ខ្សាច់ទន្លេកម្ពុជាជិត៨០.០០០តោន កំពុងស្ថិតនៅកំពង់ផែមួយក្នុងប្រទេសឥណ្ឌាជិត២ខែមកហើយ។ វាជាខ្សាច់ក្នុងចំនួនច្រើនលើកទី២ដែលត្រូវបានរកឃើញនៅទីនោះក្នុងរយៈពេល២ឆ្នាំនេះ ថ្វីបើលោកនាយករដ្ឋមន្ត្រី ហ៊ុន សែន បានចេញបម្រាមហាមមិនឲ្យនាំខ្សាច់ទន្លេចេញកាលពីឆ្នាំ២០០៩ក៏ដោយ។
កាសែត The Timeof India បានចុះផ្សាយកាលពីថ្ងៃអង្គារថា ខ្សាច់ទាំងនេះត្រូវបានដឹកចូលកំពង់ផែ Cochin ដែលស្ថិតនៅភាគខាងត្បូងប្រទេសឥណ្ឌាកាលពី២ខែកន្លងទៅនេះ។ ក្រុមហ៊ុន Titanics India Ltd. ដែលមានមូលដ្ឋាននៅក្នុងក្រុង Chennai និងដែលជាអ្នកនាំចូលខ្សាច់ទាំងនេះ បានឲ្យដឹងថា ខ្សាច់ទាំងនេះបានឆ្លងកាត់គយដោយគ្មានបញ្ហាណាមួយឡើយ ប៉ុន្តែថា ក្រុមហ៊ុនកំពុងមានបញ្ហាក្នុងការស្វែងរកអ្នកទិញ។
លោក Senthilkumar នាយនាវិកដែលធ្វើការឲ្យក្រុមហ៊ុន Titanics India Ltd. បានប្រាប់កាសែត The Time of India ដោយសំដៅទៅលើក្រុងមួយទៀតដែលនៅក្បែរកំពង់ផែនោះថា ” យើងមិនច្បាស់ទេថា តើហេតុអ្វីបានជាគ្មានអ្នកទិញ ខណៈកំពុងមានតម្រូវការខ្លាំងក្នុងរដ្ឋ Kerala។ វាប្រហែលជាមកពីក្រុមម៉ាហ្វីយ៉ាដែលរកស៊ីខ្សាច់ដែរនោះ កំពុងបង្កការលំបាកដល់ពាណិជ្ជកម្មខ្សាច់នេះ”។
មន្ត្រីនៅកំពង់ផែ Cochin ដែលស្នើសុំមិនបញ្ចេញឈ្មោះព្រោះលោកមិនត្រូវបានអនុញ្ញាតឲ្យនិយាយជាមួយប្រព័ន្ធផ្សព្វផ្សាយ បានឲ្យដឹងកាលពីម្សិលមិញថា កំពង់ផែនេះទទួលនាវាចំនួនពីរគ្រឿងដែលដឹកខ្សាច់កម្ពុជា។ នាវាទី១ដែលដឹកខ្សាច់ប្រមាណ៣៨.៧៥០តោន បានមកដល់នៅចុងខែសីហា ហើយនាវាទី២ដែលដឹកខ្សាច់ប្រមាណ៣៩.០០០តោន បានមកដល់ប្រហែលជា១ខែបន្ទាប់។ ខ្សាច់ទន្លេកម្ពុជាទាំងនេះត្រូវបាននាំចូលដោយក្រុមហ៊ុន Titanics India កាលពី២ខែកន្លងទៅនេះ។ លោកបានបន្ថែមថា ចាប់តាំងពីពេលនោះមកខ្សាច់មួយចំនួនត្រូវបានដឹកជញ្ជូនទៅទុកនៅឃ្លាំងមួយចំនួន ប៉ុន្តែនៅមានខ្សាច់ប្រហែល៥០.០០០តោនទៀតកំពុងនៅកំពង់ផែ។
មន្ត្រីកំពង់ផែរូបនេះបាននិយាយថា “គេបានប្រាប់យើងថា គេមិនអាចរកអ្នកទិញបានទេ។ ខ្ញុំមិនដឹងអំពីក្រុមម៉ាហ្វីយ៉ាដែលរកស៊ីខ្សាច់នេះទេ។ ខ្ញុំគិតថា វាគឺជាពាក្យចចាមអារ៉ាម”។
មន្ត្រីរូបនេះបានឲ្យដឹងទៀតថា ខ្សាច់ដែលដឹកតាមនាវាទាំងពីរត្រូវបានចុះបញ្ជីជា ” ខ្សាច់ទន្លេសម្រាប់នាំចេញ” ដែលមានប្រភពចេញពីប្រទេសកម្ពុជា ហើយជាខ្សាច់ដែលគេយកទៅប្រើក្នុងការសាងសង់ ប៉ុន្តែគេមិនបានបញ្ចេញឈ្មោះអ្នកនាំចេញឡើយ។
លោក ហ៊ុន សែន បានហាមមិនឲ្យមានការនាំចេញខ្សាច់ដែលបូមចេញពីទន្លេកាលពីឆ្នាំ២០០៩ ក្នុងគោលបំណងការពារជីវចម្រុះក្នុងទឹក។
លោក អុិត ប្រាំង រដ្ឋលេខាធិការក្រសួងរ៉ែ និងថាមពល បានបញ្ជាក់ថា ការបូមខ្សាច់ចេញពីទន្លេដើម្បីនាំចេញគឺនៅតែខុសច្បាប់ ប៉ុន្តែលោកបានលើកឡើងថា ក្រុមហ៊ុនមួយចំនួនត្រូវបានអនុញ្ញាតឲ្យនាំចេញខ្សាច់ដែលបូមចេញពីព្រែក ប្រសិនបើមានអាជ្ញាប័ណ្ណ។
កាលពីខែវិច្ឆិកា ឆ្នាំ២០១៣ ប្រព័ន្ធផ្សព្វផ្សាយឥណ្ឌាមួយបានចុះផ្សាយថា ខ្សាច់ទន្លេកម្ពុជាប្រមាណ៣២.០០០តោន ដែលគិតជាទឹកប្រាក់ប្រហែល១,៥លានដុល្លារ ត្រូវគយចាប់ឃាត់ទុកនៅកំពង់ផែ Cochin អស់រយៈពេលជាង៦ខែ។
យោងតាមមន្ត្រីកំពង់ផែនេះបានឲ្យដឹងថា ឥឡូវនេះខ្សាច់ទាំងនេះបានឆ្លងកាត់គយរួចហើយ ប៉ុន្តែក្រុមហ៊ុន Raja Steel Private ដែលជាអ្នកនាំចូលក៏កំពុងជួបការលំបាកក្នុងការស្វែងរកអ្នកទិញដែរ៕ ស៊ុយឈាង