លទ្ធផលដំបូងនៃការសិក្សាអង្កេតថ្មីបង្ហាញថា ជាង៤០ភាគរយនៃកម្មករកាត់ដេរមានជំងឺកង្វះឈាមក្រហម ហើយមួយភាគបីប៉ុណ្ណោះមានអាហារបរិភោគគ្រប់គ្រាន់។
ការសិក្សារយៈពេលមួយឆ្នាំ ដែលផ្តល់មូលនិធិដោយកម្មវិធីរោងចក្រល្អប្រសើរនៅកម្ពុជារបស់អង្គការពលកម្មអន្តរជាតិ និងទីភ្នាក់ងារអភិវឌ្ឍន៍បារាំង មានបំណងស្វែងយល់អំពីផលទាក់ទងនឹងការផ្តល់អាហារមួយពេលក្នុងមួយថ្ងៃដោយឥតគិតថ្លៃដល់កម្មករកាត់ដេរកម្ពុជា។
លទ្ធផលបឋមដែលចេញកាលពីថ្ងៃច័ន្ទបានបង្ហាញថា ក្នុងចំណោមកម្មករ៣.៩៨០នាក់ដែលគេចុះសាកសួរនៅ១០រោងចក្រ ១៥,៧ភាគរយខ្វះទម្ងន់ ពីរភាគបី “ខ្វះអាហារ” ពោលគឺ ពួកគេមិនមានអាហារមានជីវជាតិគ្រប់គ្រាន់ទេ ហើយ៤៣,២ភាគរយមានជំងឺកង្វះឈាមក្រហម ដែលអាចនាំឲ្យកើតមានសម្ពាធឈាមទាប ហេវហត់អស់កម្លាំង និងដួលសន្លប់។
របាយការណ៍មួយដែលផ្សព្វផ្សាយកាលពីខែកញ្ញាឆ្នាំមុនដោយក្រុមតស៊ូមតិកម្ពុជានិងអង់គ្លេស អះអាងថា ៣៣ភាគរយនៃកម្មកររោងចក្រខ្វះអាហារូបត្ថម្ភ ហើយថា កម្មករម្នាក់ៗគួរចាយ២,៥០ដុល្លារក្នុងមួយថ្ងៃលើម្ហូបអាហារ ដើម្បីបង្គ្រប់កាឡូរីរបស់ខ្លួន។ ប៉ុន្តែការសិក្សាថ្មីនេះបានរកឃើញថា កម្មករកាត់ដេរចំណាយតែ១,៣០ដុល្លារប៉ុណ្នោះលើអាហារក្នុងមួយថ្ងៃ។
ចំណែកឯលទ្ធផលនៃការសិក្សានេះជាទូទៅក៏ស្របតាមចំនួនកម្មករស្ត្រីភាគច្រើនដែរនោះ លោកស្រី ជីល ថាកឃើ នាយកគម្រោងកម្មវិធីរោងចក្រល្អប្រសើរ បានមានប្រសាសន៍ថា លោកស្រីរំពឹងថា ចំនួនអ្នកកើតជំងឺកង្វះឈាមក្រហមនឹងថយចុះ ប្រសិនបើកម្មករដែលត្រូវគេសិក្សាអង្កេតទាំងនោះ បានទទួលប្រាក់ចំណូលទៀងទាត់។
លោកស្រី ថាកឃើ ក៏បានមានប្រសាសន៍ដែរថា ដើម្បីលើកកម្ពស់ស្តង់ដារសុខភាព រោងចក្រត្រូវលើកទឹកចិត្តឲ្យផ្តល់អាហារនៅនឹងកន្លែងដល់កម្មករ ជាជាងបើកប្រាក់ឧបត្ថម្ភថ្លៃអាហាររបស់គេ។
លោកស្រីបានមានប្រសាសន៍ថា “ច្បាស់ណាស់ថា ការផ្តល់ប្រាក់បន្ថែមតែមួយមុខមិនមានន័យថា ពួកគេបរិភោគបានច្រើន ឬថាពួកគេបរិភោគបានប្រសើរជាងមុននោះទេ ពួកគេមិនទំនងជាចំណាយលុយច្រើនលើអាហារផ្ទាល់ខ្លួននោះទេ ពួកគេចង់ផ្ញើប្រាក់កាសទៅស្រុក” ឬចាយវាយលើចំណាយជីវភាពផ្សេងៗ។
លោក អៀន រ៉េមេជន៍ នាយកក្រុមហ៊ុនអង្គរស្រាវជ្រាវនិងផ្តល់ប្រឹក្សា អិលធីឌី ដែលដឹកនាំការសិក្សានេះ បានមានប្រសាសន៍ថា ឥឡូវនេះរោងចក្រត្រូវបានចែកជាពីរក្រុម ដោយរោងចក្រពាក់កណ្តាលផ្តល់អាហារប្រចាំថ្ងៃឥតគិតថ្លៃមួយពេលដល់កម្មកររបស់ខ្លួន ហើយពាក់កណ្តាលទៀតមិនបានផ្តល់អ្វីជូនកម្មករទេ ដូច្នេះទើបសុខភាពនិងលទ្ធផលផលិតភាពអាចប្រៀបធៀបគ្នាបានក្នុងរយៈពេល១២ខែ៕មានិត