដ៏ធំមួយនៅក្នុងខណ្ឌជ្រោយចង្វាក្នុងរាជធានីភ្នំពេញត្រូវវាយកម្ទេចចោលដោយក្រុមហ៊ុនវិនិយោគទុន អាណិកជនកម្ពុជា (OCIC) កាលពីម្សិលមិញ។
អ្នកភូមិប្រាំពីរគ្រួសារ នៅភូមិដើមគរ២ កន្លែងដែលត្រូវបានបូមខ្សាច់ចាក់ពេញយ៉ាងឆាប់រហ័សដោយក្រុមហ៊ុន OCIC នោះបានទទួលយកសំណងចំនួន៥០០ដុល្លារកាលពីថ្ងៃសុក្រ មុនពេលខ្ទមរបស់ពួកគាត់ត្រូវបានវាយកម្ទេច។ អ្នកភូមិប្រាំគ្រួសារទៀតយល់ព្រមទទួលសំណងកាលពីថ្ងៃអាទិត្យ ហើយអ្នកភូមិបួនគ្រួសារចុងក្រោយដែលក្រាញមិនព្រមចាកចេញបានទទួលយកសំណងកាលពីព្រឹកម្សិលមិញមុនពេលខ្ទមរបស់ពួកគាត់ត្រូវបានវាយកម្ទេច។
លោក យ៉ាន យឿន អាយុ៤៨ឆ្នាំ ជាអតីតយោធិនពិការបាននិយាយថា “ប្រសិនបើខ្ញុំមិនទទួលយក [សំណងជាប្រាក់ចំនួន៥០០ដុល្លារ] ទេនោះ ពួកគេនឹងបន្តបូមខ្សាច់ដដែល ហើយពេលនោះយើងនឹងត្រូវកប់ដោយដីខ្សាច់ជាមិនខាន ប៉ុន្តែ ខ្ញុំបានទទួលយកសំណងនោះ ពីព្រោះខ្ញុំត្រូវការឲ្យក្រុមគ្រួសាររបស់ខ្ញុំរស់បន្តទៀតនៅពេលអនាគត”។
លោក ខន សុគន្ធ អាយុ៥៣ឆ្នាំ ជាអតីតយោធិនដែរបាននិយាយថា លោកមានបំណងក្រាញមិនចង់ចាកចេញទេ ពីព្រោះលោកពិការភ្នែក។
លោកបាននិយាយមុនពេលខ្ទមរបស់គាត់ត្រូវបានវាយកម្ទេចថា “ខ្ញុំអស់សង្ឃឹមខ្លាំងណាស់។ ក្នុងនាមជាជនពិការភ្នែក វាជាការប្រសើរណាស់សម្រាប់ខ្ញុំរស់នៅទីនេះ ដូច្នេះតើឲ្យខ្ញុំរកកន្លែងរស់នៅថ្មីដោយមិនបាច់ជួលដូចម្ដេចទៅ?”។
លោក សុគន្ធ បាននិយាយថា ទោះជាយ៉ាងណា ទីបំផុតលោក និងអ្នកភូមិបួនគ្រួសារផ្សេងទៀត ទទួលបានដីមួយក្បាលតូចនៅក្នុងខណ្ឌដង្កោ តែពួកគាត់ត្រូវជួលដីនោះក្នុងតម្លៃ១០០ដុល្លារក្នុងមួយឆ្នាំ។
នៅកន្លែងដែលខ្ទមទាំងនោះត្រូវបានវាយកម្ទេចនោះ ប្រព័ន្ធទឹកដែលទើបជីកថ្មីៗត្រូវបានជីកកាត់កន្លែងនោះកាលពីម្សិលមិញ។ បំណែកខ្ទមរាយបា៉យនៅលើដីជាប់នឹងរបស់សេសសល់ផ្សេងៗទៀតដែលគេទុកចោលនៅទីនោះដូចជា ស្បែកជើង និងបែលជាដើម ។ ប៉ុន្តែ ប្រជាជនធ្លាប់ហៅកន្លែងនោះថា ជាផ្ទះរបស់ខ្លួន។
លោក ទូច សំណាង អ្នកគ្រប់គ្រងគម្រោងរបស់ក្រុមហ៊ុន OCIC បានមានប្រសាសន៍ថា ក្រុមហ៊ុនដែលកំពុងអភិវឌ្ឍក្រុងរណបដែលចំណាយទឹកប្រាក់៣ពាន់លានដុល្លារ នៅលើអតីតដីនោះ នឹងមិនផ្តល់សំណងដល់អ្នកភូមិផ្សេងទៀតដែលរស់នៅលើដីនោះឡើយ។
លោកបានមានប្រសាសន៍ថា “នៅពេលក្រោយប្រសិនបើយើងជួបស្ថានភាពជាមួយប្រជាជនដូចនេះទៀត យើងនឹងមិនជួយពួកគាត់ឡើយ”៕សារុន