អាជ្ញាធរមូលដ្ឋានបានឲ្យដឹងកាលពីម្សិលមិញថា បុរសម្នាក់បានចាក់សម្លាប់មន្ត្រីនគរបាលឃុំម្នាក់ ដែលខ្លួនសង្ស័យថា លួចមានសាហាយស្មន់ជាមួយប្រពន្ធរបស់ខ្លួន ក្នុងក្រុងបាត់ដំបងកាលពីថ្ងៃសុក្រ។
យោងតាមលោក ចិត្រ វណ្ណី នាយរងនគរបាលយុត្តិធម៌ក្នុងខេត្តបាត់ដំបងបានឲ្យដឹងថា លោក ហែម ហឿត អាយុ៣៦ឆ្នាំជាកម្មកររោងម៉ាស៊ីនកិនស្រូវមកពីខេត្តបន្ទាយមានជ័យ បានយកកាំបិតចំពុះទុងចាក់លោក ស្រី សុវណ្ណារ៉ា ក្នុងសង្កាត់ស្វាយប៉ោ ក្រុងបាត់ដំបង កាលពីល្ងាចថ្ងៃសុក្រ។
លោក វណ្ណី បានឲ្យដឹងទៀតថា លោក ស្រី សុវណ្ណារ៉ា អាយុ៣៧ឆ្នាំអធិការរងនគរបាលឃុំសឿក្នុងស្រុកមង្គលបុរី ខេត្តបន្ទាយមានជ័យ កំពុងជិះម៉ូតូរបស់ខ្លួនកាត់ទីប្រជុំជនមួយកន្លែង នៅពេលនោះ លោក ហឿត បានដើរទៅរកគាត់ហើយចាក់គាត់ពីក្រោយធ្វើឲ្យធ្លាយរហូតដល់សួត។
លោក វណ្ណី បានឲ្យដឹងបន្ថែមទៀតថា លោក ស្រី សុវណ្ណារ៉ា បានបន្តជិះម៉ូតូរបស់ខ្លួនបានប្រហែល៧០ម៉ែត្របន្តទៀតទាំងខ្លួនប្រឡាក់សុទ្ធតែឈាមមុនពេលដួល។ ជនរងគ្រោះបានស្លាប់ដោយសាររបួសនៅយប់ក្នុងថ្ងៃដដែលនោះក្នុងមន្ទីរពេទ្យបង្អែកខេត្ត។
លោក វណ្ណី បានឲ្យដឹងបន្តថា ដំបូងឡើយលោក ហឿត សង្ស័យប្រពន្ធរបស់ខ្លួនឈ្មោះ ម៉ាង កញ្ញា ថាលួចមានសាហាយស្មន់ជាមួយលោក ស្រី សុវណ្ណារ៉ា នៅពេលមួយកាលពីខែមុន។ នៅពេលគាត់តាមប្រពន្ធរបស់ខ្លួននៅថ្ងៃមួយប្រហែលជាពីរសប្ដាហ៍កន្លងទៅ គាត់បានឃើញនាងជួបជាមួយមន្ត្រីនគរបាលរូបនេះ។
លោក វណ្ណី បានមានប្រសាសន៍ថា ” ជនសង្ស័យដឹងថា ប្រពន្ធរបស់ខ្លួនមានបុរសម្នាក់ទៀត ប៉ុន្តែគាត់គ្មានភ័ស្តុតាង ហើយដោយមិនអាចទប់កំហឹងរបស់ខ្លួនបាន ក៏ទៅសម្លាប់ជនរងគ្រោះតែម្ដង។ គាត់មិនចង់ធ្វើដូច្នេះទេ ប៉ុន្តែគាត់ស្រឡាញ់ប្រពន្ធរបស់គាត់ខ្លាំងណាស់”។
លោក វណ្ណី បានលើកឡើងថា អំឡុងនគរបាលសាកសួរកាលពីយប់ថ្ងៃសុក្រ អ្នកស្រី កញ្ញា បានសារភាពថា ខ្លួនបានលួចមានសាហាយស្មន់ជាមួយជនរងគ្រោះអស់រយៈពេលបីឆ្នាំមកហើយ។ លោកបានបន្ថែមថា លោក ហឿត បានសារភាពថា ខ្លួនពិតជាបានប្រព្រឹត្តអំពើមនុស្សឃាតមែន ហើយលោកត្រូវបានបញ្ជូនទៅសាលាដំបូងខេត្តបាត់ដំបងកាលពីម្សិលមិញ៕ ស៊ុយឈាង