ក្រសួងបរិស្ថានបានប្រកាសកាលពីថ្ងៃសុក្រថា ខ្លួនបានលុបចោលសម្បទានដីសេដ្ឋកិច្ចចំនួន១១ របស់ក្រុមហ៊ុនដែលមិនបានអភិវឌ្ឍដីទាំងនោះតាមកិច្ចព្រមព្រៀងរបស់ខ្លួនជាមួយរដ្ឋាភិបាល។
យោងតាមសេចក្តីប្រកាសមួយចុះថ្ងៃព្រហស្បតិ៍ បានឲ្យដឹងថា ដីសម្បទានសេដ្ឋកិច្ចទាំង១១គ្របដណ្ដប់លើផ្ទៃដីសរុប៥៤.៧០៤ហិកតា ក្នុងខេត្តកំពង់ស្ពឺ ក្រចេះ មណ្ឌលគិរី ព្រះសីុហនុ បន្ទាយមានជ័យ ព្រះវិហារ កំពង់ធំ ឧត្តរមានជ័យ និងបាត់ដំបង។
លោក សាយ សំអាល់ រដ្ឋមន្ត្រីក្រសួងបរិស្ថានបានមានប្រសាសន៍នៅឯសន្និសីទកាសែតមួយកាលពីថ្ងៃសុក្រថា មន្ត្រីក្រសួងបានចុះទៅពិនិត្យមើលតំបន់សម្បទានទាំងនោះ ហើយបានរកឃើញថា ក្រុមហ៊ុនទាំងនោះមិនបានអនុវត្តតាមផែនការអភិវឌ្ឍន៍របស់ខ្លួនទេ ឬបានបង្កបញ្ហាជាមួយប្រជាពលរដ្ឋដែលរស់នៅលើដីសម្បទានរបស់ខ្លួន បន្ទាប់ពីពួកគេឈូសឆាយដីនោះរួច។
កាលពីខែឧសភា ក្រសួងបរិស្ថាន និងក្រសួងកសិកម្មបានប្រកាសកិច្ចប្រឹងប្រែងថ្មីមួយដើម្បីដាក់សម្ពាធឲ្យបណ្តាក្រុមហ៊ុនដែលមានដីសម្បទានសេដ្ឋកិច្ចចម្រូងចម្រាស អនុវត្តតាមការប្តេជ្ញារបស់ពួកគេ ដើម្បីអភិវឌ្ឍដីដ៏ធំល្វឹងល្វើយ ដែលពួកគេជួលពីរដ្ឋាភិបាល។
កាលពីខែមុន ក្រសួងបរិស្ថានបានប្រកាសថា សម្បទានចំនួនប្រាំបីក្នុងខេត្តកោះកុង និងខេត្តព្រះសីហនុ ត្រូវបានលុបចោល។ លោក សាយ សំអាល់ បានមានប្រសាសន៍កាលពីថ្ងៃសុក្រថា “យើងនឹងបន្តអង្កេតតាមដាន និងស្ទង់មើលដើម្បីដោះស្រាយបញ្ហានេះ “៕សុខុម