បុគ្គលិកប្រហែល១០០នាក់ដែលតំណាងឲ្យសហជីព និងសមាគមការងារចំនួនប្រាំបីបានជួបជុំគ្នានៅមុខក្រសួងការងារកាលពីម្សិលមិញ ទាមទារឲ្យរដ្ឋាភិបាលបន្ធូរបន្ថយតម្រូវការចុះបញ្ជី ដែលពួកគេលើកឡើងថា ត្រូវបានប្រើដើម្បីរារាំងការខិតខំប្រឹងប្រែងដើម្បីបង្កើនចំនួនសមាជិកភាពរបស់ខ្លួន។
ក្រុមទាំងនេះដែលសមាជិកភាគច្រើនមកពីសហភាពការងារកម្ពុជា ដែលមានលោក អត់ ធន់ ជាប្រធាន ត្រូវបានដាក់ឲ្យស្ថិតក្រោមការឃ្លាំមើលរបស់តុលាការពីបទឧក្រិដ្ឋជាច្រើន អះអាងថា ក្រសួងការងារបានបង្កើតឧបសគ្គការិយាធិបតេយ្យថ្មីចំពោះការពង្រីកសមាជិកភាពរបស់ខ្លួនចាប់តាំងពីមានកូដកម្ម និងបាតុកម្មទូទាំងប្រទេសកាលពីខែធ្នូ និងខែមករាមក។
លោក រ៉ុង ឈុន ដែលបានដឹកនាំការតវ៉ាកាលពីម្សិលមិញក្នុងឋានៈជាប្រធានសហភាពការងារកម្ពុជាបានមានប្រសាសន៍ថា ” យើងប្រឈមឧបសគ្គជាច្រើនក្នុងការចុះបញ្ជីសហជីពរបស់យើង”។ លោកបានបន្ថែមថា “ចាប់តាំងពីចុងឆ្នាំ២០១៣មក ការចុះបញ្ជីរបស់យើងនៅរោងចក្រប្រហែល១០បានជាប់គាំង ពីព្រោះវាលំបាកសម្រាប់សហជីពរបស់យើងក្នុងការទទួលបានឯកសារដ៏ស្មុគស្មាញ ដែលពួកគេចាំបាច់ត្រូវបង្ហាញ…លិខិតថ្កោលទោសបញ្ជាក់ពីភាពស្អាតស្អំ”។
សហភាពការងារមួយចំនួនបានត្អូញត្អែរថា តម្រូវការថ្មីរបស់ក្រសួងដែលអ្នករៀបចំការងារត្រូវបង្ហាញលិខិតថ្កោលទោសបញ្ជាក់ពីភាពស្អាតស្អំ តាមរយៈការទទួលបានលិខិតមួយច្បាប់ពីក្រសួងយុត្តិធម៌មុនពេលចុះបញ្ជីសហជីពនៅរោងចក្រមួយនោះ កំពុងត្រូវបានប្រើដើម្បីរារាំងសហជីពមួយចំនួនក្នុងចំណោមសហជីពជាច្រើននៅទូទាំងប្រទេសកុំឲ្យកើនឡើងច្រើន។
ទោះជាយ៉ាងណា លោក អុិត សំហេង រដ្ឋមន្ត្រីក្រសួងការងារបាននិយាយការពារសេចក្ដីសម្រេចនេះ ដោយអះអាងថា ចលនាការងារជាពិសេសនៅក្នុងវស័យកាត់ដេរដ៏សំខាន់នេះចាំបាច់ត្រូវតែរៀបចំបន្ទាប់ពីសកម្មភាពខាងឧស្សាហកម្ម ដែលបានប៉ះពាល់បណ្ដោះអាសន្នដល់ឧស្សាហកម្មនេះរយៈពេលជិតមួយឆ្នាំកន្លងមក។
លោក អុិត សំហេង និងលោក ស ខេង រដ្ឋមន្ត្រីក្រសួងមហាផ្ទៃក៏បានសន្យាផងដែរថា នឹងជំរុញច្បាប់សហជីពថ្មី ដែលនឹងកាត់បន្ថយសេរីភាពក្នុងការបង្កើតសហជីព និងសេរីភាពក្នុងការជួបជុំគ្នានៅក្នុងកន្លែងធ្វើការ។
ថ្លែងទៅកាន់សមាគមរោងចក្រកាត់ដេរនៅកម្ពុជាកាលពីដើមខែនេះ លោក ស ខេង បានប៉ាន់ប្រមាណថា មានសហជីពចំនួន៤.០០០ និងសហព័ន្ធសហជីពចំនួន៩០នៅក្នុងវិស័យនេះ។
លោកបានមានប្រសាសន៍នៅពេលនោះថា ” ខ្ញុំទទួលស្គាល់ថា មានសហជីពច្រើនណាស់” ដោយលោកសន្យាអនុម័តច្បាប់សហជីពថ្មីបើទោះការពិតថា ក្នុងសេចក្តីព្រាងច្បាប់ថ្មីបំផុតរបស់ខ្លួន វាមិនបានឆ្លើយតបទៅនឹងកាតព្វកិច្ចអន្តរជាតិរបស់ប្រទេសកម្ពុជាក្នុងការការពារសេរីភាពរបស់កម្មករក៏ដោយ៕ សារុន